KATAK 05
Baibõl̦ eo Ej Ennaan eo an Anij ñan Kõj
Jeova ear letok juon menin letok elukkuun em̦m̦an. Ear letok 66 bok ko reddik me kar kobaiki ilowaan juon bok, Baibõl̦ eo. Bõtab kwõmaroñ l̦õmn̦ak: ‘Baibõl̦ eo ear itok jãn ia? An wõn naan ko ie?’ Ñan uwaake kajjitõk kein, jen etale im kõnono kõn wãween an kar Anij letok ennaan eo ilo Baibõl̦ ñan kõj.
1. El̦aññe armej ro rar je Baibõl̦, innem etke jej ba bwe ej itok jãn Anij?
Ear wõr enañin 40 em̦m̦aan ro rar je Baibõl̦ eo ium̦win enañin 1,600 iiõ ko. Rar je Baibõl̦ eo jãn 1513 B.C.E. eo l̦o̦k ñan turinl̦o̦k 98 C.E. eo. Im ear oktak wãween an kar em̦m̦aan rein mour jãn doon im wãween aer kar dik im rũttol̦o̦k. Meñe ãindein, ak aolep m̦õttan ko ilo Baibõl̦ rejjab idaaptõk. Etke ej ãindein? Kõnke naan ko ilo Baibõl̦ rej an Anij. (Riit 1 Tessalonika 2:13.) Ri-jeje ro rar jab je l̦õmn̦ak ko aer make. Ijoke, rar je “men ko rar wal̦o̦ktok jãn Anij ilo an kar jetõb kwõjarjar kõm̦akũt er.”a (2 Piter 1:21) Anij ear kõjerbale jetõb kwõjarjar eo an ñan kõm̦akũt em̦m̦aan rein ñan je l̦õmn̦ak ko an.—2 Timote 3:16.
2. Wõn ro remaroñ bõk tokjãn jãn Baibõl̦ eo?
‘Aelõñ otemjej, bwij, kajin im armej otemjej’ remaroñ bõk tokjãn jãn ennaan eo em̦m̦an ilo Baibõl̦. (Riit Revelesõn 14:6.) Anij ear kõm̦m̦an bwe en wõr Baibõl̦ eo ñan armej ro ilo elõñ kajin ko jãn jabdewõt bok. Enañin aolep armej ewõr aer maroñ ñan ellolo aer Baibõl̦ im riiti. Remaroñ kõm̦m̦ane men in jekdo̦o̦n ia eo rej jokwe ie ak kajin ta eo aer.
3. Ewi wãween an kar Jeova kõjparok Baibõl̦ eo?
Kar je Baibõl̦ eo ioon men ko me ejjab to aer pãd, ãinwõt kilin menin mour im peba ko me rej kõm̦m̦an jãn papairõs. Em̦m̦aan ro me rar kaorõk Baibõl̦ eo, rar lukkuun kate er ñan kõjparok wãween aer kar je im kõm̦m̦an elõñ kaape in Baibõl̦ eo. Meñe armej ro reutiej im kajoor rar kajjioñ in ko̦kkure Baibõl̦ eo, ak ewõr ro jet me rar m̦õn̦õn̦õ in kaarmejjeteik mour ko aer ñan kõjparoke. Jeova ear jab kõtl̦o̦k bwe jabdewõt men ak armej en kabõjrake jãn an kõnono ñan kõj ikijjeen Baibõl̦ eo. Baibõl̦ ej ba: “Naan ko an Anij eo ad rej pãd ñan indeeo.”—Aiseia 40:8, UBS.
KAM̦WILAL̦L̦O̦K AM̦ MEL̦EL̦E
Kal̦apl̦o̦k am̦ mel̦el̦e kõn wãween an kar Anij kõm̦akũt em̦m̦aan ro ñan je Baibõl̦ eo, wãween an kar kõjparoke, im wãween an kar kõm̦m̦an bwe en wõr ñan aolep armej.
4. Baibõl̦ eo ej kaalikkar an wõn naan ko ie
Kõjo̦e PIJAIN ALWÕJ eo. Innem riit 2 Timote 3:16, im bwebwenato kake kajjitõk kein:
El̦aññe armej rar je Baibõl̦, etke jej ba bwe ej Naanin Anij?
Kwõj ke l̦õmn̦ak bwe ejim̦we im jejjet ñan tõmak bwe ewõr an Anij maroñ ñan kwal̦o̦k l̦õmn̦ak ko an ñan ro rar je Baibõl̦ eo? Etke kwõj ba men in?
