Помогни им на младите да ги задоволат своите потреби

НА МЛАДИТЕ им е потребен некој со кого ќе зборуваат за своите цели, очекувања и проблеми. Потребни им се и добри пријатели. А како што созреваат, имаат потреба да покажат кои се и што се — личности со посебен карактер. Кога им помагаат на своите деца да ги задоволат овие потреби, родителите ги штитат од можните опасни врски со други луѓе, меѓу кои се и оние што лесно можат да ги најдат на Интернет.

◼ На младите им е потребен разговор. Можеби се чини дека младите обично ги кријат своите чувства и не сакаат многу да зборуваат за нив. Сепак, ако си родител, биди уверен дека тие сакаат да зборуваат со тебе — и за важни и за безначајни работи. Но, прашањето е: Дали ти си спремен да слушаш? (Јаков 1:19).

Не дозволувај притисоците во животот да ти ги одземат скапоцените моменти што можеш да ги поминеш во разговор со своите деца. Ако си допуштил да ти се случи вакво нешто, можеби е крајно време сериозно да размислиш за добриот библиски совет: ‚Проценете што е најважно‘ (Филипјаните 1:10). Што друго е поважно од твоите деца?

Немој избрзано да заклучиш дека младите се поспремни да побараат совет од своите врсници отколку од родителите. Во една анкета, повеќе од 17.000 ученици — од шесто одделение до четврта година средно — биле замолени да означат со бројки од 0 до 5 колкаво влијание во нивниот живот имаат родителите, пријателите, славните личности, весниците и телевизијата, и учителите. Бројот 0 означувал никакво влијание, а 5 многу големо влијание. Речиси половина од нив го ставиле бројот 5 кај родителите.

Јасно е, како родител, ти можеш да играш клучна улога во тоа какви вредности ќе усвојат и какви цели ќе си постават твоите деца. „Можеби нема да го послушаат сето она што им го кажуваш“, рекол еден родител. „Но, ако не разговараш со нив, нема да те послушаат за ништо.“

◼ На младите им се потребни пријатели. „Родителите обично не знаат со кого се допишуваат нивните деца на Интернет или, пак, едноставно тоа воопшто не ги интересира“, вели една 15-годишна девојка. Во денешно време, родителите не смеат да си дозволат да ги пуштат децата да се дружат со кого сакаат. Дали знаеш со кого го минуваат времето твоите деца, без разлика дали се дружат лично или преку Интернет? Библијата вели: „Лошото друштво ги расипува добрите навики“ (1. Коринќаните 15:33). Да, навистина има добра причина многу да внимаваш со кого се дружи твоето дете.

Грижата не значи само да се заштитат младите од лошо влијание. На децата им се потребни добри пријатели. „Кој оди со мудрите, ќе стане мудар“, вели Библијата (Изреки 13:20). Значи, треба да им помогнеш на твоите деца да изберат добро друштво — во кое ќе има и млади што се добар пример затоа што се сеќаваат на својот Творец (Проповедник 12:1).

Јехова Бог внимателно ги избира своите пријатели и во овој поглед би требало да постапиме како него (Псалм 15:1-5; Ефешаните 5:1). Всушност, и со збор и со пример, ти можеш да ги поучиш своите деца на една од најважните работи во животот — како да изберат добро друштво (2. Солуњаните 3:6, 7).

◼ Младите имаат потреба да покажат кои се и што се. Главен дел од процесот на растење е развојот на карактерот — комбинација од уникатни особини по кое едно дете се разликува од сите други. Една библиска изрека вели: „Детето се познава по она што го прави“ (Изреки 20:11). Една од твоите должности како родител е да всадиш исправни начела во срцето на твоите деца (5. Мојсеева 6:6, 7).

Да наведеме еден пример: Родителите обично секојдневно одлучуваат што ќе носи детето додека е мало, надевајќи се дека еден ден и самото ќе научи како вкусно да се облекува. Но, можеш ли да си замислиш еден 30-годишен здрав возрасен човек кого сѐ уште го облекуваат родителите? Самата помисла е смешна! Правејќи споредба со облекувањето, Библијата нѐ поттикнува: „Облечете ја новата личност“ — личност која е слична на Христовата (Колошаните 3:10). Можеш да им помогнеш на твоите деца да ја облечат новата личност ако со љубов им дадеш стега и ги научиш како да размислуваат (Ефешаните 6:4). А потоа, како што ќе растат и ќе стануваат сѐ понезависни, постои голема веројатност и самите да изберат да ја ‚облечат‘ „новата личност“, зашто ќе сфатат дека таа е вистински убава и привлечна (5. Мојсеева 30:19, 20).

Прашај се: ‚Што навистина мислат моите деца за вредностите за кои поучува Божјата реч? Како можам да им помогнам „да живеат разборито“?‘ (Тит 2:12). Целта не треба да ти биде детето само површно да те слуша. Некои деца без приговор прават сѐ што ќе им се каже — никогаш не поставуваат прашања, не се расправаат и не се бунат. Но, детето што само го прави она што ти ќе му го кажеш денес, може да го прави сето она што светот ќе му го каже утре. Затоа, поучи ги своите деца да го користат „својот разум“ (Римјаните 12:1). Помогни им да сфатат зошто библиските начела се добри и дека сите имаме корист од нив (Исаија 48:17, 18).

Да, потребно е да се вложи труд за да им се помогне на младите да ги задоволат своите потреби. Но, тој труд ќе биде награден! Ако твоите деца решат да живеат според праведните начела што си ги всадил во нив, ќе можеш да речеш со сето срце дека тие навистина се „наследство од Јехова“ (Псалм 127:3).

[Слики на страница 9]

Помогни им на твоите деца да изберат добри пријатели од христијанското собрание