Ослободување од невработеноста — како и кога?

КАКО својот Творец, и човекот може да доживее радост во работата, која со право е дефинирана како „дар Божји“ (Проповедник 3:12, 13; Јован 5:17). Една интересна работа може да ни донесе среќа и да нѐ направи да се чувствуваме корисни и сакани. Тешко дека некој сака да ја изгуби работата, без оглед на тоа колку малку ужива во неа. Освен што гарантира плата, платеното вработување дава среденост, цел и чувство на идентитет во животот. Не е никаква случајност тоа што обично „невработените сакаат работа најмногу од сѐ друго“.

Во потрага по работа

Како што веќе видовме, состојбата на пазарот на работната сила е многу сложена. Како резултат на тоа, постојат многу делотворни методи да се бара работа. Секој кој има право на тоа, од државата може да користи социјална помош за невработени, онаму каде што таа е достапна; а онаму каде што е соодветно, тие можат да се пријават во бироата за вработување и да ги користат понудените услуги. Други наоѓаат работа така што самите си создаваат вработување. Но треба да се биде претпазлив. Честопати оние кои работат самостојно мораат да се соочуваат со големи почетни трошоци кои можеби не е лесно да се исплатат. Исто така, неопходно е да се знаат и почитуваат фискалните и даночните закони — што не е мал подвиг во некои земји! (Римјаните 13:1—7; Ефесјаните 4:28).

За да добијат работа, наоѓањето работа некои го претвориле во работа, посветувајќи се на тоа плански и со истрајност. Други пишувале до фирми кои бараат кадри или давале огласи во локалните весници — од кои некои бесплатно печатат известувања за барање работа. Разбудете се! често пати давало корисни и практични совети на таа тема — како за млади така и за возрасни луѓе.a (Видете ги рамките на страница 11.)

Морате да бидете приспособливи — спремни за секаква работа, вклучувајќи работи кои можеби не ги сакате. Стручњаците велат дека меѓу првите работи кои се прашуваат на разговорите за работа се претходното работно искуство и должината на времето без работа. Губењето на работниот ритам не е добар знак за потенцијалниот работодавач.

Некој кој мудро го поминал времето во училиште стекнувајќи вештини, има подобра шанса да најде прво вработување. „Невработеноста“, вели Алберто Мајоки, наставник по финансиски науки, „особено ги погодува неквалификуваните работници.“

Важноста на емоционалната поддршка

Еден важен фактор е позитивното гледиште. Тоа може да одигра голема улога во тоа дали ќе се најде работа или не. Невработените многу ја ценат емоционалната поддршка, која им помага да не се изолираат или да не западнат во апатија. Исто така, служи за да се надмине губењето на самопочитување кое може да произлезе кога некој се споредува со другите кои не ја изгубиле својата работа.

Можеби нема да биде лесно да се врзе крај со крај. „Затоа што бев толку загрижен, ми беше многу тешко добро да го искористам времето што ми стоеше на располагање“, вели Стефано. „Состојбата ме правеше толку напнат“, се присетува Франческо, „што почнав да им приговарам на некои од моите драги пријатели.“ Тука доаѓа до израз поддршката од семејството. Недостигот на приходи изискува прилагодување од страна на сите членови на семејството со цел да се намалат животните трошоци. Франко, кој бил отпуштен на 43-годишна возраст откако работел за истата фирма 23 години, вели: „Од моментот кога бев отпуштен, мојата сопруга беше позитивна и извор на големо охрабрување“. Армандо особено ѝ е благодарен на својата сопруга за „нејзината голема мудрост во пазарувањето“ (Изреки 31:10—31; Матеј 6:19—22; Јован 6:12; 1. Тимотеј 6:8—10).

Библиските начела можат да ни помогнат да задржиме позитивен дух и да не ги изгубиме од вид поважните вредности. Интервјуираните од Разбудете се!, споменати погоре, извлекле утешно засигурување од Библијата. Тоа предизвикало да се чувствуваат поблиски со Бог (Псалм 33:10; 36:25; 54:22; Филипјаните 4:6, 7). Да се има близок однос со Јехова Бог е од огромна важност, затоа што тој ветува: „Нема да те оставам, ниту, пак, ќе те напуштам“ (Евреите 13:5).

