За оние што го сакаат Јехова „не постои камен за спрепнување“

1. Како една атлетичарка покажала дека не се откажува лесно?

УШТЕ како тинејџерка, Мери Декер станала врвна атлетичарка. На Летните олимписки игри во 1984 год., таа била најголем фаворит за златен медал во трката на 3.000 метри. Но, не успеала да стигне до целта. За време на трката, се сопнала од ногата на една друга натпреварувачка и паднала. Ја изнеле од тркачката патека повредена и во солзи. Но, Мери не се откажала лесно. За помалку од една година, повторно била на патеката, и во 1985 год. поставила нов светски рекорд во трката на 1.600 метри.

2. Во каква трка учествуваме како христијани, и како треба да ја трчаме?

² Како христијани, и ние учествуваме во една симболична трка. Не смееме да дозволиме ништо да нѐ спречи да ја истрчаме оваа трка до крај. Но, тоа не е трка на кратки патеки во која натпреварувачот мора да трча колку што е можно побрзо за да победи. А не е ни обично џогирање, кога човек трча бавно, и одвреме-навреме застанува да се одмори. Напротив, ние учествуваме во симболична маратонска трка и мора да бидеме издржливи за да стигнеме до целта. Апостол Павле користел споредба за еден тркач кога им пишал на христијаните што живееле во Коринт, град кој бил познат по атлетските натпревари. Тој им рекол: „Не знаете ли дека во една трка сите тркачи трчаат, но само еден добива награда? Затоа трчајте така за да ја освоите“ (1. Кор. 9:24).

3. Кој може да победи во трката за вечен живот?

³ Библијата вели дека треба да трчаме во оваа симболична трка. (Прочитај 1. Коринќаните 9:25-27.) Наградата е вечен живот на небото за помазаните христијани и вечен живот на Земјата за другите учесници. За разлика од повеќето атлетски натпревари, секој што учествува во оваа трка и што ќе истрае до крајот ќе победи и ќе добие награда (Мат. 24:13). Само оние што нема да трчаат според правилата или нема да стигнат до целта ќе останат без награда. Освен тоа, ова е единствената трка во која натпреварувачите можат да освојат вечен живот.

4. Зошто не е лесно да трчаме во трката за вечен живот?

⁴ Не е лесно да трчаме во трката за вечен живот. За да ја истрчаме до крај, треба да бидеме самодисциплинирани и решителни. Само еден човек — Исус Христос — успеал да стигне до целта без воопшто да се спрепне, односно да згреши. Но, неговиот ученик Јаков напишал дека сите Христови следбеници ‚честопати грешат‘ (Јак. 3:2). Нашата сопствена несовршеност, како и несовршеноста на другите ни ја отежнуваат трката. Понекогаш некој од нас може да се сопне, да изгуби рамнотежа, па дури и да падне. Некои доживеале толку тежок пад што не можеле да се подигнат сами туку им била неопходна помош за да станат и да продолжат да трчаат кон целта. Затоа, не треба да се изненадиме ако и нам понекогаш ни се случи да се спрепнеме или да паднеме (1. Цар. 8:46).

ДУРИ И ДА СЕ СПРЕПНЕМЕ, ДА ОСТАНЕМЕ ВО ТРКАТА

5, 6. а) Во која смисла за христијаните „не постои камен за спрепнување“? Што може да им помогне ‚да станат‘ ако се спрепнат или паднат? б) Зошто некои не застануваат на нозе откако ќе се спрепнат?

⁵ Она што го правиме откако ќе се спрепнеме или ќе паднеме во духовен поглед покажува какви сме навистина однатре. Некои што се спрепнуваат или паѓаат, се покајуваат за она што го сториле и продолжуваат да му служат на Бог. Но, други не се каат за грешките. Во Изреки 24:16 пишува: „Ако праведникот падне и седум пати, пак ќе стане, а злиот ќе пропадне во неволјата“.

