Што веруваат?

ЈЕХОВИНИТЕ СВЕДОЦИ веруваат во Семоќен Бог, Јехова, Творец на небесата и на Земјата. Самото постоење на комплексно дизајнираните чуда во универзумот околу нас разумно покажува дека сето тоа го создал врвно интелигентен и моќен Творец. Исто како што делата на мажите и жените ги одразуваат нивните својства така е и со делата на Јехова Бог. Библијата ни кажува дека „неговите невидливи својства . . . јасно се гледаат од создавањето на светот па наваму, бидејќи се согледуваат по она што е направено“. Исто така, без глас или зборови, „небесата ја објавуваат славата на Бога“ (Римјаните 1:20; Псалм 18:1—4).

Кога луѓето изработуваат глинени садови и произведуваат телевизиски приемници и компјутери, тоа не го прават без цел. Земјата со своите творештва од растителен и животински свет е далеку позачудувачка. Составот на човечкото тело со неговите билиони клетки е вон нашето разбирање — дури и мозокот со кој размислуваме е несфатливо чудесен! Штом луѓето имаат некаква цел со своите релативно безначајни изуми, сигурно и Јехова Бог имал некаква цел со своите творби кои влеваат стравопочит! Дека ова е така се потврдува во Изреки 16:4: „Господ направи сѐ со определена цел“.

Јехова ја создал Земјата со цел, како што му кажал на првиот човечки пар: „Плодете се, и множете се, и наполнете ја земјата . . . и овладајте ги рибите морски, и ѕверовите, и птиците, и сиот добиток, и со целата земја, и со сите животни што лазат по земјата“ (1. Мојсеева 1:28). Бидејќи станал непослушен, овој пар не ја наполнил Земјата со праведни семејства кои со љубов би се грижеле за неа и за нејзините растенија и животни. Но, поради ваквиот пропуст не пропаднала и Јеховината намера. Неколку илјади години подоцна било запишано: „Бог, Кој ѝ даде облик на земјата и Кој ја создаде; Он ја зацврсти, не ненадејно ја создаде“. Тој „ја создаде за живеење“. Таа нема да биде уништена туку „земјата останува секогаш“ (Исаија 45:18; Проповедник 1:4, ДХК). Јеховината намера со Земјата ќе се оствари: „Мојата одлука ќе се изврши, и сѐ што ми е угодно — ќе го направам“ (Исаија 46:10).

Затоа Јеховините сведоци веруваат дека Земјата ќе остане засекогаш и дека сите луѓе — живи и мртви — кои ќе се усогласат со Јеховината намера за разубавена, населена Земја, ќе живеат на неа засекогаш. Целото човештво наследило несовршеност од Адам и Ева и затоа сите се грешници (Римјаните 5:12). Библијата ни кажува: „Платата што ја дава гревот е смрт“. „Живите знаат, дека ќе умрат, а мртвите ништо не знаат.“ „Душа, која згрешила, ќе умре“ (Римјаните 6:23; Проповедник 9:5; Језекиил 18:4, 20). Тогаш, како ќе можат да оживеат за да имаат удел во земните благослови? Само преку откупната жртва на Христос Исус, зашто тој рекол: „Јас сум воскресението и животот. Кој практикува вера во мене, и да умре, ќе оживее“. „Сите оние што се во спомен-гробовите ќе го чујат неговиот глас и ќе излезат“ (Јован 5:28, 29; 11:25; Матеј 20:28).

Како ќе се случи тоа? Тоа е објаснето во „добрата вест за царството“ која почнал да ја објавува Исус додека бил на Земјата (Матеј 4:17—23). Но, денес Јеховините сведоци ја проповедаат добрата вест на еден мошне посебен начин.

[Табела на страница 13]

ШТО ВЕРУВААТ ЈЕХОВИНИТЕ СВЕДОЦИ

Верување Библиска причина

Божјето име е Јехова Оси. 12:5; Суд. 6:24; 2. Мој. 17:15

[Слика на страница 12]

ЗЕМЈАТА . . . ја создал Јехова . . . за неа се грижи човекот . . . населена засекогаш