Дипломците на Гилеад наоѓаат ‚повеќе среќа во давањето‘

ВО НЕДЕЛА, на 6. март 1994, бетелската фамилија од светското седиште на Јеховините сведоци заедно со гостите се собраа по повод една свечена пригода — дипломирањето на 96-от клас на Библиската школа Гилеад на Watchtower. Во своите уводни коментари, претседавачот на програмата, Карл Ф. Клајн, кој служи во Водечкото тело на Јеховините сведоци скоро две децении, им рече на 46-темина студенти: „Исус рекол дека повеќе усреќува давањето отколку примањето. Така ќе биде на вашата мисионерска доделба — колку повеќе ќе давате, толку посреќни ќе бидете“ (Дела 20:35, НС).

Зборови на опомена при разделба

Следуваше серија говори до студентите. Леон Вивер, член на Одборот на службеното одделение, ја изложи темата „Истрајноста го слави Јехова“. Сите ние се соочуваме со искушенија (2. Коринтјаните 6:3-5). „Кога сме под притисок“, забележа брат Вивер, „толку е лесно да се потпреме на себеси“. Меѓутоа, тој ги потсети студентите: „Без оглед каков е испитот со кој морате да се соочите како луѓе, Јехова е заинтересиран. Тој нема никогаш да дозволи да бидете искушани над вашите можности“ (1. Коринтјаните 10:13).

„Секогаш цени ја својата доделба“, беше насловот на следниот говор што го одржа Лајман Свингл од Водечкото тело. Израелците секогаш не избирале самите каде ќе живеат и што ќе прават. На секое племе му било доделено парче земја, а на Левитите им било доделено да извршуваат специфични служби. На сличен начин, многумина во полновремена служба денес — како мисионерите и членовите на бетелската фамилија — не одлучуваат самите каде ќе живеат и која работа ќе ја вршат. Што ако некој чувствува несигурност околу неговата доделба? „Ако гледате внимателно на Главниот Посредник на нашата вера, Исус, и точно го набљудувате неговиот пример, нема да попуштите“, рече брат Свингл (Евреите 12:2, 3).

Потоа следеше Леонард Пирсон од Одборот на фармите на Watchtower, со темата „Остани сосредоточен“. Тој рече: „Можеш да го имаш најдобриот фотоапарат, најубавата сцена, идеална позадина, а сепак да направиш лоша слика — доколку твојот апарат не е фокусиран“. Како еден широкоаголен објектив, нашиот поглед мора да го опфаќа светското проповедање кое се врши. Никогаш не смееме да ја изгубиме од вид комплетната слика. „Оние кои се сосредоточуваат на себеси ќе бидат несреќни на своите доделби“, рече брат Пирсон. „Оние кои се сосредоточуваат на Јехова и на делото што тој им го дал, ќе успеат.“

„Толку многу работи за кои треба да бидеме благодарни“, беше насловот на следниот говор што го одржа Џон Е. Бар, исто така член на Водечкото тело. „Никогаш не губи го чувството на благодарност кон Јехова“, ги советуваше студентите брат Бар. „Тоа е еден од најголемите извори на задоволство, без разлика каква доделба имаш.“ Благодарниот став го поттикнал Давид да напише: „Меѓите ми паднаа на најубавото; зашто наследството ми е најубаво“ (Псалм 15:6). „Имате таков ценет посед да се чувствувате блиску до Јехова во вашиот секојдневен живот“, рече брат Бар. „Јехова нема никогаш да ви го одземе тој однос сѐ додека на тоа гледате како на нешто многу угодно за кое сте благодарни.“

Потоа зборуваше Џек Редфорд, инструктор на Гилеад, на темата „Како ќе го употребиш својот јазик“. Колкава штета може да предизвика непромислениот говор! (Изреки 18:22). Како може јазикот да се стави под контрола? „Првин морате да го истренирате својот ум“, одговори брат Редфорд, „затоа што јазикот го одразува умот и срцето“ (Матеј 12:34-37). Исус дал извонреден пример; го користел својот јазик за да го велича Јеховиното име. „Денес постои глад за слушање на Јеховините зборови“, му рече брат Редфорд на класот. „Вие ги знаете тие зборови. Го имате ‚јазикот на поучените‘ (НС). Затоа, нека вашиот јазик секогаш биде воден од ум и срце кои му се потполно посветени на Јехова“ (Исаија 50:4).

Важноста на молитвата беше нагласена во говорот „Дали одиш како во Јеховина присутност?“ Јулизис Глас, регистратор на школата, забележа: „Ако еден татко работи напорно за да го издржува своето семејство, но никогаш не им зборува и никогаш не кажува изрази на наклоност, неговото семејство би можело да заклучи дека неговиот мотив е неугодна обврска, а не љубов. Така е и со нас. Можеме да бидеме зафатени во Божјата служба, но ако не се молиме, тогаш сме се предале само на едно дело, а не на небесниот Татко полн со љубов“.

