Lisin 17

Pâna nani briaia kaka, yawan nani pâna bangwi kaia sa

Pâna laka ba latwan laka ra ai plamaia brisa. Nahki praiska kat Jehova tanka brima ba, latwankam laka ba kau tara kabia witin ai dukiara, bara ai dukia daukaia brinkam ba sin. Naha na kupiam mai munbia Jisus Kraist disaipil ka takaia (Matyu 28:19). Man sipkama God panika laka liliaka briaia bankaiara asla takma kaka Jehova Witniska nani pamali liliakira ba aikuki. Dia daukaia sa witin aikuki kaia kaka?

Mariks man God ra latwansma ai laka nani ba alki brih. “Naha na sika God latwan ka laka tanka ba: Witin ai laka nani ba alki bribia; bara, ban sakuna, witin ai laka nani ba trabil kira apia sa.”​—1 Jan 5:3.

Lan takma ba warkka dauki mariks. Jisus sturi kum win naha lukanka tanka maprika mariki sa. Waitna sinskira kum ai watla ba walpa purara makan. Waitna kum sins luha ba auhya purara makan. Pasa tara kum balan bara, utla walpa purara paskan ba ban bui kata, sakuna auhya purara paskan kan ba, bin tara dauki wal kahwan. Jisus win upla nani ai smalkan ka wali nani ba waitna sinskira ai watla walpa purara makan ba baku sa. Baku sin win ai smalkanka nanira wali bangwi sakuna ai rayaka ra alki daukras ba waitna sins luha ai watla auhya purara paskan ba baku sa. Naha waitnika wal na wina aniba baku kaia want sma ki?​—Matyu 7:​24-27.

God ra wînam tara ba yabaia. Sipsma daukaia Jehova ra puram sunra ra wiaia man witin kupia laka ba daukaia wantsma bankaiara. Yawan God kupia laka daukbia kaka, marikisa yawan ba Jisus Kraist disaipilka sa.​—Matyu 11:29.

Aitahbi taks. “Aihtabi taki bara saurkam nani ba sikbi saks witin nina ba mayuni wal.”​—Apostel Storka 22:16.

Aiska pali wal God dukia dauks. “Dia dia dauki kama sin, sulkam aiska wal dauks Jehova dukiara baku, bara upla nani dukia baku lika apia.”​—Kolosi nanira 3:23.