Младите католици беа поттикнати да сведочат

ОД ДОПИСНИКОТ НА РАЗБУДЕТЕ СЕ! ВО АВСТРАЛИЈА

ВО ЈУЛИ минатата година, католици од целиот свет се собраа во Сиднеј (Австралија) по повод Светскиот ден на младите (2008) — религиозен настан под покровителство на Католичката црква.

Низ улиците на градот се слеаја посетители од 170 земји, кои мавтаа со знамиња, скандираа и пееја во карневалски дух. Илјадници набљудувачи со нетрпение го чекаа во пристаништето пристигнувањето на папата Бенедикт XVI, кој дојде со брод во придружба на 12 други разнобојни бродови. Околу 500 милиони луѓе од целиот свет го следеа директниот пренос од овој настан.

На последната миса, која се одржа на градскиот хиподром, имаше околу 400.000 присутни, меѓу кои и 4.000 високи претставници на црквата и 2.000 претставници на средствата за јавно информирање. Тоа беше најголемиот собир во Австралија, кој по бројност ја надмина дури и посетеноста на Олимписките игри во Сиднеј во 2000 година.

Што е Светскиот ден на младите? По кој повод се одбележува? Какви активности се застапени? И што откри овој настан за верата на младите што беа во Сиднеј?

„Ослабување на верата“

Светскиот ден на младите е годишна прослава со која се истакнува верата на младите католици. Обично, верниците го одбележуваат овој ден во својата локална бискупија. Но, на секои 2-3 години, еден од поголемите градови е домаќин на овој настан, на кој се поканети младите католици од целиот свет. Досега, вакви средби со милиони посетители беа организирани во десет градови на пет континенти.

Меѓутоа, како што признаваат и црковните претставници, друга цел на Светскиот ден на младите е да се спречи натамошното опаѓање на интересот за католичката вера. „Бројот на католици кои не ги практикуваат учењата на Црквата и кои донекаде ја изгубиле својата вера постојано расте“, изјави австралискиот кардинал Џорџ Пел. „Светскиот ден на младите е еден обид да се преземе нешто против оваа појава.“

Според извори на Ватикан, бројот на свештеници низ целиот свет постојано се намалува. Во последниве неколку децении, десетици илјади свештеници ја напуштиле својата служба за да стапат во брак. Во Австралија, бројот на лица што сакаат да станат свештеници се намалил за повеќе од 70 отсто во последните 30 години. Старосниот просек на свештениците во најголемата бискупија во Австралија е околу 60 години, што е за 20 години поголем во однос на 1977 год.

Опаднат е и бројот на верници кои одат в црква. Околу 25 отсто од сите Австралијци се изјаснуваат како католици, но само 14 отсто од нив редовно одат на миса. Се проценува дека помалку од 10 отсто од младите католици имаат ваков обичај. Освен тоа, многу католици ги отфрлаат црковните учења за сексуалниот морал, контрацепцијата и разводот. Други се разочарани од црковните скандали, како што е појавата на педофилија во редовите на свештенството.

Светскиот ден на младите „е еден очајнички обид да се спречи натамошното опаѓање на интересот за католичката вера“, вели весникот The Sydney Morning Herald. „Црковните водачи во Австралија и во Рим се надеваат дека католицизмот повторно ќе заживее меѓу младите.“ На кој начин се трудат да им помогнат во тоа?

Забави и помпезни церемонии

Светскиот ден на младите беше одбележан со црковна помпезност, групни дискусии, посета на свети места и одржување миси со огромен број присутни. Иако сето ова остави силен впечаток врз многумина од посетителите, некои дадоа негативни забелешки за духот на целиот тој настан. Една млада католичка од САД по име Александра вели дека за неа ‚сето тоа било само едно голема забава‘.

Во текот на шестдневниот собир, во Сиднеј се одржаа 450 свечени настани, меѓу кои и концерти, филмови, претстави, изложби и улични изведби. Имаше музика од секаков жанр — од опера и грегоријанско пеење до хеви-метал и рап. Рок-концертите привлекоа илјадници младинци кои сакаа само да се забавуваат.

Некои католици беа загрижени поради тоа. Светскиот ден на младите „се претвори во една обична весела забава — цела седмица исполнета со журки и концерти. Повеќето активности беа световни, а не свети“, изјави свештеникот Питер Скот за австралиската телевизија ABC News. Во 2000 год., дури и папата Бенедикт XVI, тогашен кардинал Рацингер, напишал: „Рок-музиката е израз на силна телесна страст, а на рок-фестивалите таа придобива и култен карактер, односно станува облик на обожавање, што, всушност, се коси со христијанството“ (The Spirit of the Liturgy).

