Nan eo an Jeova Ej Mour Wõt
Katak ko Relap Jen Letter ko ñõn Taitõs, Pailimõn, im ñõn dri Hibru
JET ien ko elikin an kar Paul drioij jen ien kalbuj eo an kein kajuõn ilo Rom ilo yiõ eo 61, ear lolok ailiñ in Krit. Ke Paul ear lo bwe congregation ko ilo Krit rar aikwij kakajurlok kõtan eo air iben Jeova, ear kajitõk iben Taitõs bwe en berwõt ibeir. Tokelik, bwelen jen Masedonia, Paul ej jejelok ñõn Taitõs ñõn lelok nan in tel ko kin jerbal ko Taitõs ear aikwij in kõmõni im ñõn kwalok bwe ej rejetake jerbal eo ej kõmõne.
Ejjabto mokta jen an kar Paul drioij jen kalbuj ilo yiõ eo 61, ear jeje lok ñõn dri Kristian eo mõtõn ilo Kolosse etan Pailimõn, juõn nan in akwelap.
Ilo yiõ eo 61, Paul ear bareinwõt je juõn letter ñõn dri Kristian in Hibru ro ilo Judia me ej kwalok bwe wãwen kabuñ im mour eo an dri Kristian ro eutiejlok jen eo an dri Ju ro. Aolep letter kein jilu eor kakabilek ko raurõk ñõn kij.—Hib. 4:12.
EN KAJUR WÕT TÕMAK EO AM
Elikin an kar lelok nan in tel ñõn “likit jet armij bwe ren elder ro ilo jikin kwelok otemjej,” Paul ear kakabileklek Taitõs bwe ‘en bin an enoik [ro rej jelomene ak kiblia] bwe ren jimewõt ilo tõmak.’ Ear rejañ aolep ro ilo congregation ko ilo Krit ñõn ‘karmijete jerawiwi . . . im bwe ren mour im jadõr im jimewõt.’—Tait. 1:5, 10-13; 2:12.
Paul ear lelok nan in kakabilek ko jet ñõn jibõñ ro jein im jãtin ilo Krit bwe en kajur wõt tõmak eo air. Ej jiroñ Taitõs ñõn “kejbãrok yuk jen kajitõk wan ko, . . . im iri ko kin kien.”—Tait. 3:9.
Emwij Uaki Kajitõk ko Rej Berber ion Baibel:
1:15—Ewi wãwen “men ko otemjej” emaroñ erreo “ñõn ro rerreo,” ak etton “ñõn ro retton im re jab tõmak”? Uak eo ej wawa ion ar melele kin ta melelen an kar Paul ba “men ko otemjej.” Ear jab konono kin men ko me Nan eo an Anij ej kananaiki ak ear konono kin men ko me juõn dri tõmak emaroñ bebe kaki ekkar ñõn bõklikõt eo an me ej errã iben kien ko an Anij, ñõn e men kein rerreo. Ejjab eindrein iben juõn eo me lemnok eo an ebwir im etton bõklikõt eo an.a
3:5—Ikijen dri kabit ro, ewi wãwen kar ‘lomoriir kin kwolkwol,’ im ‘kin an jitõb kwojarjar kõkãl ir?’ Kar ‘lomoriir kin kwolkwol’ ke Anij ear karreoik ir kin bõtõktõkin Jisõs ke ear katok kin mour eo an. Im kar “kõkãl ir” kin jitõb kwojarjar kinke rar erom “men in kõmõnmõn ekãl” einwõt lõmaro nejin Anij emwij kabit ir kin jitõb kwojarjar.—2 Kor. 5:17.
Tokjen Katak ko ñõn Kij:
1:10-13; 2:15. Overseer ro rej aikwij kwalok beran ilo air kajime ta ko rebwir ilo congregation eo.
2:3-5. Einwõt ro ilo 2,000 yiõ ko remotlok, sister ro rekajur ilo tõmak ranin rej aikwij “kwojarjar ilo air kõmõn, jab dri konono riõp nae, im jab dri karek kin wain, a ren dri katakin kin men ko remõn.” Ilo wãwen in, emaroñ bolemen air lelok nan in kakabilek ñõn kajuju “kõra re jañin lilap” ilo congregation eo.
3:8, 14. Eor tokjen ar “lale im kõmõn jerbal ko remõn” kinke enaj jiboñ kij bwe jen niknik ilo jerbal eo an Anij im kajenolok kij jen lõl in enana.
AKWELAP ÑÕN E ‘KIN YOKWE’
Kar nebar Pailimõn kin an kar juõn joñok emõn kin “yokwe im tõmak.” Kinke ear juõn unjen aimlolo ñõn dri tõmak ro mõtõn, men in ear bõktok “elap lõñliñ im ainemõn” ñõn Paul.—Pail. 4, 5, 7.
