Kwõpojak Ke in Peptaij?

Ilo am̦ katak Baibõl̦, em̦õj am̦ katak elõñ men ko kõn Jeova. Bõlen em̦õj am̦ kar kõm̦m̦an jet oktak ko ñan jerbali men ko kwõj katak kaki. Ijoke, emaroñ wõr men en̦ ej bõbraiki eok jãn am̦ wũjlepl̦o̦k mour eo am̦ ñan Jeova im peptaij. Katak in enaaj kwal̦o̦k kõn jet iaan men ko me remaroñ bõbraik eok ilo ial̦ eo am̦ l̦o̦k ñan peptaij im ewi wãween kwõmaroñ anjo̦ ioer.

1. Ewi joñan men ko kwõj aikuj jel̦ã kaki m̦okta jãn am̦ peptaij?

Bwe kwõn maroñ peptaij, kwõj aikuj “bõk jel̦ãl̦o̦kjen̦ eo ejim̦we kõn m̦ool eo.” (1 Timote 2:4) Men in ejjab mel̦el̦ein bwe kwõj aikuj in jel̦ã uwaakin aolep kajjitõk ko kõn Baibõl̦ eo m̦okta jãn am̦ peptaij. Meñe em̦õj an juon Kũrjin peptaij im eto an karejar ñan Jeova, ak er bareinwõt rej wõnm̦aanl̦o̦k wõt im katak. (Kolosse 1:9, 10) Bõtab ej aikuj wõr am̦ jel̦ã im mel̦el̦e kõn pedpedin katak ko ilo Baibõl̦. Em̦m̦aan ro rej lale eklejia renaaj jipañ eok ñan jel̦ã ñe ebwe joñan am̦ jel̦ã kõn Baibõl̦ eo.

2. Ta jet iaan buñtõn ne ko kwõj aikuj kõm̦m̦ani m̦okta jãn am̦ peptaij?

M̦okta jãn am̦ peptaij kwõj aikuj ‘ukel̦o̦k im oktak jãn kõm̦m̦an ko am̦.’ (Riit Jerbal 3:19.) Men in ej mel̦el̦ein bwe el̦ap am̦ bũrom̦õj kõn jabdewõt jerawiwi kwaar kõm̦m̦ani im kwõj kajjitõk ippãn Jeova bwe en jeorl̦o̦k am̦ bõd. Kwõj bareinwõt jum̦ae jabdewõt kõm̦m̦an ko renana im kwõj jek ippam̦ make ñan mour ilo juon wãween ej kabuñbũruon Anij. Kobal̦o̦k ippãn men in, kwõj jino bõk kun̦aam ilo m̦akũtkũt ko an eklejia eo ilo am̦ pãd ilo iien kweilo̦k ko im kwal̦o̦k naan ippãn eklejia eo.

3. Etke kwõjjab aikuj kõtl̦o̦k bwe am̦ mijak en bõbraik eok?

Jet rej ekkõl im mijak bwe reban maroñ kõm̦m̦ani men ko rar kallim̦ur ñan Jeova kaki. Em̦ool bwe ewõr iien kwõnaaj kõm̦m̦an likjab ãinwõt kar em̦m̦aan im kõrã ro retiljek ilo Baibõl̦. Bõtab Jeova ejjab kõtmãne bwe ri-karejar ro an ren weeppãn. (Riit Sam 103:13, 14.) Ebuñbũruon ñe kwõj kate eok joñan wõt am̦ maroñ! Enaaj jipañ eok. Ilo m̦ool, Jeova ej kaalikkar ñan kõj bwe ejjel̦o̦k jabdewõt men “enaaj maroñ kõjepel kõj jãn yokwe eo an.”​—Riit Rom 8:38, 39.

KAM̦WILAL̦L̦O̦K AM̦ MEL̦EL̦E

4. Kal̦apl̦o̦k am̦ jel̦ã kajjien Jeova

Ewi joñan am̦ aikuj jel̦ã kajjien Jeova m̦okta jãn am̦ peptaij? Kwõj aikuj jel̦ã kajjien ñan joñan eo kwõj yokwe e im kokõn̦aan kabuñbũruon. Kõjo̦e PIJAIN ALWÕJ eo ñan lale ewi wãween an rũkkatak Baibõl̦ ro ipel̦aakin lal̦ in kar kõm̦m̦ane men in. Innem bwebwenato kake kajjitõk in:

PIJAIN ALWÕJ: The Road to Baptism (3:56)

• Ilo pijain alwõj eo, ta eo ear jipañ jet ñan kõppojakl̦o̦k im̦aan ñan aer peptaij?

Riit Rom 12:2, innem bwebwenato kake kajjitõk kein:

• Kwõj ke pere jabdewõt iaan katak ko ilo Baibõl̦ ak el̦aññe Ri-Kõnnaan ro an Jeova rej katakin m̦ool eo?

• El̦aññe aet, ta eo kwõmaroñ kõm̦m̦ane kõn men in?

