Брачниот живот — како да се направи посреќен

Што може да го направи бракот успешен?

Чие водство може да доведе до брачна среќа?

Како може да бидат решени комуникациските проблеми?

ПОД влијание на книгите што ги прочитале во врска со ослободувањето на жените, Јасухиро и неговата девојка, Кајоко, почнале да живеат заедно, мислејќи дека ќе можат во секое време да ја раскинат својата врска. Дури откако Кајоко забременила, тие го озакониле својот брак. Јасухиро, меѓутоа, и понатаму се сомневал во семејното уредување. Кога се појавиле финансиски проблеми и чувството дека меѓусебно не си одговараат, разводот бил неизбежен.

Некое време после разводот, секој за себе, и Јасухиро и Кајоко почнале да ја проучуваат Библијата со Јеховините сведоци. После извесно време, секој дознал за тоа и можел да ги забележи промените во животот на другиот, направени преку применување на библиските начела. Се одлучиле повторно да се земат. Сега, со нивното богобојазливо гледиште за бракот, спремни се да прават жртви за да ги решаваат проблемите.

Што го направило нивниот повторен брак успешен? Нивното почитување спрема Основачот на бракот (1. Мојсеева 2:18-24). Водството што го дава најискусниот брачен советник, Јехова Бог, е клучот кој ја отвора вратата кон брачната среќа.

Клуч за брачната среќа

Брачни проблеми може да се решаваат и да се спасуваат бракови кога обата брачни партнери го применуваат она што го рекол Исус Христос: „,Возљуби Го Господа, својот Бог, со сето свое срце, и со сета своја душа, и со сиот свој разум; тоа е прва и најголема заповед; а втората е слична на неа: Возљуби го својот ближен како себеси!‘“ (Матеј 22:37-39). Тука лежи клучот за брачната среќа. И сопругот и сопругата мораат повеќе да го љубат Јехова отколку самите себеси или еден со друг. Таа врска може да се спореди со трикратно јаже. „Ако некој го надвие едниот, тоа двајца ќе го навасаат, и јажето, трипати усукано, нема лесно да се скине“ (Проповедник 4:12).

Бидејќи Божјата љубов значи држење на неговите заповеди, сопругот и сопругата мораат неговите закони и начела за човечко однесување да ги ставаат на прво место во нивниот живот. Ако тоа го чинат, создаваат трикратно јаже чија најцврста нишка е нивната љубов кон Јехова. А „Неговите заповеди не се тешки“, стои во 1. Јованово 5:3.

Тоа доведува бракот да се смета за трајно уредување (Малахија 2:16, НС). Со таков еден темел во нивниот брак, двојката ќе биде поттикната да ги решава брачните проблеми, а не да ги заобиколува со развод.

Покажување љубов кон најближниот

За да имате трајна врска со својот партнер, морате да ја негувате вашата љубов спрема него или неа, вашиот најближен. Таа љубов мора да биде несебична. Забележете како Библијата го подвлекува тоа начело: „Имајќи една и иста љубов, и бидете еднодушни и едномислени; не правете ништо од љубов кон препирање или за празна слава, но од понизност сметајте се еден друг за погорен од себе си! Не грижете се секој само за себе, туку и за другите!“ (Филипјаните 2:2-4).

Вистина, поради зајадливоста или поради егоизмот во овој себичен свет тешко е да не се направи ништо. Кога вашиот партнер не ја презема иницијативата да покажува љубов, несебичноста е уште потешка; но ако во понизност на мислите го сметате партнерот за поголем од вас, ќе ви биде полесно да мислите на неговите интереси. Библијата нѐ советува да го имаме мисловниот став на Исус Христос. Тој бил моќен дух, но ‚зел обличје на слуга‘ и станал човек. Освен тоа, кога бил на Земјата тој „се смири [се понизи, ДК], откако стана послушен дури до самата смрт“, од која имале корист дури и луѓето кои не му изразиле добредојде (Филипјаните 2:5-8). Со покажувањето на ваквиот став, Исус ги придобил срцата на многу противници, а бидејќи го имитирале Исус, неговите следбеници го сториле истото (Дела на св. апостоли 6:7; 9:1, 2, 17, 18). Истото може и вам да ви се случи. Ако на вашиот партнер гледате како на погорен од себе и ако се грижите за личните интереси, можете постепено да го придобивате неговото или нејзиното срце.

