¿Nisan nani asla takanka warkka dauki ba tasba aiska ra kupia kumi lâka bri balaia sip sa ki?

Naiwa ba war aiklabanka nani tâka mita ban ban tasba aiska ra saura pali daukan sa. Baha mita kupia kumi lâka pliki asla takanka nani baa kupia kumi lâka bri balaia dukiara karna trai munisa ai uplika kum ba war aiklabi pliska nani ra swiaia. Witin nani bîla kaikisa baha sât pliska nani ra kupia kumi lâka bri balaia dukiara ban wark taki kaia. Nisan nani Asla Takanka tâ brabrira António Guterres naku win: “Nisan nani asla takanka warkka dauki nani ba tasba aiska ra kupia kumi lâka bri balaia lukanka brisa.”

Mani nani kum kum luan ba ra kupia kumi lâka pliki asla takanka warkka ba yamnika kum kum sakan sa. Tânka kum baku, war tâka mita ai tawanka wina plapan uplika nani ba kli ai tawanka ra bri balan sa, upla nani ra hilpka lâka yaban sa, bara tawan bilara sauhki tikanka nani ba kli paskan sa. Ban sakuna kupia kumi lâka pliki asla takanka nani ba pain ai warkka daukaia dukiara trabil kum kum nani mapara buaia sa. ¿Tasba ra kupia kumi lâka ra iwbia dukiara hilpka lâka yabia sa ki? ¿Baibil ba baha dukiara dîa smalkisa?

Kupia kumi lâka pliki asla takanka nani trabilka nani bri ba bara Baibil dîa smalkisa

Lilka kum ra kaikisa waitna wal ai mina ra buisa bara ai klahkla kruski brisa.

Trabilka ba: asla lâka âpu sa. Upla nani plis sât sât wina ba mita isi apia sa asla lâka ra wark takaia. Aima kum kum naha uplika nani ba lukanka sât sât bri ba mita apia kaka, blahwanka nani mita karna munisa ai warkka pain daukaia dukiara.

Baibil dîa smalkisa: “Kasbrika purara Gâdka ba king lâka kum bukbia […] ban sakuna, king lâka wala nani sut ra pura lubia [tasba gabamintka nani], bâra ban kabia ban kaia ra.” (Daniel 2:44)

Kaina piua ra Gâd mita war aiklabanka nani sut ba âpu daukbia bara tasba aiska ra kupia kumi lâka bri balbia (Lawana nani 46:8, 9). Witin bui tasba gabamintka nani âpu daukbia bara ai Kingka lâka bapi mangkbia. Gâd Kingka lâka ba gabamint kasakkira kum sa bara tasba aiska ra kupia kumi lâka bri balbia, baha piua ra kupia kumi lâka pliki asla takanka nani warkka ba danh nit apia kabia.

Trabilka ba: yuyaka bara sins lâka aitani âpu sa. Kupia kumi lâka pliki asla takanka nani ba wark tatakra nani bara lalah aitani âpu sa, baha mita karna munisa ai warkka pain daukaia dukiara. Baku sin witin nani ba plis karna nani ra wark takaia sa.

Baibil dîa smalkisa: “Wan Dawan Jisas Kraist Gâdka […] Kraist pruan wina buki ai mihta aihkika tani ra kasbrika purara yan iwan ba ra. Kraist lika kasbrika purara karnika bri nani ba sut purkara kau karna sa, lâ karnika alki nani ba, dawan taki nani ba, pura aimaki nani ba […] sut purkara sin.” (Epesus 1:17, 20, 21).

Gad karnika sut bri ba Jehova,b ai Kingka lâka karnika ba Jisas ra yan sa bara dîa nit ba sut sin yaban sa baha gabamintka tâ bribia dukiara (Daniel 7:13, 14c). Gâd ba Jisas ra yan sa karnika, sins lâka bara diara tânka kaikaia lâka ba sin. Baha dukia nani tasba gabamintka nani bara asla takanka nani bri ba wal kau purkara sa (Aiseya 11:2). Jisas ba insal karnakira nani sin ai lamara brisa (Param marikan 19:14). Baha mita trabil kumi sin âpu sa witin sip wapnika ra mangkras ba.

Jisas ba ai karnika bara Jehova dîa witin ra yan ba yus munbia naha war aiklabanka nani âpu daukbia dukiara. Ai kingka lâka mununhtara iwbia uplika nani ba âuyapah lâka bara rait aihwa kupia kumi lâka ba brin kabia (Aiseya 32:17, 18).

Trabilka ba: kuntri lâka nani ba. Sam taim kuntri lâka nani param apia ba mita kupia kumi lâka pliki asla takanka nani warkka dauki nani ra alki takaskisa. Baha mita aima kum kum upla nani ra sip kaina kahbras munisa bara witin nani dîa daukaia luki ba sin alki takaskisa.

Baibil dîa smalkisa: “Karnika sut yang ra aikan sa [Jisas ra], kasbrika purara bara tasba ra” (Matiu 28:18).