5. Anjo̦ ioon men ko remaroñ bõbraik eok ilo ial̦ eo am̦ l̦o̦k ñan peptaij

Ñe jej kããlõt ñan wũjlepl̦o̦k mour eo ad ñan Jeova im peptaij, kõj aolep jej iioon mãlejjoñ ko. Ñan lo juon waanjoñak, kõjo̦e PIJAIN ALWÕJ eo, innem bwebwenato kake kajjitõk kein:

PIJAIN ALWÕJ: Love for Jehovah Conquers Obstacles (5:22)

• Ilo pijain alwõj eo, ta mãlejjoñ ko Narangerel ear aikuj in anjo̦ ioer bwe en maroñ karejar ñan Jeova?

• Ewi wãween an kar yokwe eo an ñan Jeova jipañe ñan anjo̦ ioon mãlejjoñ kein?

Riit Jabõn Kõnnaan 29:25 im 2 Timote 1:7, innem bwebwenato kake kajjitõk in:

• Ta eo ej letok ñan kõj peran ñan anjo̦ ioon mãlejjoñ ko?

6. Lõke jipañ eo an Jeova

Jeova enaaj jipañ eok ñan kabuñbũruon. Kõjo̦e PIJAIN ALWÕJ eo, innem bwebwenato kake kajjitõk kein:

PIJAIN ALWÕJ: Jehovah God Will Help You (2:50)

• Ilo pijain alwõj eo, ta eo ear kõm̦m̦an bwe juon rũkkatak Baibõl̦ en jenliklik jãn an peptaij?

• Ta eo ear katak kake me ear jipañe ñan kõkajoorl̦o̦k an lõke Jeova?

Riit Aiseia 41:10, 13, innem bwebwenato kake kajjitõk in:

• Etke kwõmaroñ lukkuun lõke bwe kwõmaroñ kajejjete kallim̦ur eo am̦ ñe kwõj wũjlepl̦o̦k mour eo am̦?

7. Kam̦wilal̦l̦o̦k am̦ kam̦m̦oolol kõn yokwe eo an Jeova

El̦ak l̦apl̦o̦k am̦ l̦õmn̦ak kõn ewi joñan an Jeova yokwe eok, enaaj l̦apl̦o̦k am̦ kam̦m̦oolol im enaaj l̦apl̦o̦k am̦ kõn̦aan karejar ñane ñan indeeo. Riit Sam 40:5, innem bwebwenato kake kajjitõk in:

• Ta jeraam̦m̦an ko jãn Jeova me el̦aptata am̦ kam̦m̦oolol kaki?

Ri-kanaan Jeremaia ear yokwe Jeova im naan ko an, im el̦ap an kar kaorõke jeraam̦m̦an eo ñan jutak kõn etan Jeova. Ear ba: “Naan ko Am̦ rar ñan eõ menin m̦õn̦õn̦õ im lañlõñ an bũruõ, bwe em̦õj n̦aeta kõn Etam̦, O Jeova Anij.” (Jeremaia 15:16) Uwaake kajjitõk kein:

• Etke ej juon jeraam̦m̦an el̦ap ñan erom juon iaan Ri-Kõnnaan ro an Jeova?

• Kokõn̦aan ke bwe kwõn peptaij ãinwõt juon iaan Ri-Kõnnaan ro an Jeova?

• Ewõr ke jabdewõt men en̦ me ej bõbraik eok jãn am̦ peptaij?

• Kwõl̦ak lale ta eo kwõj aikuj in kõm̦m̦ane bwe kwõn tõpare mejãnkajjik in?

TARLEP IN KATAK EO ILO TUKADU

Ikijjeen jipañ eo jãn Jeova, kwõmaroñ anjo̦ ioon jabdewõt mãlejjoñ ilo ial̦ eo l̦o̦k ñan am̦ peptaij.

Ãlij

• Ewi joñan am̦ aikuj jel̦ã kõn Baibõl̦ eo bwe kwõn maroñ peptaij?

• Ta oktak ko kwõmaroñ aikuj in kõm̦m̦ani m̦okta jãn am̦ maroñ peptaij?

• Etke kwõjjab aikuj kõtl̦o̦k bwe mijak en bõbraik eok jãn am̦ peptaij?

KAL̦APL̦O̦K AM̦ MEL̦EL̦E

Etale im lukkuun lale ta un eo ejim̦we ñan an juon armej pepe in peptaij.

“Kwõpojak in Ke Peptaij?” (Naan in Keeañ, M̦aaj 2020)

Kal̦apl̦o̦k am̦ jel̦ã kilen anjo̦ ioon mãlejjoñ ko me remaroñ bõbrãik eok jãn am̦ peptaij.

“Ta eo Ej Bõbraik Eõ jãn Aõ Peptaij?” (Naan in Keeañ, M̦aaj 2019)

Lale ewi wãween an kar juon em̦m̦aan lo tõprak im anjo̦ ioon mãlejjoñ ko reppen bwe en maroñ peptaij.

‘Why Are You Delaying Baptism?’ (1:10)

Kar m̦okta juon em̦m̦aan etan Ataa ear ãliklik in peptaij. Lale ta eo ear kõm̦akũti ñan bõk buñtõn ne in eaorõk.

Do I Really Deserve This? (7:21)