Juon jekretari emaroñ jeiki juon lõta, bõtab ennaan eo ie ej itok jãn armej eo ear kwal̦o̦kl̦o̦k naan ko ñan jekretari eo. Ejja ãindeinl̦o̦k wõt, meñe armej ro rar je Baibõl̦, ak ennaan eo ie ej itok jãn Anij
5. Baibõl̦ eo ej pãdwõt tok ñan rainin meñe ewõr ro rar kajjioñ jol̦o̦ke
El̦aññe Baibõl̦ ej jãn Anij, ealikkar jej kõtmãne bwe enãj kar kõjparoke tok ñan rainin. Ium̦win elõñ iiõ ko, em̦m̦aan ro reutiej im wõr aer kajoor rar kajjioñ jol̦o̦ke Baibõl̦ eo. Ri-tõlin kabuñ ko rar kajjioñ n̦ooje. Bõtab, elõñ armej rar kaarmejjeteik mour ko aer ñan kõjparoke Baibõl̦ eo meñe rar iioon jum̦ae im mour ko aer rar pãd ilo kauwõtata. Ñan jel̦ã kõn juon iaan armej rein, kõjo̦e PIJAIN ALWÕJ eo, innem bwebwenato kake kajjitõk kein:
Ilo am̦ jel̦ã bwe elõñ men ko kar aikuj kõm̦m̦ani ñan kõjparoke Baibõl̦ eo, men in ej ke kal̦apl̦o̦k kõn̦aan eo am̦ ñan riiti? Etke kwõj ba men in?
Riit Sam 119:97, innem bwebwenato kake kajjitõk in:
Ta eo ear kõm̦akũt elõñ armej ñan likũt mour ko aer ilo kauwõtata ñan ukote Baibõl̦ eo im ajeji?
6. Juon bok ñan aolep armej
Baibõl̦ eo ej bok eo me elõñtata ukokin jãn jabdewõt bok, im elõñtata aer kar leto-letak. Riit Jerbal 10:34, 35, innem bwebwenato kake kajjitõk kein:
Etke Anij ekõn̦aan bwe Naan eo an en pãd ilo elõñ kajin ko im bwe en ajeeded?
Ta eo em̦m̦an ippam̦ kõn Baibõl̦ eo?
Enañin
100%
in armej ro ijin ioon lal̦
ewõr aer Baibõl̦ ak remaroñ ellolo aer Baibõl̦ ilo kajin eo remel̦el̦e kake
Ewõr Baibõl̦ eo ilo elõñl̦o̦k jãn
3,000
kajin ko
jet relikiio, ak jet rej wal̦o̦k ilo jet m̦õttan ko
5,000,000,000
Eñin ej tarrin joñan kaape ko kar kõm̦m̦ani,
ekanooj in lõñl̦o̦k oran kaape in bok in jãn jabdewõt bok
JET ARMEJ REJ BA: “Baibõl̦ eo ej baj juon bokin jem̦aan me armej ro rar je.”
Ta am̦ l̦õmn̦ak?
Ta kein kam̦ool ko me rej kwal̦o̦k bwe Baibõl̦ eo ej Naanin Anij?
TARLEP IN KATAK EO ILO TUKADU
Baibõl̦ eo ej Naanin Anij, im ear kõm̦m̦an bwe aolep armej ren maroñ bõk tokjãn jãne.
Ãlij
Ta mel̦el̦ein ad ba bwe Anij ear kõm̦akũt em̦m̦aan ro ñan je Baibõl̦ eo?
Ta eo em̦m̦an ippam̦ kõn an m̦õj ukote Baibõl̦ eo ilo elõñ kajin ko, an ajeeded, im kõn an pãd tok ñan raan kein?
Ta eñjake eo am̦ kõn aolep men ko Anij ear kõm̦m̦ani bwe en maroñ kõnono wõt ñan kwe ikijjeen Baibõl̦ eo?
KAL̦APL̦O̦K AM̦ MEL̦EL̦E
Riiti bwebwenatoun Baibõl̦ eo—jãn tõre ko kar je ilo bok lemlem ko tok ñan ukokin raan kein.
Etale wãween an kar Baibõl̦ eo maroñ pãdwõt tok ñan rainin meñe ewõr jilu apañ ko rel̦l̦ap rar wal̦o̦k me remaroñ kar kõm̦m̦an bwe en jako.
Bwebwenatoun an kar Baibõl̦ Pãdwõt ñan Rainin (Naan in Keeañ No. 4 2016)
Lale ta ko armej ro rar iiooni me ear likũt mour ko aer ilo kauwõtata bwe ren maroñ ukote Baibõl̦ eo.
Kar kõm̦m̦an elõñ kaape in Baibõl̦ eo im ukote ilo elõñ kajin ko. Meñe ãindein, ak etke kwõmaroñ lõke bwe naan ko ie rejjab oktak jãn jeje ko jinointata?
“Has the Bible Been Changed or Tampered With?” (Katak eo ilo online)