Lisin 18
God panika bangwi kap bankaiara!
Pâna dauki ban brikaia ba karna palisa. Yawan wan tabaikiba God panika takaia dukiara bara ban witin panika kaia ba yawan ra blisin nani ailal brih balbia. Jisus win witinra luki nani bara: “Rait ba pri mai sakbia” (Jan 8:32). Dia wiaia want kan?
Yawan sipsa pri takan laka liliaka ba nanara briaia. Yawan sipsa pri takaia kunin smalkanka nani ba wina bara Sitan kunin nani yakabi lakan ba wina. Yawan sipsa pritakaia sin upla milian nani Jehova ra kaikras rayakara bila kaikanka luha ni bangki ba wina (Roman nanira 8:22). God panika nani ba “prura sibrin ka” albika nani kat sin apia.—Hibru nanira 2:14, 15.
Yawan sip kabia pri takan laka liliaka ba briaia God tasbaia raya bara. Nahki lilia laka aihka pali brih bangbia yawan wan kainara! Tasba na Paradais kum kabia taim, war nani apu kabia, siknis nani, la pura luanka nani sin. Umpira laka bara plun wauhwan sin apu kabia. Almuk takaia laka bara prura ba wina sin pri wan sakbia. Baku sin sibrin laka ba wina, taibi munan laka wina bara kasak apia laka wina sin. God dukiara Baibil ba wisa: “Mihtan ba kuaki bara rayakira sut brinka ba daskisma.”—Salmo 145:16.
God panika nani ba bankaiara iwbia. Raya bankaia ba God wina prisant kum painkira yabia witin ai panika laka kaia pliki bangwi bara (Roman nanira 6:23). Luki kaiks piu wiria baman manra dia tanka kaia ba bankaiara iwaia laka ba!
Yawan diara nani ailal daukaia piua brih bangwi kabia. Bankra wan brinka kabia lawana kanbaika dukia nani satka kum puli lan takaia. Lilka nani pint wal paskaia apia kaka karpinta warkka takaia. Bankra daiwan nani rayaka stadi takaia apia kaka dus nani dukiara. Bankra wan brinka kabia plis wala bara kontri wala nani kaikaia ai uplika nani sin. Kan rayaka tnata apu yawan bribia ba mita, sip kabia naha dukia nani sut na daukaia!
Yawan piu brih bangwi kabia pâna nani ailal daukaia dukiara. Kan yawan bankaiara iwbia ba mita, God panika wala nani ailalra kakaira takaia sipsa. Yawan kakaira takbia ai daukanka painkira nani ba bara diara nani dauki lan takan nani ba sin, bara yawan witin nani aipanika taki bangbia. Yawan latwan kaiki bangbia, bara witin nani yawanra latwan wan kaikbia. (1 Korint nanira 13:8) Kan yawan rayaka tnata apu bribia ba mita, yawan Tasba aiska uplika nani wal wan panika takbia! Kau pain ba, Jehova wal wan panika laka ba kau karna taki kabia piu nani ailal lui bara. Bankaiara God panika bangwi kap!