Теодор Џерес од Водечкото тело говореше на темата „Зошто му се придружуваат мноштва на Божјиот народ“. Секоја година, стотици илјади се слеваат во Јеховината организација (Захарија 8:23). Што ги идентификува Јеховините сведоци како Божји народ? Како прво, тие ја прифаќаат целата Библија како Божја Реч (2. Тимотеј 3:16). Второ, политички се неутрални (Јован 17:16). Трето, сведочат за Божјето име (Јован 17:26). Четврто, покажуваат самопожртвувана љубов (Јован 13:35; 15:13). Со овие препораки, можеме смело да ги ‚возвестуваме совршенствата на Оној, Кој нѐ повикал од темнина во Својата чудна светлина‘ (1. Петрово 2:9).

По овие возбудливи говори, сите 46 студенти добија дипломи. Доделени се во 16 земји ширум земјината топка.

Разновидна попладневна програма

Попладнето, Доналд Кребс од Одборот на Бетелот водеше скратена студија на Стражарска кула. Потоа дипломците прикажаа програма со наслов „Мудроста постојано вика гласно на самата улица“ (Изреки 1:20, НС). Тие повторно оживеаја вредни искуства што ги имале и на улица и на деловни подрачја. Навистина, Јехова ги благословува оние кои собираат храброст да сведочат неформално. „Радо нѐ споредувам со српови во рацете на ангелски жетвари“, рече еден дипломец. „Колку се поостри нашите вештини, за толку поголемо дело можат да нѐ употребат ангелите.“ (Спореди Откровение 14:6.) Студентската програма вклучуваше и прикажување на дијапозитиви кои ја поведоа публиката на образовно патување во Боливија, Малта и Тајван — три од земјите во кои се испратени дипломците од овој клас.

Потоа беа интервјуирани Валас и Џејн Ливеранс, кои 17 години служат како мисионери. Во октомври 1993 беа повикани на фармите на Watchtower, каде што братот Ливеранс сега служи како еден од инструкторите на Гилеад.

Следуваше претстава од четири сцени, со наслов „Да им се оддава почит на достојните во нивните постари години“. Како што луѓето стареат, стравот дека човек ќе стане бескорисен и отфрлен може да ја нагризе нивната самодоверба (Псалм 70:9). Оваа трогателна претстава покажа како можат сите во собранието да ги поддржуваат таквите верни кои остареле.

После завршната песна и молитва, сите 6.220 присутни во конгресната сала во Њу Џерси и во придружните сали се чувствуваа освежени. Во нашите молитви ќе бидеме со дипломците на нивните нови доделби. Нека продолжат и понатаму да ја доживуваат поголемата среќа која произлегува од давањето.

[Рамка на страница 26]

Податоци за класот

Број на застапени земји: 9

Број на земји во кои се доделени: 16

Број на студенти: 46

Просечна старост: 33,85

Просек на години во вистината: 16,6

Просек на години во полновремена служба: 12,2

[Рамка на страница 27]

Поглед на Малта

ДОЛГИ ГОДИНИ т. н. христијанство на Малта ја премолчувало библиската вистина. Последните мисионери на Гилеад кои беа испратени таму, Фредерик Смедли и Питер Браидл, во 1947 дипломираа во осмиот клас. Меѓутоа, беа уапсени и протерани од Малта набргу по пристигнувањето. 1948 Yearbook of Jehovah’s Witnesses (Годишникот на Јеховините сведоци за 1948) известува: „Овие двајца мисионери поминаа исто толку време по судовите и со службениците на земјата колку во извршувањето на нивната службена должност, и тоа поради противењето од страна на римокатоличката хиерархија. Свештениците велат дека Малта им припаѓа на католиците и дека сите останати мораат да се чистат оттаму“. Сега, околу 45 години подоцна, четворица мисионери од 96. клас на Гилеад се доделени на Малта.

[Слика на страница 26]

96. клас дипломци на Библиската школа Гилеад на Watchtower

Во долната листа, редовите се нумерирани однапред наназад, а имињата се наведени одлево надесно во секој ред.

1) Елерс, П.; Гизе, М.; Зелман, Ш.; Зуспереги, Ж.; Роу, С.; Џексон, К.; Скот, Т. 2) Лиер, Т.; Гарсија, И.; Гарсија, Х.; Фернандез, А.; Дејвидсон, Л.; Лидеман, П.; Гибсон, Л.; Хуарез, К. 3) Фаутс, К.; Пастрана, Г.; Клосон, Д.; Фернандез, Л.; Волс, М.; Дресен, М.; Пастрана, Ф.; Баркс, Џ. 4) Баркс, Д.; Скот, С.; Џексон, М.; Мори, Х.; Хуарез, Л.; Зуспереги, А.; Брушон, К.; Роу, К. 5) Зелман, К.; Лидеман, П.; Дејвидсон, К.; Мори, С.; Волс, Д.; Дресен, Д.; Скафсма, Г.; Лиер, Ш. 6) Клосон, Т.; Гибсон, Т.; Гизе, К.; Елерс, Д.; Фаутс, Р.; Скафсма, Ш.; Брушон, Л.