Меѓутоа, да се смета партнерот за погорен од себе не значи дека сопругата мора пасивно да се подложи на тиранското однесување на сопругот, како што беше случај во источните земји. Обајцата, и сопругот и сопругата, мораат да го сметаат другиот за погорен така што секој ќе биде спремен да се жртвува за другиот. Кога двојката разговара за своите проблеми со понизност на мислите, кога покажува несебичен интерес за другиот и кога следи божествени совети, тогаш се наоѓа на добар пат да ги реши своите проблеми. Сега да разгледаме некои од Божјите совети.

,Брачното легло да е чисто‘

Јехова, кој го основал брачното уредување, има точна претстава за исправниот однос помеѓу мажот и неговата жена. Кога бил запрашан дали е законски мажот да се разведе од својата жена од било каква причина, Исус Христос рекол: „Бог што составил, човек да не разделува“. Тој укажал дека има само една законска основа за развод и за повторно стапување во брак кога понатаму рекол: „Јас, пак, ви велам: оној што ќе ја остави својата жена, освен поради прељуба, и се ожени со друга, тој прави прељуба; и оној, што ќе се ожени со напуштена, прељубодејствува“ (Матеј 19:3-9).

Вонбрачните сексуални односи, дури и да се вршат во името на љубовта, воопшто не се одлика на љубовта, за обете страни. Еден човек во средна Јапонија имал љубовни афери со повеќе жени надвор од бракот. Жена му почнала да се сомнева и била разочарана. Нивниот брак се наоѓал во криза. Потоа дошол денот кога една од неговите љубовници му кажала дека нивната врска ќе ја соопшти на жена му и барала тој да се ожени со неа. „Таквите врски никого не усреќуваат“, се сеќава тој со каење. Се извлекол од таа кал дури откако им нанел штета на сите што биле вклучени во тоа. Библиското мерило е јасно во врска со ова. „Бракот на сите треба да е чесен, и брачното легло — чисто; а блудниците и прељубниците ќе ги суди Бог“ (Евреите 13:4). Со придржувањето на оваа заповед се избегнуваат сексуално преносливите болести, брачните стресови и стресот поради тајна љубовна врска.

Мажи, љубете ги и ценете ги своите жени

Начелото на поглаварство во рамките на семејството исто така го поставил Бог. „Вие, жените, покорувајте им се на мажите свои, како на Господа, зашто мажот е глава на жената, како што е и Христос глава на Црквата“, стои во Ефесјаните 5:22, 23. Не е лесно да се примени овој совет. „За мене тоа беше огромен предизвик“, признава Шоко, која го присвојувала правото на нејзиниот сопруг да донесува конечни одлуки. Таа мислела дека човек треба да си купи куќа кога ќе стигне во доцните 20-ти години и го натерала својот сопруг да купи една која таа веќе ја пронашла. Но, откако ги научила библиските начела, почнала својот сопруг да го гледа со поинакви очи. Она што изгледало како пасивен и немажествен карактер, набљудувано од исправна перспектива, бил остроумен, понизен и кроток карактер.

Ова начело бара сопрузите да бидат свесни дека се наоѓаат под повисокиот авторитет на Христос Исус (1. Коринтјаните 11:3). Бидејќи се наоѓа под Христовиот авторитет, сопругот треба да ја љуби и чува својата сопруга на истиот начин како шо Исус ги љуби своите следбеници (Ефесјаните 5:28-30). Според тоа, христијанскиот сопруг грижливо ќе ги земе предвид чувствата, желбите и границите на неговата жена пред да донесува одлуки.

„Зачинет со сол“

Хисако имала проблеми да комуницира со нејзиниот сопруг. Секогаш кога се обидувала да разговара со него, тој го избегнувал разговорот и велел: „Прави како што сакаш“. Хисако се присеќава: „Мислам дека причината за нашиот проблем беше недостаток на нежност од моја страна. Можеби ќе беше подобро да зборував со побавно темпо“. Денес, таа и нејзиниот сопруг можат да разговараат за сѐ со насмевки на лицата. Промената дошла откако Хисако го применила следниот совет: „Зборот ваш секогаш да биде благодатен, зачинет со сол, за да знаете како треба на секого да му одговарате!“ (Колосјаните 4:6). Како што храната зачинета со сол е повкусна, добро промислените работи изговорени на милослив начин полесно се прифаќаат (Соломонови изреки 15:1). Всушност, брачната расправија често може да се спречи само ако се биде обѕирен во начинот на зборувањето.