Без оглед дали некој не е вработен или е вработен, Божјата Реч нѐ охрабрува сите да развиваме особини кои се корисни за секојдневниот живот. Не е никаква случајност тоа што Јеховините сведоци понекогаш се барани и ценети како чесни работници. Тие го следат библискиот совет да бидат марливи и доверливи, а не мрзливи (Изреки 13:4; 22:29; 1. Солунјаните 4:10—12; 2. Солунјаните 3:10—12).

Ослободување од привидението — невработеност

Во основата на недостигот на работа, се наоѓа една коренска причина — човечката себичност и алчност. Како што вели Библијата, „човекот господари над човек на своја штета“ (Проповедник 8:9).

Проблемот со невработеноста — како и други проблеми — ќе бидат решени со отстранувањето на човечката власт, која сега е во нејзините ‚последни денови‘ (2. Тимотеј 3:1—3). Постои потреба од свет кој е навистина нов. Да, свет во кој едно праведно човечко општество ќе може да живее и работи под едно праведно и справедливо владетелство каде што повеќе нема да има алчност (1. Коринтјаните 6:9, 10; 2. Петрово 3:13). Затоа Исус ги учел луѓето да се молат да дојде Божјето Царство и да се врши Неговата волја на Земјата (Матеј 6:10).

Пророчки опишувајќи го отстранувањето на некои од главните проблеми на човештвото, Божјата Реч ги илустрира резултатите на тоа Царство: „Ќе градат куќи и ќе живеат во нив, ќе садат лозја и ќе ги јадат плодовите нивни. Нема да градат, за да живее друг, нема да садат, за да јаде друг; . . . Моите избрани долго ќе се користат со делото на рацете свои. Нема да се трудат напразно и да раѓаат деца за скрб“ (Исаија 65:21—23). Привидението — невработеност наскоро ќе исчезне засекогаш. Ако сакате да дознаете нешто повеќе за Божјето решение, Ве молиме, обратете се до Јеховините сведоци во Вашето место.

[Фуснота]

[Рамка на страница 11]

Создавање работа дома:

• Чување деца, грижа за деца

• Продавање на домашно одгледан зеленчук или цвеќиња

• Шиење, преправање и поправање облека

• Работа на парче за производители

• Печење и приготвување храна

• Правење јоргани, плетење со чингела, плетење со обични игли, правење макраме, грнчарство и други вештини

• Тапацирање

• Книговодство, пишување на машина, домашни компјутерски услуги

• Услуга — одговарање на телефон

• Фризерство

• Земање потстанари

• Адресирање и полнење на коверти за луѓе кои објавуваат реклами

• Миење и полирање автомобили (муштеријата го донесува својот автомобил кај Вас дома)

• Нега и тренирање на домашни животни

• Поправка на брави и правење клучеви (работилница дома)

• Огласи за голем дел од оваа работа можат да се дадат бесплатно или по ниска цена во локалните весници или по излозите на продавниците

[Рамка на страница 11]

Создавање работа надвор од Вашиот дом:

• Чување куќи (кога луѓето се на одмор и сакаат нивната куќа некој да ја чува)

• Чистење: продавници; канцеларии; домови и станови после градење, после пожари, откако луѓето се иселиле; домашна работа (во домовите на другите луѓе); прозорци (деловни и домашни)

• Поправки: апарати од секаков вид (библиотеките содржат книги за поправки со лесни упатства)

• Различни работи: работи на фасадите од куќите; правење ормари, врати, тремови; молерисување; правење огради; конструкција на кровови

• Земјоделска работа: одгледување земјоделски култури, берење овошје

• Внатрешно уредување и одгледување растенија во канцеларии, банки, пазаришта и трговски холови, претсобја

• Раководење со имот: домари, куќни надзорници (понекогаш вклучува бесплатно место за живеење)

• Осигурување, купување и продавање недвижен имот

• Поставување теписи, чистење

• Обиколки со весници (возрасни и деца), други услуги за доставување; огласи, сметкопотврди од градска управа

• Селидби, складирање

• Уредување земјиште, поткастрување дрвја, одгледување тревник, сечење дрва

• Возач на школски автобус

• Фотографирање (портрети и јавни настани)

• Мамки за риболовци

• Трампање: автомобилски поправки за електрична услуга, шиење за поправање водовод, и сл.

[Слика на страница 10]

„Моите избрани долго ќе се користат со делото на рацете свои“ (Исаија 65:22).