На кој начин патувачките надгледници служат како верни управители
„Служете си еден на друг, секој со дарот што го примил, како добри распоредници [управители, НС] на разнообразната Божја благодат“ (1. ПЕТРОВО 4:10).
1, 2. а) Како би го дефинирал зборот „управител“? б) Кои спаѓаат во управителите што ги користи Бог?
ЈЕХОВА ги користи сите верни христијани како управители. Еден управител честопати е слуга кој е одговорен за некое домаќинство. Тој може да управува и со деловните работи на својот господар (Лука 16:1—3; Галатјаните 4:1, 2). Своето тело од лојални помазаници на Земјата, Исус го нарекол ‚верен слуга [управител, НС]‘. На овој управител тој му го доверил „целиот свој имот“, вклучувајќи ги и активностите на проповедање на Царството (Лука 12:42—44; Матеј 24:14, 45).
2 Апостол Петар рекол дека сите христијани се управители на Божјата незаслужена љубезност, која се пројавува на разни начини. Секој христијанин има место на кое може да извршува верно управителство (1. Петрово 4:10). Наименуваните христијански старешини се управители, меѓу кои спаѓаат и патувачките надгледници (Тит 1:7). Како треба да се гледа на овие патувачки надгледници? Кои особини и цели треба да ги имаат тие? И како можат да го постигнат она што е најдобро?
Благодарни за нивната служба
3. Зошто патувачките надгледници можат да бидат наречени „добри управители“?
3 Пишувајќи до еден патувачки надгледник и до неговата сопруга, една христијанска брачна двојка рекла: „Би сакале да ја изразиме нашата благодарност за сето време и љубов што ни ги посветивте. Како семејство, извлековме огромна корист од сето ваше охрабрување и совет. Знаеме дека мораме да продолжиме да растеме духовно, но со Јеховина помош и со браќа и сестри како вас, проблемите во почетокот се полесни“. Ваквите изрази се чести затоа што патувачките надгледници покажуваат личен интерес за соверниците, исто како што еден добар управител добро се грижи за потребите на едно домаќинство. Некои се истакнати говорници. Многумина се извонредни во делото на проповедање, додека, пак, други се познати по својата срдечност и сочувство. Негувајќи ги и користејќи ги ваквите дарови во служењето на другите, патувачките надгледници можат со право да бидат наречени „добри управители“.
4. Кое прашање ќе биде разгледано сега?
4 „Од управниците . . . се бара секој од нив да се покаже верен“ — напишал апостол Павле (1. Коринтјаните 4:2). Да им се служи на сохристијаните во различни собранија од седмица в седмица, претставува единствена и радосна предност. Меѓутоа, тоа е и тешка одговорност. Тогаш, како можат патувачките надгледници верно и успешно да го извршуваат своето управителство?
Успешно извршување на своето управителство
5, 6. Зошто ослонувањето на Јехова во молитва е толку важно во животот на еден патувачки надгледник?
5 Ослонувањето на Јехова во молитва е битно за патувачките надгледници да бидат успешни управители. Поради нивниот распоред и многуте одговорности, тие би можеле понекогаш да се чувствуваат притиснати. (Спореди 2. Коринтјаните 5:4.) Затоа, треба да постапуваат во склад со песната на псалмистот Давид: „Фрли го своето бреме на Јехова, и тој самиот ќе те поткрепи. Никогаш нема да дозволи праведникот да се тетерави“ (Псалм 55:22, НС). Исто така, утешни се и Давидовите зборови: „Нека е благословен Јехова, кој секојдневно го носи товарот за нас“ (Псалм 68:19, НС).
