Последни денови — на што?

АКО некој рече дека „живееме во последните денови“, како би го разбрал тоа?

Многу одамна, во Библијата биле спомнати изразите „последните денови“ и „времето на крајот“ (2. Тимотеј 3:1; Даниел 12:4). Пред повеќе од 2.500 години, пророкот Даниел добил виденија за светските сили и за воените судири кои ќе постојат меѓу нив сѐ до „времето на крајот“. Му било кажано и дека овие виденија ќе можат да се разберат дури тогаш (Даниел 8:17, 19; 11:35, 40; 12:9). Даниел го запишал и следново: „Во деновите на тие цареви, небесниот Бог ќе подигне царство, кое нема никогаш да пропадне. И тоа царство нема да премине на некој друг народ. Тоа ќе ги сотре и ќе ги уништи сите други царства, а самото ќе стои довека“ (Даниел 2:44).

Исус Христос го спомнал „крајот“ кога одговорил на прашањето во врска со „знакот на [неговата] присутност и на свршетокот на овој поредок“ (Матеј 24:3-42). Очигледно, и Даниел и Исус укажувале на некаков крај — на драстична промена што ќе се одрази врз сите луѓе, сеедно во кое време живееле. Даниел пишувал за крајот на сите човечки влади, а Исус зборувал за „свршетокот на овој поредок“.

Дали ова има некаква врска со тебе? Дефинитивно — и тоа не само со тебе туку и со сите луѓе. Сепак, многумина не го сфаќаат тоа сериозно. Библијата прорекла: „Во последните денови ќе се појават потсмевачи, кои ќе се потсмеваат, ќе се водат според своите желби и ќе велат: ‚Каде е таа негова ветена присутност? Откако умреа нашите прататковци, сѐ си стои како што било од почетокот на создавањето‘“ (2. Петрово 3:3, 4). Некои сметаат дека она што се случува денес не е ништо ново и дека животот секогаш ќе си биде ваков каков што е сега.

Постојат ли некакви докази дека навистина живееме во периодот што Библијата го нарекува последни денови? Да видиме.