Пловдив — современ град со долга историја

Пловдив — современ град со долга историја

ОД ДОПИСНИКОТ НА РАЗБУДЕТЕ СЕ! ВО БУГАРИЈА

ПЛОВДИВ е постар од Рим, Картагина и Константинопол. Овој град има околу 350.000 жители и се протега на седум ридови во јужниот дел од Централна Бугарија.

Ако се прошеташ низ старите улици на градот, ќе видиш изобилство докази за неговото славно и бурно минато. Може да се видат градби кои се дело на Тракијците, застрашувачки народ кој живеел неколку века пред почетокот на нашата ера, како и грчки столбови, римски театри и турски минариња.

„Најубав од сите градови“

Археолошките пронајдоци во самиот град и во неговата околина откриваат дека тој постоел долго време пред да почне првиот милениум пр.н.е. Римскиот историчар Амијан Марцелин напишал дека на местото на денешен Пловдив, уште пред почетокот на 4 век пр.н.е., постоела утврдена тракиска населба, која била позната под името Еумолпија. Во 342 год. пр.н.е., Еумолпија била поразена од страна на Филип II Македонски, татко му на Александар Македонски. Филип му го сменил името на градот во Филипополис.

Римјаните, кои презеле контрола над овој град во 46 год. од н.е., го нарекле Тримонтиум и го избрале за главен град на Тракија. Овој град многу им значел бидејќи низ него минувала Виа Диагоналис — главен пат на Балканот. Римјаните оставиле свој белег на градот градејќи во него стадион, амфитеатар (на сликата погоре), голем број бањи и многу други типично римски градби.

Луциан од Самосата ја опишал природната убавина на овој град сместен меѓу три рида, во подножјето од Родопите. (Види ја рамката „Град на седум ридови“, на страница 18.) Градот лежел во близина на реката Марица и пред него се простирала Тракиската Низина. Луциан напишал дека Тримонтиум бил „највеличествен и најубав од сите градови“.

По распадот на Римското Царство, настапил мрачниот среден век — период кога во овој град се населиле Словените. Во текот на наредните неколку векови, крстоносците го пљачкале градот во четири налети. Потоа, во 14 век, настапила политичка промена кога градот потпаднал под власта на Турците, кои го нарекле Филибе и се задржале овде сѐ до 1878 година. Џамијата Џумаја, нејзиното минаре и сончевиот часовник се обележја од таа епоха.

По поразот на Турција од страна на Русија во 1878 год., градот Фелибе станал познат како Пловдив. Во 1892 год., тој бил домаќин на трговскиот саем кој многу го забрзал неговиот економски развој. Оттогаш, Пловдив станал главен центар за трговска размена во Бугарија. За време на Втората светска војна, градот за кратко се нашол под власт на нацистите, но, во 1944 год., советските сили ги протерале. Во 1989 год., со распадот на Советскиот Сојуз, Пловдив се ослободи од стисокот на уште една моќна империја. Иако некои од управителите на Пловдив можеби биле искрени, тие сепак биле несовршени како и сите луѓе. Меѓутоа, ова не значи дека не постои надеж за една совршена влада.

Ширење на „добрата вест“ во Пловдив

Уште во 1938 год. беше основана и регистрирана една локална корпорација под името „Набљудателна кула“ (Стражарска кула), која печатеше Библии и библиска литература за цела Бугарија со цел да ја објави оваа реална надеж. И покрај угнетувањето од страна на комунистичката власт, Јеховините сведоци продолжија да им ја кажуваат на жителите на Пловдив добрата вест за скорото доаѓање на една совршена небесна влада (Матеј 24:14). Неколку лица ја прифатија со голем интерес. Сега во Пловдив има повеќе од 200 Јеховини сведоци организирани во две собранија, кои веруваат во Јехова и зборуваат со другите за него.

Повеќето од нив се Бугари. Но, како што било случај и во историјата на овој град, меѓу нив можат да се најдат и припадници на разни други народи — Американци, Британци, Италијанци, Канаѓани, Молдавци и Полјаци. Тие заедно им кажуваат на своите ближни за надежта дека можат да живеат под една совршена управа. Тоа ќе биде време кога, не само жителите на Пловдив, туку и сите луѓе во светот ќе живеат во сигурност. Тогаш „секој ќе седи под својата лоза и под својата смоква и никој нема да го плаши“ (Михеј 4:4).

[Рамка/слика на страница 18]

„ГРАД НА СЕДУМ РИДОВИ“

На еден посетител денес би му било тешко да ги најде прочуените седум ридови (тепиња) на кои лежи Пловдив. Пред сто години, еден од ридовите, познат како Марковотепе, бил срамнет при проширувањето на градот. Меѓутоа, шест ридови сѐ уште се издигаат како неми сведоци за древното минато на Пловдив.

Три од нив можат лесно да се забележат, а тоа се Бунарџиктепе, Џендемтепе и Сахаттепе, кој го добил името по неговата саат-кула. Тримонтиум, како што Римјаните го нарекувале Пловдив, лежел на останатите три рида: Џамбазтепе (најголемиот и највисок рид), Таксимтепе и Небеттепе, што на турски значи „стражарски рид“.

Една прошетка низ Тримонтиум може да те врати во минатото на Пловдив. Таму се наоѓаат многу стари градби — од древните урнатини и ѕидови на Филипополис до римскиот театар кој е сѐ уште во употреба. Интересно е да се видат и добро сочуваните куќи меѓу кои минуваат калдрми, а датираат од периодот на бугарската преродба.

[Извор на слика]

[Карта на страница 16]

(Види во публикацијата)

БУГАРИЈА

СОФИЈА

Пловдив

[Извори на слики на страница 17]