Paul ear likit juõn joñok emõn ñõn aolep overseer ro ke ear kamarmire abañ eo ikijen Onesimõs, jab kin an kakien e bwe en kõmõn juõn men, ak ilo an akwelap iben ilo “yokwe.” Ear ba ñõn Pailimõn: “Kin aõ liki am bokake iõ, I ar jejewoj ñõn yuk, im jela bwe kwo naj kõmõn elap jen aõ ba.”—Pail. 8, 9, 21.
Emwij Uaki Kajitõk ko Rej Berber ion Baibel:
10, 11, 18—Ewi wãwen Onesimõs, eo ear “jitokjen” mokta ear oktõk im erom juõn eo ‘eor tokjen’? Onesimõs ear juõn dri kamakoko enana me ear ko jen mweo imõn Pailimõn ilo Kolosse im etal ñõn Rom. Bwelen, Onesimõs ear kwote jããn ko jen karo eo an ñõn kõlla kin ial eo an 900 mail aitokin. Emol, an kar jitõkjen ñõn Pailimõn. Ak, ke ear ber ilo Rom, Paul ear jibõñ Onesimõs bwe en erom juõn dri Kristian. Kiõ kin an kar oktõk im juõn dri Kristian, dri kamakoko in me ear “jitokjen” mokta ear erom juõn eo ‘eor tokjen.’
15, 16—Etke Paul ear jab kajitõk iben Pailimõn ñõn an kanemkwoj Onesimõs? Paul ear kõnan kõmõne wõt jerbal eo an ñõn ‘kwalok kin ailiñ in Anij, im katakin men ko kin Iroij Jisõs Kraist.’ Kin men in, ear kãlet bwe en jab bõk kunan ilo abañ ko an lõl in, einwõt ikijen abañ ko rej kitibuj dri kamakoko ro.—Jerb. 28:31.
Tokjen Katak ko ñõn Kij:
2. Pailimõn ear kebellok mweo imõn bwe ren kajerbale ñõn kõmõn kwelok ko ie. Ej juõn jerammõn ñe jej kajerbal moko imwer einwõt juõn jikin ar kwelok kin jerbal in kwalok nan.
4-7. Jej aikwij bõk buñten ne eo mokta ñõn nebar dri tõmak ro mõtõr me rej juõn joñok emõn kin tõmak im yokwe.
15, 16. Jen jab kõtlok bwe men ko renana rej walok ilo mour ren kõmõn bwe en le jen joñõn ar inebata. Einwõt kar walok iben Onesimõs, men ko renana remaroñ oktõk im walok ilo tokjen ko remõn.
21. Paul ear kõtmene bwe Pailimõn en jolok an Onesimõs bwir. Kij bareinwõt jej aikwij jeorlok bwir eo an juõn eo ear kalõkatip kij.—Mat. 6:14.
‘WÕNMANLOK ÑÕN AM RITTO ILO MOUR IN CHRISTIAN’
Ñõn kamol bwe tõmak ilo katok eo an Jisõs eutiejlok jen jerbal ko an Kien, Paul ear kwalok kin utiejen eo ear kajutak kabuñ in Kristian, jerbal in pris eo an, katok eo an, im bujen eo ekãl. (Hib. 3:1-3; 7:1-3, 22; 8:6; 9:11-14, 25, 26) Emol an kar jelalokjen in jibõñ dri Hibru ro rej Kristian ñõn kijenmij iomin matõrtõr eo rar iñtan kake jen dri Ju ro. Paul ear rejañ dri Hibru ro mõtõn ilo tõmak bwe ren ‘wõnmanlok ñõn air ritto ilo mour in Christian.’—Hib. 6:1, UBS.
Ewi aurõkin tõmak ñõn juõn dri Kristian? Paul ear je: “Elañe ejelok tõmak, armij re ban kabuñburuen . . . Anij.” Ear rejañ dri Hibru ro: “Jen kijenmij im etõr ilo iaikuij eo emwij likit e imar,” im kõmõne men in ilo tõmak.—Hib. 11:6; 12:1.
Emwij Uaki Kajitõk ko Rej Berber ion Baibel:
2:14, 15—Kinke “kajur in mij” ej ber iben Setan, men in ej kalikar ke bwe eor an maroñ ñõn mõn jabrewõt armij ekõnan? Jaab. Bõtab, jen jinoin ial eo an enana ilo Iden, an riõp ear kõmõn an or mij kinke Adam ear jerawiwi im ro nejin rar jolit jerawiwi im mij jen e. (Rom. 5:12) Bareinwõt, ro mõtõn Setan ion lõl rar matõrtõr dri korijer ro an Anij ñõn mij, einwõt air kar kõmõne ñõn Jisõs. Ak ejjab melelen men in bwe eor maroñ eo ejelok joñõn iben Setan ñõn mõn jabrewõt armij ekõnan. Elañe en kar eindrein, ejelok berre enaj kar mõn aolep dri kabuñ ro an Jeova jen jinoin. Jeova ej kejbãrok armij ro an einwõt juõn kumi im ejamin kõtlok bwe Setan en mõn ir aolep. Meñe Anij ej kõtlok bwe jet iar en mij jen jumae ko an Setan, jemaroñ liki bwe Anij enaj ukot jabrewõt jorran ko kar walok ñõn kij.