6 Од каде ја добивал Павле силата да се грижи за своите духовни одговорности? „За сѐ имам сила преку оној кој ми дава моќ“ — напишал тој (Филипјаните 4:13, НС). Да, Јехова Бог бил Изворот на Павловата сила. На сличен начин, Петар советувал: „Ако некој служи, нека служи според силата, која Бог ја дава, та во сѐ да се прослави Бог преку Исуса Христа“ (1. Петрово 4:11). Еден брат кој многу години бил патувачки надгледник, ја нагласил потребата од ослонување на Бог, наведувајќи: „Секогаш гледај на Јехова при решавањето на проблемите и барај ја помошта од неговата организација“.
7. На кој начин урамнотеженоста игра улога во делото на еден патувачки надгледник?
7 Од еден успешен патувачки надгледник се бара урамнотеженост. Како останатите христијани, и тој се стреми да ‚се увери во поважните работи‘ (Филипјаните 1:10, НС).a Кога локалните старешини имаат прашања околу некоја работа, мудро е да се консултираат со покраинскиот надгледник кој е во посета (Изреки 11:14; 15:22). Неговите урамнотежени забележувања и библискиот совет веројатно ќе се покажат како многу корисни додека старешините продолжуваат да ја решаваат работата откако тој заминал од собранието. Нешто слично на тоа му рекол Павле на Тимотеј: „Сѐ, што си чул од мене пред многу сведоци, предај го на верни луѓе, кои се способни и други да научат“ (2. Тимотеј 2:2).
8. Зошто се битни библиската студија, истражувањето и медитирањето?
8 Проучувањето на Библијата, истражувањето и медитирањето се услови за да се даде здрав совет (Изреки 15:28, НС). Еден обласен надгледник рекол: „Кога се состануваме со старешините, не треба да се плашиме да признаеме дека не го знаеме одговорот на некое одредено прашање“. Вложувањето напор за да се стекне ‚умот Христов‘ во врска со некоја работа овозможува да се даде совет темелен на Библијата, кој ќе им помогне на другите да се потчинат на Божјата волја (1. Коринтјаните 2:16). Понекогаш, некој патувачки надгледник треба да пишува до Watch Tower Society барајќи упатство. Како и да е, верата во Јехова и љубовта кон вистината се далеку поважни од имиџот или речитоста. Наместо да доаѓа со „возвишена проповед или мудрост“, Павле ја почнал својата служба во Коринт „во немоќ, и страв, и во голем трепет“. Дали тоа го направило неделотворен? Напротив, тоа им помогнало на коринтјаните да имаат вера „не во човечка мудрост, туку во силата Божја“ (1. Коринтјаните 2:1—5).
Други битни особини
9. Зошто е потребно соживување од страна на патувачките старешини?
9 Соживувањето им помага на патувачките надгледници да постигнат добри резултати. Петар ги поттикнал сите христијани да ‚покажуваат сочувство‘ или да бидат „сочувствителни“ (1. Петрово 3:8, НС, фуснота). Еден покраински надгледник чувствува потреба да ‚биде заинтересиран за секого во собранието и да биде искрено внимателен‘. Со сличен дух, Павле напишал: „Радувајте се со радосните, и плачете со расплаканите“ (Римјаните 12:15). Таквиот став ги поттикнува патувачките надгледници да вложуваат сериозни напори да ги разберат проблемите и околностите на соверниците. Тогаш можат да дадат изградувачки библиски совет што може да постигне вистинско добро, доколку се примени. Еден покраински надгледник кој е извонреден во покажувањето соживување, го добил следново писмо од едно собрание близу Торино (Италија): „Ако сакаш да бидеш интересен, биди заинтересиран; ако сакаш покрај тебе да уживаат, биди пријатен; ако сакаш да бидеш сакан, биди достоен за љубов; ако сакаш да ти се помогне, биди спремен да помогнеш. Токму ова го научивме од тебе!“
10. Што рекле некои покраински и обласни надгледници во врска со тоа да се биде понизен, и каков пример дал Исус во овој поглед?
