Поглавје 3

Роден е оној што ќе го подготви патот

ЕЛИСАВЕТА наскоро ќе се породи. Последните три месеци Марија била со неа. Но сега е време Марија да се збогува и да тргне на долго патување кон дома, во Назарет. За отприлика шест месеци и таа ќе има бебе.

Кратко по заминувањето на Марија, Елисавета се породува. Колкава е радоста што породувањето е успешно и Елисавета и детето се добри! Кога Елисавета им го покажува детето на соседите и роднините, сите се радуваат со неа.

На осмиот ден од раѓањето, според Божјиот закон, машкото дете во Израел мора да се обреже, и по тој повод доаѓаат на гости пријатели и роднини. Тие велат дека на детето треба да му се даде името на таткото, Захарија, но Елисавета јасно и гласно проговорува. „Не, никако“, вели таа, „туку ќе се вика Јован.“ Сети се, тоа е името што ангелот Гавриел рече дека треба да му се даде на детето.

Меѓутоа, нивните пријатели приговараат: „Никој од твоите роднини не се вика со ова име“. Затоа, со помош на знаци го прашуваат таткото како сака да се вика детето. Захарија бара плоча за пишување, и на изненадување на сите, пишува: „Јован му е името“.

Со тоа на Захарија му се враќа говорот на чудесен начин. Потсети се дека тој ја изгуби својата способност да зборува кога не веруваше во објавата на ангелот дека Елисавета ќе има дете. Слушајќи како Захарија зборува, сите кои живеат во соседството се чудат и си велат: „Што, всушност ќе биде од ова детенце?“

Захарија сега е исполнет со свет дух, и воскликнува: „Нека е благословен Јехова, Богот Израелов, зашто му обрна внимание на својот народ и го избави. И подигна рог на спасение за нас во куќата на Давид, својот слуга“. Секако, овој „рог на спасение“ е Господ Исус, кој допрва ќе се роди. Захарија вели дека преку него Бог, „кога ќе бидеме избавени од рацете на непријателите, ќе ни ја подари предноста бестрашно да му принесуваме света служба во лојалност и праведност пред него во сите наши денови“.

Тогаш Захарија прорекува за својот син, Јован: „А ти, детенце, ќе бидеш наречено пророк на Највишиот, зашто ќе одиш пред Јехова за да ги подготвиш неговите патишта, за да му дадеш спознание за спасение на неговиот народ преку проштавање на неговите гревови, поради нежното сочувство на нашиот Бог. Со тоа сочувство ќе нѐ посети разденување од висина, за да им даде светлина на оние кои седат во темнина и во сенката на смртта, за успешно да ги насочи нашите нозе на патот на мирот“.

Дотогаш Марија, која очигледно е сѐ уште немажена, пристигнува дома во Назарет. Што ќе се случи со неа кога нејзината бременост ќе стане очигледна? Лука 1:56—80; Левит 12:2, 3.

▪ Колку е Јован постар од Исус?

▪ Какви работи се случуваат кога Јован има осум дена?

▪ Како Бог го свртил вниманието кон својот народ?

▪ Кое дело е проречено дека ќе го врши Јован?