⁶ Дури и да се спрепнеме или да паднеме, ние можеме да застанеме на нозе. Сѐ додека имаме доверба во Јехова, тој е спремен да ни помага кога ќе се соочиме со проблеми или ќе згрешиме. Бог ќе ни помогне ‚да станеме‘ бидејќи знае дека го сакаме. Колку утешна мисла! Но, злите луѓе не сакаат ‚да станат‘. Тие не бараат помош од Божјиот свет дух и од неговиот народ или, пак, ја одбиваат кога ќе им се даде. За разлика од нив, за оние ‚кои го сакаат Јеховиниот закон‘ не постои камен за спрепнување кој би можел потполно да ги исфрли од трката за живот. (Прочитај Псалм 119:165.)

7, 8. Како е можно некој да ‚падне‘, а сепак да остане праведен во Божји очи?

⁷ Понекогаш некој може да згреши поради одредена слабост. Можеби му се случува и секогаш одново да ја прави истата грешка. Сепак, Јехова го смета за праведен ако секојпат ‚станува‘, односно ако искрено се кае и ако и понатаму дава сѐ од себе верно да му служи. Бог ги сметал Израелците за праведни сѐ додека тие се каеле за своите грешки (Иса. 41:9, 10). И целта на Изреки 24:16, кој беше цитиран погоре, не е да нагласи дека правиме грешки, туку дека можеме да се исправиме со помошта од нашиот милостив Бог. (Прочитај Исаија 55:7.) Јехова и Исус Христос имаат доверба во нас, и нѐ охрабруваат да станеме (Пс. 86:5; Јован 5:19).

⁸ Дури и ако еден маратонец се спрепне или падне, можеби ќе има време да ја заврши трката доколку веднаш стане и продолжи да трча. Ние не го знаеме ‚денот и часот‘ кога ќе заврши нашата трка за вечен живот (Мат. 24:36). Сепак, ако правиме сѐ што можеме за да не се спрепнеме, ќе ни биде полесно да продолжиме да трчаме и да стигнеме до целта. Што ќе ни помогне да не се спрепнуваме?

ШТО БИ МОЖЕЛО ДА НЀ СПРЕПНЕ

9. Кои пет работи ќе ги разгледаме?

⁹ Ќе разгледаме пет работи што би можеле да нѐ спрепнат — нашите слабости, желбите на телото, некоја неправда во собранието, неволја или прогонство и несовршеностите на другите. Ако и тебе ти се случи да се спрепнеш, сети се дека Јехова е многу стрплив и нема брзо да крене раце од тебе.

10, 11. Со каква слабост се борел Давид?

¹⁰ Нашите слабости можат да се споредат со камења што се наоѓаат на маратонската патека. Од животот на цар Давид и на апостол Петар можеме да научиме нешто во врска со две такви слабости — недостиг на самосовладување и страв од човек.

¹¹ Во некои ситуации, Давид не покажал самосовладување. Поради оваа слабост, тој направил грев со Витсавеа. Во една друга прилика, за малку ќе го нападнел Навал, кој го навредувал него и неговите луѓе. Но, иако понекогаш постапувал избрзано и непромислено, Давид никогаш не престанал да се труди да му угоди на Јехова. Откако ги направил тие грешки, тој прифатил помош од другите и успеал да застане на нозе (1. Сам. 25:5-13, 32, 33; 2. Сам. 12:1-13).

12. Што му помогнало на Петар да остане во трката за живот иако направил грешки?

¹² Поради тоа што се плашел што ќе мислат другите за него, Петар направил неколку сериозни грешки. И покрај тоа, им останал верен на Јехова и на Исус. На пример, тој одрекол пред другите дека го познава Исус, и тоа не еднаш туку трипати (Лука 22:54-62). Подоцна, во една друга прилика, реагирал пристрасно и се однесувал со необрежаните еврејски христијани како да се помалку важни од еврејските христијани. Но, меѓу Божјиот народ нема место за пристрасност. Ставот на Петар бил погрешен и можел лошо да влијае врз другите соверници. Затоа, апостол Павле му дал строг совет пред сите (Гал. 2:11-14). Дали Петар се навредил поради тоа и престанал да трча во трката за живот? Не. Тој сериозно размислил за советот на Павле, го послушал и останал во трката.

