¿Dîa muni naiwa piua ra upla nani ba rispik lâka ba marikras sa ki? ¿Baibil dîa wisa?

Naiwa ba upla nani daukanka kau saura marikisa. Tânka kum baku: Aspital ra upla nani ba daktar nani ra bîla karna nani wal aisisa, plun piaki atki pliska nani ra upla kum kum ba wark tatakra nani ra saura munisa, bus bilara impaki nani ba wala nani ra saura munisa, bara skul watla bilara tuktan kiamapara nani ba ai smasmalkrika nani ra lawaska kikisa, saura munisa, bara mapara aiklabisa. Baku sin pulitik uplika kum kum nani ba daukanka taniskira bri banhwisa bara wala nani ba ban ban aisisa ai daukanka nani ba painkira pali brisa.

Baibil ba rait pali smalkisa daukanka pain nani briaia ba dîa tânka sa, baku sin tânka marikisa dîa muni naiwa piua ra upla nani ba diara kumi sin dukiara rispik lâka ba marikras.

¿Dîa muni naiwa piua ra upla nani ba rispik lâka ba marikras sa ki?

Tasba aiska ra upla daukanka nani ba kau saura taki auya sa, diara kasak nani, lâ pain nani bara daukanka yamni nani dukiara rispik lâka ba marikras.

• Bisi pali Gallup kampanika ba Stech kuntrika ra iwi uplika nani ra dîa luki ba makabi wali nu takan, upla nani ba lukisa daukanka saura nani ba kau saura taki auya sa 22 manka bilara kaikras kan ba baku.

• Laki kaikanka wala ra 32,000 uplika nani ra 28 kuntrika nani wina 65% uplika nani wisa naiwa ba upla nani ra rispik munaia lâka ba âpu sa.

Baibil ba kaina manis wina aisan naiwa ba upla nani ba daukanka saura nani marikbia.

• “Tnata yua nani ra piua karna nani balbia. Upla nani ba klauna ai dukiara baman luki kabia, lalah ra latwan kaikbia, kakalra kabia bara sin diara lalihkra kabia, [...] ai aisika bîla walras kabia, tingkikas kabia [...]. Ai uplika nani ra latwan bara umpira sin kaikbia apia, upla nina aisasara nani kabia, ai wîna brinka nani sip alki takaskras kabia, kupias nani bara diara pain nani waihla kabia” (2 Timoti 3:1-3).

Prapit dahra aisanka ba nahki naiwa piua ra aimaki ba nu takan mai daukisa kaka naha ulbi sakanka ba aisi kaiks: “¿Predijo la Biblia cómo sería la gente en nuestros días?”.

Upla kum pain kaia dukiara hilpka kasak kum

Tasba aiska ra upla daukanka nani ba kau saura taki auya sa. Sakuna upla milian nani ba Baibil hilpka ba wal ai daukanka nani ba kau pain brin sa. ¿Dîa muni Baibil smalkanka nani wan daukanka nani yamni munisa? “Kan ban bapi buisa ban kaia ra, kasak lâka kat daukan sa” (Lawana nani 111:8). Kaisa tânka kum kum nani laki kaikaia:

• Baibil dîa smalki ba: “Upla wala nani man nani ra dîa mai daukaia brin mai dauki ba baku, man nani sin dauks” (Matiu 7:12).

  Tânka ba: Upla nani ra latwan lâka bara rispik lâka ba marikaia sa yawan brin wan dauki ba baku.

• Baibil dîa smalki ba: “Kli kunin aisapara, sakuna kumi bani ai muihnika ba wal diara kasak baman aisi kabia” (Epesus 4:25).

  Tânka ba: Yawan dîa dauki ba bara dîa aisi ba diara kasak baman kaia sa.

Naha tânka ba dukiara naha ra smalkanka nani kau sâkma:

• Atalaya lalka: “Una guía confiable para hacer lo correcto”.

• Ulbi sakanka: “Upla lukanka bara daukanka rispik munaia lâka ba: ¿Baibil naha dukiara dîa smalkisa?”.