Затоа, се поставува едно прашање: „Дали Светскиот ден на младите ќе влијае врз нечиј живот?“ „Врз мал дел можеби да“, забележува поранешниот свештеник Пол Колинс. „Меѓутоа, повеќето ќе се вратат на својот стар начин на живот“, вели тој. „Драстичните промени не се производ на некакви спектакуларни настани, туку на длабоко размислување, внимателно планирање и спремност да се надминат сериозните проблеми.“

„Бидете сведоци“

Јасно е дека црковните водачи се свесни за овие факти. Од таа причина, мотото на Светскиот ден на младите беше: „Ќе примите сила кога светиот дух ќе дојде врз вас, и ќе ми бидете сведоци“.a

Бискупите ги поттикнаа младите католици да ја „разбудат во себе апостолската ревност и уште потемелно да ги шират Христовите учења во денешниов современ свет“. Папата Бенедикт XVI ги поттикна присутните да бидат „новата генерација на апостоли“, а во друга прилика им порача да ја шират ‚добрата вест меѓу своите пријатели, семејства и помеѓу сите што ќе ги сретнат‘.

Ваквите апели допреа до срцата на некои искрени католици. Рамидо од САД (20) му го кажал следново на еден репортер: „Одговорноста како сведок си ја сфаќам сериозно“. Меѓутоа, Беатрис од Италија (18) изјави: „Денешните млади не разговараат за Бог. Да се биде сведок во нашево време е многу тешко“. Многу млади посетители го делат мислењето на две тинејџерки од Тексас (САД): „Единствените што сведочат во нашето место се Јеховините сведоци!“

Млади кои сведочат

Јеховините сведоци на сите возрасти се познати по своето ревносно сведочење. Зошто го прават тоа? „Од љубов кон Бог, кон луѓето и кон Библијата“, вели Сотир, еден 22-годишен Сведок од Сиднеј.

Иако не присуствуваа на настаните во склоп на Светскиот ден на младите, речиси 400 млади Јеховини сведоци од Сиднеј спроведоа една посебна акција да зборуваат со посетителите за библиските вистини. „Ми беше многу мило што можев да ги запознаам овие духовно настроени млади католици“, вели Травас (25). „Многумина од нив поставуваа добри библиски прашања и ми беше вистинско задоволство што можев да им дадам конкретен одговор.“

„Им пристапував на опуштен и неформален начин“, вели Тарша (23). „Сакав да им изразам добредојде во Сиднеј и да чујам какви се нивните верувања.“ „Ја користев секоја погодна прилика да им ја понудам на посетителите книгата Што навистина учи Библијата?“b — вели Фрејзер (20). „Сите што ги сретнав ја зедоа со задоволство.“

Многу посетители очигледно уживаа во разговорите што ги водеа со младите Сведоци. Сузан од Фиџи ја прашала Белинда (19), која е Сведок, зошто Бог ги допушта страдањата. Белинда ѝ предложила да дискутираат за тоа со помош на книгата Што учи Библијата. Кога завршиле, Сузан рекла: „Обично ми велат дека Бог едноставно постапува на чудни начини. Овојпат го добив вистинскиот одговор!“ Кога Белинда ѝ ја дала книгата, Сузан рекла: „Се трудев да запамтам сѐ. Не очекував дека ќе ја добијам!“

Една посетителка од Филипините ја замолила Марина (27), која е Сведок, да ја слика пред некоја од знаменитостите на Сиднеј. Откако си направиле еден пријателски разговор, Марина ѝ ја дала на жената книгата Што учи Библијата. „Токму вчеравечер се молев за подобро да ја разберам Библијата“, рекла таа. „Можеби оваа книга е одговор на мојата молитва!“

Ливај (27), кој е Јеховин сведок, започнал разговор со две посетителки од Панама, кои се мајка и ќерка. Па кратко време, почнале да дискутираат за Бог и за библиските учења. Тие ја прифатиле книгата Што учи Библијата?, а Ливај потоа ги прашал: „Што ви се допадна најмногу од целата оваа посета?“ Ќерката ја зела книгата Што учи Библијата и одговорила: „Тоа што те сретнавме тебе“.

Многу млади католици беа желни да дознаат нешто повеќе за Библијата. Дали и ти би сакал подобро да ја разбереш оваа книга? Тогаш, слободно замоли ги Јеховините сведоци бесплатно да ти помогнат да ја проучуваш Библијата. Ќе им биде мило да го сторат тоа.

[Фусноти]

[Истакната мисла на страница 27]

„Бројот на католици кои не ги практикуваат учењата на Црквата и кои донекаде ја изгубиле својата вера постојано расте“ (Џорџ Пел, католички кардинал)

[Рамка/слики на страница 25]

САЕМ ЗА ИЗБОР НА ЦРКОВНА КАРИЕРА

Во склоп на Светскиот ден на младите се одржа и најголемиот саем за избор на црковна кариера во Австралија. Над 100 католички верски редови и организации поттикнаа повеќе од 50.000 млади католици да се школуваат за католички свештеници, калуѓери и за други црковни професии.

[Слика на страници 24 и 25]

Низ улиците парадираа млади католици во разнобојна облека

[Слики на страница 26]

Јеховините сведоци им пристапуваа на посетителите што го разгледуваа Сиднеј

[Извор на слика на страница 24]

Getty Images