Ќе има ли крај на страдањата?

Маките на Киу почнале кога татко му бил убиен затоа што неговите крави отишле во една блиска нива со пченка. Подоцна, мајка му и две негови сестри биле погубени од страна на Црвените Кмери во Камбоџа. По некое време Киу нагазил на мина и бил повреден. Цели 16 дена останал во џунглата чекајќи помош. Ногата морала да му биде ампутирана. „Не ми се живееше“, вели Киу.

МОЖЕБИ си забележал дека страдањето не бира — ги погодува сите. Природните катастрофи, болестите и хендикепот, насилните злосторства и други трагедии може да го снајдат секого, на секое место и во секое време. Хуманитарните организации неуморно се трудат да го спречат или барем да го ублажат човечкото страдање. Но, какви се резултатите од нивниот труд?

Да разгледаме еден пример — борбата против гладот. Според весникот Toronto Star, природните катастрофи оставиле многу лица без храна и без покрив над главата. Меѓутоа, истиот весник известува дека „напорите на организациите кои се залагаат за намалување на гладот се попречени од сѐ поголемото насилство“.

Видни лица на полето на политиката, социјалната заштита и медицината прават сѐ за да им стават крај на страдањата, но со слаб успех. Програмите за економски развој не успеале да ја искоренат сиромаштијата. Вакцините, лековите и современата хирургија не можат да им стават крај на болестите. Полицијата и мировните сили беспомошно гледаат како насилните злосторства продолжуваат, па дури и се влошуваат.

Зошто има толку многу страдање? Дали Бог го засега она што го трпат луѓето? Прочитај како милиони луѓе нашле утешни одговори на овие прашања во Библијата.