4:9-11—Ewi wãwen jej “dreloñ iloan kakije” eo an Anij? Elikin jiljino ran in kõmõnmõn ko an Anij, ear kakije jen an jerbal, im liki bwe karõk eo an kin lõl im armij ro enaj jejit kitien. (Jen. 1:28; 2:2, 3) Jej “dreloñ iloan kakije” in ilo ar bwijrõk jen ar kõmõni jerbal ko ñõn kowãnik kij mõke im ilo ar tõmak ilo katok in binmour eo Anij ear letoke. Ñe jej jerbale tõmak eo ar ilo Jeova im lor Nejin ijellokin ar jibarek men ko rekibbon, jej bõk jerammõn ko rekainemõn im lo kakije ran otemjej.—Mat. 11:28-30.
11:10, 13-16—“Jikin kwelok” ta eo Ebream ear kõtare? Men in ear jab lukkun juõn jikin kwelok ak ej ilo kõkkar wõt. Ebream ear kõtar “Jerusalem i lõñ,” me ej ejaakin Kraist Jisõs im 144,000 iroij ro mõtõn. Iroij rein ilõñ rej bareinwõt konono kake ir einwõt “jikin kwelok eo ekwojarjar, Jerusalem Ekãl.” (Hib. 12:22; Rev. 14:1; 21:2) Ebream ear reimanlok ñõn mour iomin kien eo an Ailiñ in Anij.
12:2—Ta kar ‘lõñliñ eo ar likit e iman [Jisõs]’ ikijen an kar “iñtan ilo drebail [ak, alal in iñtan]” eo? Kar lõñliñ eo ñõn lo ta ko jerbal in kwalok nan eo an enaj kar kõtõbraki. Men kein rej kitibuj ñõn kokwojarjar ãt eo etan Jeova, kaibujuij Iroij Potata eo an, im lomoren armij jen mij ikijen katok in binmour eo an. Jisõs ear bareinwõt reimanlok ñõn jerammõn eo ñõn iroij einwõt Kiñ im jerbal einwõt Pris eo Elap ñõn tokjen eo an armij ro otemjej.
13:20—Etke kar konono kake bujen eo ekãl einwõt “ej in drio”? Eor jilu un ko: (1) Ejelok bar juõn enaj bõk jikin, (2) men ko ej kõtõbraki renaj ber indrio, im (3) “s̃ip” ro jet renaj wõnmanlok wõt ñõn bõk tokjen jen karõk eo kin bujen eo ekãl mae elikin Armagedõn.—Jon 10:16.
Tokjen Katak ko ñõn Kij:
5:14. Jej aikwij niknik in katak Baibel eo im jerbale ta ko jej katak kaki. Eñin ej wãwen eo drein jemaroñ kaminene kij ñõn “jela kajen emõn im nana.”—1 Kor. 2:10.
6:17-19. Ñe kejatdrikdrik eo ar ej berber ion kalimur eo an Anij im an kanõjnij, men in enaj jibõñ kij bwe jen jab jebwãbwe jen ial in mol eo.
12:3, 4. Ijellokin ar ‘mõk im kijelok ilo buruer’ kin melejoñ ak matõrtõr ko redrik me jemaroñ jelmaiki, jej aikwij wõnmanlok ñõn ridtolok ilo mour in Kristian im kakõmõnmõnlok maroñ ko ar ñõn kijenmij iomin melejoñ ko. Jej aikwij jek ilo buruer ñõn jumae ñõn ñe ‘etorlok bõtõktõkir,’melelen ñõn mij.—Hib. 10:36-39.
12:13-15. Jen jab kõtlok bwe juõn “okran emeo,” ak jabrewõt ilo congregation eo me rej bukot likjõp in wãwen air kõmõni men ko, en bõprae kij jen ar ‘kõmõnmõn ial ko rejime ñõn neer.’
12:26-28. “Men ko ar kõmõnmõni” rejjab jitõñlok ñõn men ko Jeova ear kõmõnmõni, ak rej an ro jet. Men kein rej kitibuj jukjuk im ber in ekoba “lõñ ko” renana, me naj kamõkitkitiir bwe ren joko. Ñe men in enaj walok, “men ko re jab mõkitkit,” melelen Ailiñ in Anij im ro rej jurake, renaj berwõt. Elap an aurõk bwe jen kijejeto in keañ kake Ailiñ in im mour ekkar ñõn kien ko an!
13:7, 17. Ñe jej lemnok wõt kin nan in kaiñi in bwe jen bokake im kõtãik kij ñõn overseer ro ilo congregation eo, men in enaj jibõñ kij bwe jen mõnõnõ in jerbal ibeir.
[Kamelele Eo Itulal]
a Lale Imõniaroñroñ, Nobõmba 1, 2007, peij 8-9.