13. Како би можеле здравствените проблеми да ни бидат камен за спрепнување?

¹³ Понекогаш и здравствените проблеми можат да ни бидат камен за спрепнување. Поради слабото здравје би можеле да забавиме во трката и да се умориме. На пример, една сестра од Јапонија тешко се разболела 17 години откако се крстила. Толку се преокупирала со своето здравје што ослабнала во духовен поглед. Со текот на времето станала неактивна. Кога ја посетиле двајца старешини, многу се охрабрила од нивните љубезни зборови и почнала повторно да доаѓа на состаноци. Таа вели: „Браќата и сестрите толку срдечно ме поздравија што ме трогнаа до солзи“. Сега оваа наша сестра е повторно во трката.

14, 15. Што треба да преземеме веднаш штом ќе ни се појават погрешни желби? Наведи пример.

¹⁴ Мнозина се спрепнале поради желбите на телото. Ако нашите желби нѐ тераат да постапиме погрешно, треба веднаш да преземеме нешто за да останеме умствено, морално и духовно чисти. Исус нѐ советувал да го отфрлиме сето она што би можело да нѐ спрепне, односно да нѐ наведе на грев, макар тоа да е нашето око или нашата рака. Зарем ова не значи дека треба да ги отфрлиме и сите неморални мисли или постапки кои би можеле да нѐ наведат да отпаднеме од трката за живот? (Прочитај Матеј 5:29, 30.)

¹⁵ Еден брат, кој пораснал во семејство на Сведоци, напишал дека цел живот се бори со хомосексуални желби. Тој вели дека секогаш се чувствувал поинаков од другите и му било тешко да се вклопи. Кога имал 20 години, веќе служел како општ пионер и бил слуга-помошник во собранието. Но, за жал доживеал тежок пад во христијанската трка — направил сериозен грев. Поради тоа бил укорен и ја добил потребната помош од старешините. Што му дало сила да застане на нозе и да не се откаже од христијанската трка? Тој продолжил да се моли, да ја проучува Библијата и да им помага на другите. Иако ова се случило многу одамна, овој брат вели: „Понекогаш сѐ уште ми доаѓаат такви чувства, но не им дозволувам да ме надвладеат. Од лично искуство знам дека Јехова нема да дозволи да бидеме искушани повеќе отколку што може да издржиме. Сигурен сум дека Бог има доверба дека ќе успеам“. Тој додава: „Знам дека вреди да ги истрпам сите маки денес за да ги добијам благословите во новиот свет. Сакам да бидам таму! Дотогаш, ќе продолжам да се борам“. Овој брат е решен да остане во трката.

16, 17. а) Што му помогнало на еден брат кој сметал дека е жртва на неправда? б) Кон кого треба да го насочиме својот поглед за да не се спрепнеме?

¹⁶ Некоја неправда во собранието исто така би можела да ни биде камен за спрепнување. Во Франција, еден брат кој порано служел како старешина, бил уверен дека е жртва на неправда. Толку бил огорчен што престанал да оди на состаноци и во служба. Двајца старешини го посетиле и сочувствително го ислушале додека им го изнесувал своето гледиште за она што се случило. Потоа го охрабриле да има доверба во Јехова, и го потсетиле дека најважно од сѐ е да се трудиме да му угодиме на Бог. Тој го послушал нивниот совет, и наскоро повторно се вратил во христијанската трка.

