Mairin nani dukiara kaina kahbanka— Baibil dîa wisa

“Tuktan kapri taim yu bani laikra almuk ba ai pruki rau ai sauhki kan marit takri ningkara muli yapti ba yang ra ban rau ai sauhki kan witin bara daipna ba alba kum baku ai bri kan baha mita silp pruaia lukri” (Madhu, a India kuntrika wina).

“Tasba aiska ra mairin nani ra rau sauhkaia lâka ba bara sa”, Tasba aiska ra upla wîna tara yamnika dukiara wark taki asla takanka ba lukisa mairin yumhpa tila wina kumi ba rug munan lâka apia kaka rau sauhkanka lâka ai rayaka ra brin sa.

Baku man ra mai takan sa kaka ani ani ra wama kra sin rug munan lâka apia kaka rau sauhkan lâka mai takbia sibrinka wal taukisma. Mairin nani ra rau sauhki ba mita ban kra damra walisma upla aihkika ba naku lukisa: “Mairin nani ba bahki sa”, kuna ¿Gâd ba mairin nani ra bahki kulkisa ki?

¿Gâd mairin nani dukiara dîa lukisa ki?

Baibil tikska: “Gâd upla ba paskan piua ra [...] waitna bara mairin paskata” (Blasi Sturka 1:27).

Tânka ba: Gâd ba waitna bara mairin wal paskan baha mita wal sut ra tara kulkisa, baku sin bîla kaikisa maya waitna nani ba ai maya mairin nani ra latwan kaikbia sim ai wîna pali ra latwan kaiki ba baku, Gâd bîla kaiki sa maya waitna nani ba ai maya mairin ra taibi munbia apia, bîla saura wal aisabia apia bara rau sin sauhkbia apia (Epesus 5:33; Kolosi 3:19). Param sa mairin nani ra kaina kahbaia ba Gâd mapara tânka tara brisa.

“Tuktan kapri taim taya nani mita rug lâka ra alki saura ai munan. Pat 17 mani bri kapri taim baski mita ai win, witin wal rug lâka daukras sna kaka warkki wina kanbi ai sâkbia. Mayi waitna, aisiki, yaptiki bara laimara iwi uplika nani sut ba bahki ai kulkan sa, kuna tawa tawa Jehovab dukiara lan taki wari taim nu takri witin ba mairin nani ra tara kulkisa kasak lukisna witin latwan ai kaikisa bara tara ai kulkisa” (Maria, Argentina kuntrika wina).

¿Nahki kli pain damra walaia sip sma?

Baibil tikska: “Uplika kumi bâra sa, wan muihni wal kau karna dutki wan alki ba” (Sins Lâka 18:24).

Tânka ba: Pana aihwa kum ba hilp mai munbia. Kasak lukisma uplika kum wal nahki damra walisma ba dukiara aisas.

“20 mani bilara rug lâka ra rau ai sauhki kan ba upla kumi ra sin wiras kapri. Baha saura ai munan ba dukiara uba luki kapri bara baha tâka mita kupi ra lilia lâka âpu kapri bara las kat dîa ai takan ba dukiara upla kum wal aisari bara witin ai walaia wilin kan baha daukri ba mita pain daira walri” (Elif, Turkia kuntrika wina).

Baibil tikska: “Trabilkam taki lukisma ba sut, Gâd mihta ra swis, kan witin lika man nani sut main mai kaikisa” (1 Pita 5:7).

Tânka ba: Puram sunisma taim rait pali Gâd aman walisa. (Lawana Nani 55:22; 65:2) Man nahki manakira sma ba tânkam briaia hilp mai munaia sip sa kan witin man ra lukisa.

“Jehova dukiara lan takaia ba hilp ai munan kli pain daira walaia bara sari lâka ba kupi wina sakaia. Nanara pura sunra bâk nahki daira walisna ba Gâd ra param aisaia sip sna, witin yang nahki daira walisna ba pain ai tânka brisa, pana rait aihwa kum baku” (Ana, Belize kuntrika wina).

¿Mairin nani ra rau munaia lâka ba yu kum Gâd alki takaskbia ki?

Baibil tikska: “[Jehova], tuktan rau bara taiban lâka ra uplika nani ba, wapnika aisi dauks. ¡Baha mita upla tasba wal paskram ba, kli sirang wan ikbia apia!” (Lawana Nani 10:17, 18).

Tânka ba: Tisku pali Gâd ba kasak apia lâka ba âpu daukbia naha tilara kabia mairin nani ra rau sauhkaia lâka ba.

“Mairin bara tuktan mairin nani ra rau munaia lâka ba tisku Gâd tnata mangkbia nu takaia ba, yang ra auya pah lâka aikan sa” (Roberta, Mexico kuntrika wina).

¿Baibil ba nahki bîla kaikanka wankisa?, ¿yawan dîa muni ai pramiska nani ra kasak lukaia sip sa?, ¿naiwa piuara Baibil wal nahki Jehova witniska nani ba hilp wan munaia sip sa? Naha tânka nani dukiara nu takaia want sma kaka naha ulbanka maikan Jehova witniska uplika ra wih mai kaikbia makas.

Naha ulbanka ba print muns.