¿Kristian kaia ba dîa tânka sa? | ¿Baibil dîa wisa?

Tasba aiska ra upla ailal ba kristian sa wisa. Ban sakuna ai daukanka nani ba wal upla wala nani ra saura munisa. Kum kum ba silp ai wîna ra lukisa, kasak apia lâka ba marikisa bara ai walka nani ra latwan kaikras. Wala nani ba ai maritka lâka ra kasak apia sa. Naha sut laki kaiki ba ra upla manis ba silp makabi walisa, kristian kaia ba dîa tânka sa.

Rait aihwa kristian kaia ba dîa tânka sa

Diara isi sa yawan kristian sa wiaia ba, kuna yawan kristian sa wiaia ba wal baman aitani apia sa. Baibil ba marikisa kristian kum kaia ba tânka sa, Jisas Kraist disaipilka kum kaia sa (Apastil Nani Sturka 11:26). Jisas ba naku smalkan: “Dîa mai wisna ba kat kasak kama kaka, man nani ba kasak yang disaipilki nani kama” (Jan 8:31). Upla kumi sin Jisas dîa aisan ba sut sitnika kat sip alki daukras sa. Ban sakuna kristian nani ba karna trai munisa Jisas dîa smalkan ba nina blikaia bara ai rayaka ra alki brih daukaia. Kaisa tânka kum kum laki kaikaia.

Kristian nani ba upla sut ra latwan kaikisa

Jisas dîa smalkan ba: “Naha lâ raya na, man nani ra maikisni: Pana pana walkam ra latwan kaiki kama. Yang bui man nani ra latwan mai kaikisna ba baku, pana pana walkam ra latwan kaiks. Man nani pana pana walkam ra latwan kaikisma kaka, upla sut kaikbia man nani ba yang disaipilki nani sma” (Jan 13:34, 35).

Jisas dîa daukan ba: Jisas ba kiamka bara iwanka natka sât sât bri uplika nani sut ra latwan kaikan. Siknis uplika nani ra rakan, plun dauki kan nani ra plun dakakan. Bara witin wilin kan upla sut dukiara ai rayaka ba yabaia (Matiu 14:14-21; 20:28).

Kristian nani dîa dauki ba: Ai daukanka nani wal marikisa witin nani ba upla nani ra latwan kaiki ba. Kupia pihni lâka mariki banhwisa, upla mawan bâk saki kulkras sa bara wala nani ra padin muni banhwisa. Baku sin nit bri nani ra hilpka lâka yabisa bara wilinkira banhwisa upla wala nani dukiara sakripais nani daukaia (1 Jan 3:16).

Kristian nani ba diara sut ra wapni banhwisa

Jisas dîa smalkan ba: “Yang sika [...] kasak tânka ba.” (Jan 14:6).

Jisas dîa daukan ba: Jisas ba dîa aisi kan bara dîa dauki kan ba wal wapni lâka mariki kan. Jisas ba upla nani ra taibi munras kan bara ai aisanka nani sut ba param bara kasak kan, baku upla nani ba lukanka mistik nani briras kan. Witin ra smasmalkra kasakkira kum baku kakaira kan, kan witin ba diara kasak ba baman aisi kan trabil nani ra dimbia kra sin (Matiu 22:16; 26:63-67).

Kristian nani dîa dauki ba: Witin nani ba kunin aisaras bara implikras. Lal mana ba aibapi sa, wark tatakra banhwisa, ai warkka pliska ra wark takaia awarka ba rispik munisa (Roman 13:5-7; Epesus 4:28). Upla nani ra kunin muni lalah implikras, skul watla ra examen nani dauki piuara kasak banhwisa bara wark kum briaia dukiara wauhkataya dingkisa piuara ai tânka ba dukiara kunin aisaras sa (Hibru Nani 13:18).

Kristian nani ba upla sut ra kupia yamni lâka marikisa

Jisas dîa smalkan ba: “Warkkam bara karbankam mita mai swapkan nani ba, sut yang ra bal bara yang mita maikamna ris briaia. Twilkaika puramra sunisna ba man nani bris, bara yang wina lan taks, kan yang lika praut âpu, kupi sin bawikira sna; baku lika man nani riskam brima. Kan twilkaiki ba swap sa, bara karbanki maikisna ba sin ingni sa” (Matiu 11:28-30).

Jisas dîa daukan ba: Jisas ba kupia yamni lâka mariki kan, wala nani ra pain ai dara walbia yabi kan. Tuktan nani ra yamni muni kan. Sari ai dara wali kan nani ra maisa nihki kan, bara sut ra kulkanka yabi kan (Mark 10:13-15; Luk 9:11).

Kristian nani dîa dauki ba: Wala nani wal aisi sa taim kupia yamni lâka marikisa, bîla karna nani yus munras bara saura sin munras (Epesus 4:29, 31, 32). Wala nani ra lukisa bara hilpka lâka yabaia dukiara natka nani pliki sa (Galesha 6:10).

Kristian nani ba ai maritka lâka ra kasak banhwisa

Jisas dîa smalkan ba: “Gâd mita asla prakan ba, upla mita dakbi sakaia sip apia pali sa” (Mark 10:9).

Jisas dîa daukan ba: Jisas ba marit takras kan, ban sakuna marit nani ra kupia kraukan ai maritka lâka ra pana pana kasak kaia sa (Matiu 19:9). Baku sin param aisan dîa sât dukia nani ba ai maritka lâka ra sauhkaia sip sa (Matiu 5:28).

Kristian nani dîa dauki ba: Karna trai munisa ai maritka lâka ra rispik lâka marikras dukia nani ba daukaia apia (Hibru Nani 13:4). Maya waitna bara maya mairin ba pana pana latwan lâka bara rispik lâka mariki banhwisa (Epesus 5:28, 33).