Да, љубовта кон Јехова Бог и почитувањето на неговите начела навистина многу помагаат. Љубовта спрема Јехова мотивира на вашиот брак да гледате како на трајна врска и помага да бидете одлучни да го зачувате. Бог дал здрави упатства за водство кои ќе ви помогнат да се справите со сите брачни неслоги и да ги решавате вашите проблеми без разлика колку тие можеби изгледаат огромни. Не, во повеќето случаи разводот не е врата кон посреќен живот, туку применувањето на библиските начела. Таа врата можете да ја отворите ако развивате љубов спрема Јехова. Зошто не научите повеќе за неговиот совет од најдоверливиот брачен советник, Библијата?

[Рамка на страница 9]

Кога разводот доаѓа во обѕир

ИАКО Библијата дозволува развод и повторно стапување во брак заради блуд, прељубата автоматски не го прекинува односот помеѓу мажот и жената. Недолжниот сопружник може да избере дали ќе се разведе или не (Матеј 19:9).

Јасуко била соочена со таа одлука. Нејзиниот сопруг живеел со неговата љубовница. Мајката на сопругот ја обвинила Јасуко и рекла: „Ти си крива што син ми вака се однесува“. Јасуко постојано плачела. Многу луѓе ѝ давале совети, но никој не ја осудувал врската на нејзиниот сопруг. Потоа, мајка ѝ, која почнала да ја проучува Библијата, ѝ рекла: „Во Библијата јасно стои дека прељубата е неисправна“ (1. Коринтјаните 6:9). На Јасуко многу ѝ олеснило кога дознала дека во денешниов свет сѐ уште постои начело за добро и зло.

Сега Јасуко стоела пред избор. Иако помислувала да се разведе од својот маж, по проучувањето на Библијата со Јеховините сведоци увидела дека и таа не била без никаква вина. Затоа одлучила да провери дали библиските начела можат да помогнат во решавањето на нејзините проблеми. Почнала да ги применува (Ефесјаните 5:21-23). „Не беше лесно“, се присеќава таа. „Одново и одново доживував пад во старата состојба. Многу пати на Јехова му се молев со солзи“. Додека таа се менувала, постепено се менувал и нејзиниот сопруг. Околу пет години подоцна, сопругот ги прекинал сите односи со неговата љубовница. Јасуко заклучува: „Уверена сум дека послушноста кон Божјата реч е изразито корисна“.

[Рамка на страница 11]

Сексуалната инкомпатибилност и разводот

МНОГУ двојки ја наведуваат сексуалната инкомпатибилност како причина за развод. Укажувајќи каде лежи проблемот, една книга која го разгледува денешното променливо семејно уредување, со наслов Sekkushuaritii to Kazoku (Сексуалноста и семејството), наведува: „Моногамното брачно уредување и еротоманските сексуални информации денес не одат рака под рака. Поплавата од сексуални информации го искривува брачниот ерос и ја подрива природната наклоност. Не само тргувањето со сексот, туку и порнографските видеокасети и комичните книги кои ги насликуваат женските тела како предмети за употреба ги изопачуваат сетилата и срцето на човекот. На тој начин, сопругите се присилувани [од нивните мажи] на сексуални односи слични на силување, а одбиените мажи стануваат импотентни“.

Неморалните публикации, видеофилмови и ТВ програми прикажуваат извртена слика за сексуалните односи. Тие не го прикажуваат она што го сочинува вистинското задоволство на бракот. Ја уништуваат и довербата којашто мажот и жената мораат да ја развиваат за да имаат успешен брак. Списанието Psychology Today наведува: „Довербата ви овозможува да му ги откриете најдлабоките чувства и стравови на својот партнер, знаејќи дека со нив ќе се постапува грижливо. Иако љубовта или сексуалната возбуденост може со текот на времето да расте и да опаѓа, во идеални услови, довербата е константа“.

Сексуалните односи не се темелот на успешниот брачен живот. Една сопруга која поминала низ тешки брачни проблеми, вели: „Она што најмногу ме охрабри беа зборовите во книгата Направи го среќен семејниот живот: ‚Во поширока смисла, ако сите други односи во бракот се добри, ако има љубов, почитување, добра комуникација и разбирање, тогаш сексуалните односи ретко ќе бидат проблем‘“.a

Вистински обединувачки елемент помеѓу сопружниците не се сексуалните односи туку љубовта. Сексуалните односи без љубов се безвредни, но љубовта може да постои и без секс. Ако една брачна двојка ги стави сексуалните односи на своето место, т.е. ако тие не се центар на нивниот живот, тогаш таа може да се радува на своето партнерство и да го реши проблемот на сексуална инкомпатибилност.

[Фуснота]

[Слика на страница 10]

Почитувањето на библиските начела им помага на брачните двојки отворено да комуницираат