Во што веруваат тие?

Јеховините сведоци веруваат во Семоќен Бог, Јехова, Творец на небото и Земјата. Самото постоење на замрсено конструираните чуда во вселената што нѐ окружува говори дека сето тоа го создал крајно интелигентен и моќен Творец. И како што човековите дела ги одразуваат особините на својот градител, така е и со делата на Јехова Бог. Библијата известува дека „она, што е во Него невидливо, . . . се гледа уште од создавањето на светот, гледани според нивните созданија“. Исто така, без глас или зборови, „небесата ја објавуваат славата на Бога“ (Римјаните 1:20; Псалм 18:1-4).

Луѓето не изработуваат глинени садови и не произведуваат телевизиски апарати и компјутери без одредена цел. Земјата со своите растителни и животински дела на создавање е далеку почудесна од сѐ што човекот произвел. Составот на човековото тело со неговите билиони клетки ја надминува нашата способност на разбирање. Самиот мозок со кој мислиме е несфатливо чудесен! И ако човекот има некоја намера со своите сразмерно безначајни пронајдоци, тогаш е сигурно дека и Јехова Бог има одредена намера со своите дела на создавање кои влеваат стравопочитување! Потврда за ова наоѓаме во Изреки 16:4: „Господ направи сѐ со определена цел“.

Јехова ја создал Земјата со одредена цел, како што произлегува од неговите зборови упатени до првата човечка двојка: „Плодете се, и множете се, и наполнете ја земјата, . . . и овладајте ги рибите морски . . . и птиците, . . . и со сите животни што лазат по земјата“ (1. Мојсеева 1:28). Бидејќи станала непослушна, оваа брачна двојка не ја исполнила својата задача да ја наполни Земјата со праведни семејства кои со голема љубов би се грижеле за Земјата и за нејзините растенија и животни. Но, Јеховината намера не била осуетена поради нивната грешка. Илјада години подоцна било запишано следново: „Бог Кој ѝ даде облик на земјата и Кој ја создаде; Он ја зацврсти, не ненадејно ја создаде“. „Он ја создаде за живеење“. Таа нема да биде уништена, бидејќи „Земјата останува засекогаш“ (Исаија 45:18; Проповедник 1:4, Ст). Јехова ќе ја оствари својата првобитна намера со Земјата: „Мојата одлука ќе се исполни, ќе извршам сѐ што ми е волја“ (Исаија 46:10).

Затоа, Јеховините сведоци веруваат дека Земјата ќе постои засекогаш и дека сите — живи и мртви — ќе живеат на неа вечно ако се во согласност со Јеховината намера за разубавена, населена Земја. Сите луѓе наследиле несовршеност од Адам и Ева и затоа се грешници (Римјаните 5:12). Библијата кажува: „Оти, платата, што ја дава гревот, е смрт“. „Живите знаат, дека ќе умрат, а мртвите ништо не знаат.“ „Која душа греши, таа ќе умре.“ (Римјаните 6:23; Проповедник 9:5; Језекиил 18:4, 20). Тогаш, како ќе можат мртвите повторно да живеат за да имаат удел во земските благослови? Само преку откупната жртва на Исус Христос, кој рекол: „Јас сум воскресението и животот, кој верува во Мене, и да умре, ќе живее“. „Сите, кои што се во гробовите ќе го чујат гласот на Синот Божји, и ќе излезат“ (Јован 11:25; 5:28, 29; Матеј 20:28).

Како ќе биде тоа можно? Одговорот е содржан во „евангелието [добрата вест, НС] за царството“ што Исус почнал да го објавува додека бил на Земјата (Матеј 4:17-23). Јеховините сведоци ја проповедаат добрата вест на еден мошне посебен начин.

[Табела на страница 13]

ШТО ВЕРУВААТ ЈЕХОВИНИТЕ СВЕДОЦИ

ВЕРУВАЊЕ БИБЛИСКИ ДОКАЗИ

Христовата жртва е доволна Рим. 6:10; Евр. 9:25-28

Постои само еден пат во живот Мат. 7:13, 14; Ефес. 4:4, 5

[Слика на страница 12]

ЗЕМЈАТА . . . ја создал Јехова . . . за неа се грижи човекот . . . населена засекогаш

[Извор на слика]

Фотографија на NASA