Lisin 16

Yawan Mariki Bangwi Kap God Ra Latwan Kaiki Ba

Pâna kum ban brikaia kaka, aitani sa yawan witin wal aisaia. Yawan witinra wali bangwisa, bara witin yawan nanira wan walisa. Bara upla wala nanira witin dukiara pain asisa. Baku takisa yawan God wal ban pâna laka brikaia sa kaka. Aman kaiks Baibil wi bara yawan nani dia daukaia ba naha dukiara:

Jehova ra pat pat wan pura sunikaia. “Pura sunra ra ban bangwi bas.”​—Roman nanira 12:12.

God Bila ba aisi kaikaia, Baibil ba. “Ulbanka nani sut ba God winka puhbra mita sika bara pain sa smalkaia, pâli lawi munaia, diara nani wapni mankaia dukiara.”​—2 Timoti 3:16.

Wala nanira God tanka ba smalkaia. “Bamna wih bangs, bara nisan nani sut uplika nani wina disaipil nani dauks, [ . . . ] smalki bangs diara nani sut wiri ba ban alki bri kaia dukiara.”​—Matyu 28:​19, 20.

God panika nani ba lamara waya. “Ya sins bri nani ba aikuki taukisa kaka sinskira takbia.”​—Proverbios 13:20.

King laka Watla asla takanka nani ra waia. “Pana pana yamni kaiki wal latwan lakara wan kupia bukaia bara wark yamni nani dukiara sin, [ . . . ] pana pana wan tatukbi kira sin.”​—Hibru nanira 10:​24, 25.

King laka warkka ba ban brikaia dukiara hilp munaia. “Kumi bani [yabia] dia ai kupia ra takan ba kat, saura tnatka wal apia bara taibi munan laka wal baku sin apia, kan God latwan kaikisa ai kupia wilin wal yabi bara.”​—2 Korint nanira 9:7.