Gâd ba Jisas ra adarka bara karnika aiska sin yan tasba aiska ra kupia kumi lâka bri balbia dukiara (Jan 5:22). Jisas Kraist ba piu kumi ra sin kasak apia lâka ba daukbia apia bara aihka sin takbia apia (Aiseya 11:3-5). Baha mita Baibil ba wisa Jisas “kupia kumi lâka Kingka” sa bara ai Kingka lâka ba “kasakka lâka wapni lâka” ra bapi mangkan sa (Aiseya 9:6, 7).

Gâd Kingka lâka ba rait aihwa kupia kumi lâka bri balbia

Kupia kumi lâka pliki asla takanka nani ba kupia kumi lâka wiria kum bri balaia sip sa, baku sin war aiklabanka plis kum kum nani ra piu kunhku ra âpu daukaia. Sakuna rau munan lâka bara misbara lâka upla kupia bilara bri ba sip apu daukras sa.

“Kupia kumi lâka pliki asla takanka nani ba kupia kumi lâka sip bapi mangkras sa kan tasba ra kupia kumi lâka âpu sa ba mita”- Denis Jett, Tech kuntrika tâ uplika kum.

Gâd Kingka lâka ba lika rait aihwa kupia kumi lâka ba bapi mangkaia sip sa kan upla nani ra hilp munisa misbara lâka ai kupia ra bri ba sakaia. Tânka kum baku, Jisas tasba ra tauki kan piua ra ai bîla aisanka wal bara ai daukanka nani wal sin ai nina blablikra nani ra smalkan nahki kupia kumi lâka marikaia bara ai walka nani ra latwan kaikaia.

“Lilia pali sa kupia kumi lâka dadaukra nani ba” (Matiu 5:9).

“Uplikam ra wînam ra latwan kaikisma ba baku latwan kaikma” (Mark 12:29-31).

“Sordkam ba kli watlika ra dingks. Kan ani uplika nani sordka ni aiklabi ba, sim sordka wal prubia” (Matiu 26:52).

“Witin [Jisas] ra lahtubi kan ba ra, pana lahtuban kumi sin aisaras kata; pât nani yaban wahwi kan ba ra, pana witin mita saura munaia wiras kata” (1 Pita 2:23).

Jisas sin win Gâd kingka lâka uplika nani ba ai walka ra latwan kaikaia sa. Baibil ba param smalkisa ya ai walka ra misbara kaikisa kaka Gâd Kingka lâka mununhtara iwbia apia.

“Man nani pana pana walkam ra latwan kaikisma kaka, upla sut kaikbia man nani ba yang disaipilki nani sma” (Jan 13:34, 35).

“Ai muihni ra latwan kaikras ba lika upla âikra sa” (1 Jan 3:15).

“Gâd ra latwan kaiki uplika ba, ai muihni ra sin latwan kaikaia sa” (1 Jan 4:21).

Jehova Gâd tasba uplika sut ra paskan baha mita witin nu sa nahki tnatka ra kupia kumi lâka bapi mangkaia ba. Naha kupia kumi lâka pliki asla takanka nani ba dîa sip alki daukras ba Gâd Kingka lâka ba lika alki daukaia sip kabia.

a Nisan nani asla takanka ba naha bîla nani ba sin yus munisa: “kupia kumi lâka bapi mangkaia”, “kupia kumi lâka ra tâ baikaia” bara “kupia kumi lâka pliki warkka nani”.

b Gâd nina pali ba sika Jehova (Lawana Nani 83:18 TNM) “¿Quién es Jehová?” ulbanka ba aisi kaiks.

c Daniel 7:13, 14 ra “Upla luhpia waitna” wisa taim Jisas tânka marikisa (Matiu 25:31; 26:63, 64).

Naiwa piua ra sin Gâd Kingka lâka ba kupia kumi lâka bara asla lâka ba tâ baikisa

Kaina piua ra Gâd Kingka lâka ba tasba purara ai gabamintka bapbia taim tasba uplika nani sut ba asla lâka ra Gâd kupia kumi lâka ba smalkan kabia (Aiseya 2:4; 11:9). Sakuna naiwa ba Gâd Kingka lâka ba heven ra bapi mangkan sa bara kupia kumi lâka tâ baikisa kan upla milian pura milian nani ra asla lâka ra smalkisa.

¿Puede el amor vencer al odio? Lilkika ba kaiks bara kaikma nahki Baibil ba waitna wâl ra hilp munan ai kupia ra misbara lâka bri kan ba sakaia dukiara, ju nani wihki arab uplika nani pana pana mani ailal misbara kaiki kan ba.

Kainara waihla atia kan, nanara muihni bara pâna takan sa lilkika ba kaiks bara kaikma nahki Baibil smalkanka nani ba hilp munan upla âikra kum ra bara polis uplika kum ra ai kupia ra pana pana misbara lâka bri kan ba swisi si pana lâka pain kum pakaia.