¹⁷ Сите христијани треба да го насочат својот поглед кон Главата на собранието — Исус Христос — а не кон несовршените луѓе. Очите на Исус се „како огнен пламен“. Тоа значи дека гледа сѐ и знае што се случува во собранието далеку подобро од нас (Отк. 1:13-16). На пример, понекогаш ни се чини дека има некоја неправда, но, всушност, можеби ние не сме разбрале нешто или, пак, погрешно сме го протолкувале. Исус ги решава проблемите во собранието во вистинско време и на вистински начин. Затоа, никогаш не треба да дозволиме да нѐ спрепнат постапките или одлуките на некој наш соверник.

18. Како можеме да ги поднесеме неволјите и испитите?

¹⁸ Две други работи од кои би можеле да се спрепнеме се неволјите или прогонството и несовршеностите на другите во собранието. Во својата споредба за сејачот, Исус рекол дека некои ќе се поколебаат, односно ќе се спрепнат кога ќе доживеат „неволја или прогонство“ поради речта. Сеедно дали доаѓа од страна на семејството, соседите или властите, противењето може да има особено лошо влијание врз оној кој „нема корен во себе“, односно кој е слаб во верата (Мат. 13:21). Но, ако сме решени да останеме блиски со Јехова, вистината за Царството ќе ни помогне длабоко да се вкорениме во верата. Затоа, кога ќе те притиснат неволји, продолжи да се молиш и длабоко да размислуваш за она што е „достојно за фалба“. (Прочитај Филипјаните 4:6-9.) Јехова ќе ни даде сила да ги поднесеме испитите и да не дозволиме неволјите да нѐ спрепнат.

19. Што ќе ни помогне да не се спрепнеме од несовршеностите на другите?

¹⁹ За жал, низ годините некои дозволиле несовршеностите на другите да ги исфрлат од трката. На пример, некој може да се спрепне затоа што другите прават работи кои неговата совест не му ги дозволува (1. Кор. 8:12, 13). Ако некој прави нешто кое ние сметаме дека не е во ред, дали толку ќе се вознемириме што ќе ја напуштиме вистината? Библијата ги советува христијаните да не судат, да им простуваат на другите и да не инсистираат на своите права (Лука 6:37). Ако се вознемируваш поради несовршеностите на браќата, прашај се: ‚Дали им судам на другите според мои мерила? Дали ќе ја напуштам вистината само затоа што моите браќа се несовршени?‘ Ако го сакаме Јехова, нема да дозволиме ниту една постапка на другите да нѐ спречи да стигнеме до целта.

НЕ ДОЗВОЛУВАЈ НИШТО ДА ТЕ СПРЕЧИ ДА ЈА ИСТРЧАШ ТРКАТА ДО КРАЈ

20, 21. Што си решен да правиш во трката за живот?

²⁰ Дали си решен да ‚ја истрчаш трката до крај‘? (2. Тим. 4:7, 8). Ако да, тогаш мораш да проучуваш. Користи ја Библијата и нашите публикации за да истражуваш, да размислуваш и да ги препознаеш работите кои би можеле да те спрепнат. Сесрдно моли го Јехова да ти дава свет дух за да се зајакнеш. Не заборавај, дури и ако понекогаш се спрепнеме и паднеме во трката за живот, сепак може да продолжиме да трчаме и да стигнеме до целта. Можеме дури и да учиме од нашите грешки, и уште повеќе да си ја зајакнеме верата.

²¹ Библијата покажува дека, ако сакаме да ја добиеме наградата — вечен живот — мора да бидеме активни учесници во трката. Тоа не е исто како да седиме во автобус и да чекаме тој да нѐ однесе до целта. Секој од нас мора да трча до крај. Додека трчаме, ‚големиот мир‘ што ни го дава Јехова ќе ни влее додатна сила (Пс. 119:165). Може да бидеме сигурни дека Бог ќе продолжи да ни помага денес, и дека ќе излее трајни благослови врз сите оние што ќе ја завршат трката (Јак. 1:12).