10 Ако бидат понизни и пристапливи, тоа ќе им помогне на патувачките надгледници да постигнат многу добри резултати. Еден покраински надгледник забележал: „Многу е важно да се задржи понизен став“. Тој би ги предупредил новите патувачки надгледници: „Не дозволувајте си премногу да бидете под влијание на побогатите браќа поради она што тие би можеле да го сторат за вас, ниту го ограничувајте своето пријателство на таквите, туку тежнејте секогаш да постапувате непристрасно со другите“ (2. Летописи 19:6, 7). Еден навистина понизен патувачки надгледник нема да има превисоко гледиште за својата лична важност како претставник на Друштвото. Еден обласен надгледник прикладно коментирал: „Биди понизен и спремен да ги сослушаш браќата. Секогаш биди пристаплив“. Како најголем човек кој некогаш живеел, Исус Христос можел да ги наведе луѓето да се чувствуваат неугодно, но тој бил толку понизен и пристаплив што дури и децата се чувствувале угодно во негово присуство (Матеј 18:5; Марко 10:13—16). Патувачките надгледници сакаат децата, тинејџерите, постарите — всушност секој еден во собранието — да се чувствуваат слободни да им пристапат.
11. Каков може да биде учинокот од едно извинување кога тоа е потребно?
11 Се разбира, „сите ние многу грешиме“, и ниеден патувачки надгледник не е имун на правењето грешки (Јаков 3:2). Кога тие ќе направат грешка, едно искрено извинување им дава на останатите старешини пример за понизност. Според Изреки 22:4 (НС), „резултатот на понизноста и [полниот со почит] страв од Јехова е богатство и слава и живот“. И зарем не треба сите Божји слуги ‚понизно да одат со својот Бог‘ (Михеј 6:8, НС, издание од 1960 година). Кога бил запрашан каков совет би имал за некој нов патувачки старешина, еден покраински надгледник коментирал: „Имај висока почит и обѕир спрема сите браќа и сметај ги за подобри од себе. Ќе научиш многу од браќата. Остани понизен. Биди природен. Не прави се важен“ (Филипјаните 2:3).
12. Зошто ревноста за христијанската служба е толку значајна?
12 Ревноста за христијанската служба им придава тежина на зборовите на еден патувачки надгледник. Всушност, кога тој и неговата сопруга даваат ревносни примери во делото на евангелизација, старешините, нивните сопруги и остатокот од собранието се охрабрени да покажуваат ревност во својата служба. „Биди ревносен за службата“ — поттикнал еден покраински надгледник. „Увидов дека, општо земено, колку поревносно е едно собрание во службата толку помалку проблеми ќе доживува.“ Еден друг покраински надгледник забележал: „Верувам дека ако старешините работат на подрачјето со браќата и сестрите и им помагаат да се радуваат на службата, тоа ќе доведе до мир во мислите и до најголемото задоволство во служењето на Јехова“. Апостол Павле ‚се ослободил [собрал храброст, НС] да им го проповеда Божјето Евангелие на солунјаните со голем труд‘. Не е ни чудо што тие имале убави спомени за неговата посета и за проповедничката активност и што копнееле повторно да го видат! (1. Солунјаните 2:1, 2; 3:6).
13. Што зема во обѕир еден патувачки надгледник кога работи со сохристијаните во службата на подрачјето?
13 Кога работи со сохристијаните во службата на подрачјето, патувачкиот надгледник ги зема во обѕир нивните околности и ограничувања. Иако неговите предлози може да се корисни, тој знае дека некои можеби имаат трема кога проповедаат со еден искусен старешина. Затоа, во извесни случаи, може да е покорисно охрабрување отколку совет. Кога ги придружува објавителите или пионерите на некоја библиска студија, можеби тие претпочитаат тој да ја води. Тоа веројатно ќе ги запознае со некои начини за подобрување на нивните методи на поучување.
14. Зошто може да се рече дека ревносни патувачки надгледници поттикнуваат ревност кај другите?
