Imõniaroñroñ eo Em̦õj Kapidodoekl̦o̦k ilo Kajin Belle
EL̦AP ad m̦õn̦õn̦õ in kõjjel̦ãik kom̦ bwe ewõr kiiõ Imõniaroñroñ eo me em̦õj kapidodoekl̦o̦k ilo kajin Belle. Jenaaj kajjioñ in kajerbale bok in ekããl ium̦win juon iiõ. El̦aññe jej lo bwe el̦ap an jipañ ro jeid im jatid, innem jenaaj wõnm̦aanl̦o̦k wõt im kajerbale. Naaj juon wõt iien aer jilkintok Imõniaroñroñ eo em̦õj kapidodoekl̦o̦k ilo kajin Belle ippãn Imõniaroñroñ in Belle eo juon ñan congregation ko.
Elukkuun aorõk bwe aolep ren mel̦el̦e kõn katak ko ilo Imõniaroñroñ eo kajjojo wiik. Etke? Kõnke Imõniaroñroñ in katak eo ej wãween eo el̦ap “ri karijer e tiljek im mãlõtlõt” ej katakin armej ro doon Anij rainin. (Matu 24:45) Ak etke kar aikuj kapidodoekl̦o̦k Imõniaroñroñ eo ilo kajin Belle?
Elõñ ro jeid im jatid ipel̦aakin lal̦ rej kweilo̦k ilo congregation ko ilo kajin Belle bõtab jet iien remaroñ jab lukkuun mel̦el̦e Imõniaroñroñ eo ilo kajin Belle. Ewõr jet un ko unin rej ãindein. Ñan waanjoñak, ilo elõñ aelõñ ko ilo Africa, Esia, im South Pacific, elõñ armej ro rej kajin Belle. Elõñ ro jeid im jatid ilo jikin kein rej kajin Belle ilo iien kweilo̦k ko aer im ñe rej kwal̦o̦k naan. Bõtab rej kõnono ilo kajin eo aer make ñe rej pãd ilo m̦oko im̦wier. Bareinwõt, kajin Belle eo an armej ro ilo jikin kein epidodol̦o̦k jidik jãn naan in Belle ko rej kajerbali ilo Imõniaroñroñ eo. Ewõr jet jeid im jatid rar aikuj em̦m̦akũt jãn aelõñ ko aer im rej pãd ilo jikin ko me kweilo̦k ko rej wal̦o̦k wõt ilo kajin Belle. Innem epen an rein mel̦el̦e Imõniaroñroñ eo ilo kajin Belle kõnke ejjab kajin eo aer in. Jet jodrikdrik ro meñe kajin Belle ej kajin eo aer, ak jet iien rejjab mel̦el̦e katak ko ilo Imõniaroñroñ eo. Imõniaroñroñ eo em̦õj kapidodoekl̦o̦k ilo kajin Belle enaaj l̦ap an jipañ aolep ro jeid im jatid ipel̦aakin lal̦.
Meñe epidodol̦o̦k naan in Belle ko ilo Imõniaroñroñ in jãn Imõniaroñroñ eo juon, ak bok kein jim̦or renaaj kwal̦o̦k katak ko rem̦ool jãn Baibõl̦ eo. Enaaj ejjel̦o̦k oktak ilo Imõniaroñroñ kein jim̦or. Oran pãrokõrããp ko ilo bok kein ruo renaaj joñan wõt juon. Bareinwõt ilo bok kein enaaj wõr kajjitõk ko, pija ko im bo̦o̦k in ãlij ko. Innem ej am̦ pepe kain Imõniaroñroñ et eo kokõn̦aan katak kake.
Kõmij tõmak bwe Imõniaroñroñ eo em̦õj kapidodoekl̦o̦k ilo kajin Belle enaaj l̦ap an jipañ ro jeid im jatid ekoba jodrikdrik ro. Enaaj pidodol̦o̦k aer kepoj katak ko ilo Imõniaroñroñ eo kajjojo wiik. Jeova ej yokwe armej ro doon. El̦ap ad kam̦m̦oolol E kõn an kajerbal “ri karijer e tiljek im mãlõtlõt” ñan letok aolep men ko jej aikuji ilo iien em̦m̦an.—1 Piter 2:17.
Kumi eo Ej Tõl Ri Kõnnaan ro an Jeova