Традиционална руска уметност на дрво

● Повеќето туристи во Русија со задоволство си купуваат некој рачно изработен сувенир, како што се куклите матрјошка. Порано, повеќето вакви сувенири ги изработувале вешти занаетчии што живееле во селата. Традиционалното цртање на дрво се нарекува хохлома.

Со векови, Русите јаделе од детално изрезбани и насликани длабоки чинии, а користеле и дрвени лажици, чаши и други садови. Цртежите обично биле со мотиви од растителниот или животинскиот свет. Понекогаш и цели села се занимавале со изработка на разни видови дрвени предмети.

Селаните го правеле тоа во текот на долгите студени зими, кога немале многу работа на полето. Пред повеќе од два века, некои градови и села остварувале голема заработка од производството на вакви дрвени предмети. На пример, еден период, сите жители на Семјонов престанале да се занимаваат со земјоделие и за само една година произвеле речиси два милиони дрвени длабоки чинии, послужавници, чаши и лажици.

Жителите на селата во околината на Нижни Новгород развиле техника за производство на издржлива златеста глазура со која ги премачкувале садовите. Измислиле и огноотпорни бои и лакови, а готовите предмети ги ставале во печка. Под дејство на високите температури, сребреникавата површина на садовите добивала изедначен, златест сјај. Овој процес се користи до ден-денес во фабриките за хохлома во околината на Нижни Новгород.

Хохлома дизајните вклучуваат цвеќиња и растенија типични за руските шуми и ливади, како и птици и риби. На сликите често има и лијани испреплетени со трева, лисје и овошје, на пример, разни видови бобинки. Преовладуваат црвената, црната, златната и зелената боја. Денес, убавите бои на руската природа со кои се исцртани хихлома предметите ги красат трпезите во многу домови низ целиот свет.