Inteligencia artificial ba: ¿hilp wan munbia apia kaka trabil nani wankbia ki? | ¿Baibil dîa wisa?

Naha manka nani ra gabamint tâ bri nani, bara tecnología tânka pliki kakaira nani inteligencia artificial (IA) karnika dukiara aisan. Witin nani wisa naha ba upla nani mapara yuskira kabia, kuna sim piua ra uba lukisa kan saura yus munbia kaka trabil nani manis takaia sip sa.

• “Tecnología artificial ba (masin nani upla sinska talia paskan ba) tânka pliki kakaira nani paskan dukia nani tila wina naha ba kau karnika tara brisa, bara upla rayaka manis yamni munaia sip sa [...] kuna sim piua ra baha karnika wal, upla nina bara ai raitka sauhkaia sip sa, baku sin gabamint nani mapara blahwanka nani bukaia sip sa” (Kamala Harris, Stech kuntrika ra prisidint wina sekan uplika ba, mayo kati yua 4 2023).

• “Tecnología artificial ba (IA), wibia sa kaka masin nani upla sinska talia paskan ba, upla wîna tara main kaikaia dukiara hilp manis wankaia sip sa. Kuna baku sin, upla wîna tara bara ai yamnika ra saura munaia sip sa” (Tasba aiska daktar nani daknika bara upla wîna tara yamnika tânka pliki kakaira nani daknika daktar Frederik Federspiel tâ bri ba, BMJ Global Health. mayo kati yua 9 2023).a

• “Nanara inteligencia artificial yus muni, gabamint apia kaka upla nani nina sauhkaia sip sa. Naika naha masinka nani ba upla manis wina ai warkka mihta dakbaia sip sa. Bara masin sinskira nani paski tânka pliki kakaira manis wisa, naika piua ra sip sa naha masinka nani ba upla rayaka ba pât ra dingkaia” (The New York Times, mayo kati yua 1 2023).

Piua lubia ba wal kaikbia ani pitka kat inteligencia artificial ba upla nani ra hilp munbia apia kaka trabil nani bri balbia sapa. ¿Baibil dîa wisa?

¿Dîa muni upla diara sinskira nani paskisa taim si brin wan dingkisa?

Baibil wan marikisa dîa muni upla nani wiaia sip apia sa dîa sinskira paski nani ba tnatka pain ra baman yus munbia ba.

1. 1. Upla nani lukanka pain wal diara nani daukbia kra sin, ai mihta ra apia sa diara saura nani ningkara takbia ba alki takaskaia.

   • “Yabal tara ba, upla nakra ra wapni man sa; sakuna baha tnata pali ra prura bâra sa” (Sins Lâka 14:12).

2. 2. Yawan wark dauki diara kum paskisa taim, ningkara upla wala mihta tnatka pain apia kaka tnatka saura ra yus munbia sapa wahbi sakaia wan mihta ra apia sa.

   • “[Warkki] nani sut swiaia sna yang waitlika ra aula uplika ba ra. Bara diara kum kasak ba lika: witin ba sinskira, apia taniskira kabia kra, yang naha tasba ra diara nani briri ba, sins lâka nani wal baku sin wark karna taki ni, baha sut ba dawanka takbia” (Smasmalkra 2:18, 19).

Upla diara sinskira nani paski ba wal si brin ra wan dingkisa, baha wan marikisa yawan wan Papaskra wan tâ bribia nit ba.

¿Yaura kasak lukaia sip sa ki?

Wan Papaskra pramis munisa upla diara sinskira nani paski ba wal, tasba bara upla nani ra sauhki tikbia swibia apia.

• “Sakuna tasba ba, aihka takras ban bâra [kabia]” (Smasmalkra 1:4).

• “Kasakkira nani ba lika tasbaya ba bri iwbia, ban kaia ra sin baha tasbaya ra iwi kabia” (Lawana Nani 37:29).

Naika piua ra kupia kumi lâka bara âuyapah lâka ra iwbia dukiara, yawan dîa daukaia nit ba wan Papaskra Baibil bâk wan smalkisa. Baibil dîa wi ba kau lan takaia want sma kaka, “¿Existe alguna guía confiable que le asegure su futuros?” bara “La esperanza real de un mañana mejor” ulbanka nani aisi kaiks.