Прашања од читателите

Дали Марија, која станала Исусова мајка, била веќе бремена кога отишла да ја посети својата роднина Елисавета?

Да, очигледно била.

Во 1-то поглавје од Лука, најпрво читаме за бременоста на Елисавета, сопругата на свештеникот Захарија, која го родила Јован (Крстител). Кога Елисавета била во ‚шести месец, ангелот Гавриил‘ ја посетил Марија за да ја извести дека ќе затрудни и дека ќе го роди ‚Синот на Севишниот‘ (Лука 1:26, 30-33). Но, кога забременила Марија?

Лукиниот извештај понатаму кажува дека Марија веднаш потоа отпатувала во Јудеја за да ја посети својата роднина Елисавета, која била бремена. Кога двете жени се сретнале, детето во матката на Елисавета (Јован) потскокнало. Елисавета се осврнала на ‚плодот од утробата на Марија‘ и ја нарекла Марија „мајката на мојот Господ“ (Лука 1:39-44). Според тоа, логично, Марија сфатила дека веќе била бремена кога отишла да ја види Елисавета.

Лука 1:56 вели: „И остана Марија со неа околу три месеци, па се врати дома“. Овој стих не го прецизира точниот календарски ден. Тој вели „околу три месеци“, што би било во деветтиот месец од бременоста на Елисавета.

Откако ѝ помагала на Елисавета, за време на доцниот период од нејзината бременост, Марија си заминала во својот дом, во Назарет. Таа веројатно сфатила дека, кога Елисавета ќе го роди (Јован), може да дојдат многу посетители, меѓу кои дури и некои нејзини роднини. Тоа би било непријатна или збунувачка ситуација за една немажена девојка која и самата била бремена. Во кој месец била Марија кога заминала за Назарет? Бидејќи со Елисавета била „околу три месеци“, кога се вратила во Назарет, таа веројатно била при крајот на третиот или на почетокот на четвртиот месец од својата бременост.