Што значи да се биде вистински маж?

МОЖЕШ ЛИ да се најдеш во овие изјави? Се плашиш ли дека од некоја причина никогаш нема да научиш што значи да се биде вистински маж? Ако да, не разочарувај се!

Да разгледаме како можеш да надминеш два вообичаени предизвика.

ПРЕДИЗВИК 1: Вообичаени заблуди за тоа што значи да се биде маж

Што велат некои:

• Вистинските мажи се цврсти; никогаш не плачат.

• Вистинските мажи не дозволуваат друг да им кажува што да прават.

• Мажите се подобри од жените.

Погледни од друг агол: За да сфатиш што е маж, не треба да правиш споредба помеѓу маж и жена, туку помеѓу маж и момче. Стануваш вистински маж кога ќе престанеш да се однесуваш како дете. Апостол Павле напишал: „Кога бев дете, зборував како дете, размислував како дете, расудував како дете. А кога станав маж, го отфрлив детинското“ (1. Коринќаните 13:11). Со други зборови, колку помалку размислуваш, зборуваш и се однесуваш како дете и колку повеќе размислуваш, зборуваш и се однесуваш зрело, толку поочигледно е дека си вистински маж.b

Предлог: На лист хартија, одговори ги следниве прашања:

1. На кои полиња сум успеал донекаде да го отфрлам „детинското“?

2. На кои полиња има место за подобрување?

Би можел да прочиташ: Лука 7:36-50. Размисли како Исус покажал дека е вистински маж со тоа што 1) се држел цврсто за она што е исправно и 2) покажувал почит кон другите — вклучувајќи ги и жените.

„Му се восхитувам на мојот пријател, Кен. Тој е цврст човек — физички, емоционално и духовно — но и љубезен. Од него научив дека еден вистински маж не ги понижува другите за самиот да се истакне“ (Џонатан).

ПРЕДИЗВИК 2: Кога таткото не е пример од кој може да се учи

Што велат некои:

• Ако растеш без татко, никогаш нема да научиш што значи да си вистински маж.

• Ако си немал добар пример од татко ти, и ти ќе ги правиш истите грешки.

Погледни од друг агол: Дури и ако си немал баш најидеално детство, не си осуден на неуспех! Можеш да успееш без оглед на околностите (2. Коринќаните 10:4). Можеш да избереш да го следиш советот што цар Давид му го дал на својот син Соломон: „Биди храбар и покажи се маж“ (1. Царевите 2:2, Превод на д-р Д. Х. Константинов).

Сепак, факт е дека е тешко да растеш со татко кој не ти обрнува никакво внимание — или, пак, без татко. „Голем хендикеп е да не го знаеш својот татко“, вели Алекс, кој беше цитиран на почетокот. „Имам 25 години, но ми се чини дека дури сега учам работи што требаше да ги научам уште кога влегов во тинејџерски години.“ Ако и ти имаш слични чувства, што може да ти помогне?

Предлог: Избери некој на кој би можел да се угледаш — некој што ќе ти помогне да научиш што е вистински маж.c Прашај го кои особини мисли дека се многу важни за еден вистински маж. Потоа прашај го како ти би можел да ги стекнеш тие особини (Изреки 1:5).

Би можел да прочиташ: Изреки, поглавја 1-9. Обрни внимание на татковскиот совет што може да му помогне на едно момче да израсне во мудар, духовен маж.

„Ме радува тоа во каква личност се развивам. Иако би сакал да можев да учам од татко ми, оптимист сум во поглед на иднината. Убеден сум дека не сум осуден на неуспех“ (Џонатан).