14 Ревносните патувачки надгледници поттикнуваат ревност кај другите. Еден покраински надгледник од Уганда цел час пешачел низ густата шума, со цел да придружува еден брат на една библиска студија која слабо напредувала. За време на нивното пешачење, толку изобилно врнело што тие пристигнале изводенети до кожа. Кога семејството од шест члена дознало дека нивниот посетител е патувачки надгледник, биле многу импресионирани. Знаеле дека слугите од нивната црква никогаш не би покажале толкав интерес за стадото. Следната недела, тие присуствувале на својот прв состанок и изразиле желба да станат Јеховини сведоци.
15. На какво убаво доживување се радувал еден ревносен покраински надгледник од Мексико?
15 Во мексиканската држава Оаксака, еден покраински надгледник вложил напор што навистина не се очекувал од него. Договорил да престојува четири ноќи во една затворска ќелија, со цел да посети една група од седуммина затвореници кои станале објавители на Царството. Неколку дена тој ги придружувал овие затвореници додека тие сведочеле од ќелија до ќелија и воделе библиски студии. Поради покажаниот интерес, некои од овие студии траеле до доцна во ноќта. „На крајот од посетата, затворениците и јас се чувствувавме исполнети со радост како резултат од взаемното охрабрување“ — пишува овој ревносен покраински надгледник.
16. Зошто е толку корисно кога патувачките надгледници и нивните сопруги даваат охрабрување?
16 Патувачките надгледници се трудат да бидат охрабрувачки. Кога Павле ги посетил собранијата во Македонија, тој ‚ги охрабрил со многу зборови‘ (Дела 20:1, 2, НС). Зборовите на охрабрување можат да бидат многу корисни во насочувањето и на младите и на старите кон духовни цели. Во една голема канцеларија на подружница на Watch Tower Society, една неформална анкета открила дека покраинските надгледници охрабриле скоро 20 отсто од доброволците да стапат во полновремена служба. Со својот добар пример како полновремен објавител на Царството, сопругата на патувачкиот надгледник исто така се покажува како голем извор на охрабрување.
17. Како се чувствува еден постар покраински надгледник во врска со својата предност да им дава помош на другите?
17 На постарите лица и на потиштените души особено им е потребно охрабрување. Еден постар покраински надгледник пишува: „Фасетата на моето дело што создава неискажлива внатрешна радост е предноста да им давам помош на неактивните и на немоќните меѓу Божјето стадо. Зборовите од Римјаните 1:11, 12 имаат посебно значење за мене, бидејќи црпам огромно охрабрување и сила додека им ‚предавам некој духовен дар за нивно зацврстување‘“.
Награди од нивното радосно дело
18. Какви библиски цели имаат патувачките надгледници?
18 Патувачките надгледници ги имаат на срце најдобрите интереси на соверниците. Тие сакаат да ги зајакнат собранијата и да ги изградат духовно (Дела 15:41). Еден патувачки надгледник работи напорно „за да даде охрабрување, да обезбеди освежување и да ја унапреди желбата да се исполни службата и понатаму да се живее според вистината“ (3. Јованово 3). Еден друг настојува да ги стабилизира своите соверници во верата (Колосјаните 2:6, 7). Запомни дека патувачкиот надгледник претставува ‚искрен сотрудник‘, а не господар над верата на другите (Филипјаните 4:3; 2. Коринтјаните 1:24). Неговата посета е прилика за охрабрување и за додатна активност, како и прилика за старешинството да го прегледа напредокот што е направен и да ги разгледа идните цели. Собраниските објавители, пионерите, слугите помошници и старешините можат да очекуваат од неговите зборови и пример да бидат изградени и поттикнати за делото што претстои. (Спореди 1. Солунјаните 5:11, НС.) Затоа, со цело срце поддржувај ги посетите од покраинскиот надгледник и искористи ја во потполност службата што ја врши обласниот надгледник.
19, 20. На кој начин патувачките надгледници и нивните сопруги се наградени поради нивната верна служба?
19 Патувачките надгледници и нивните сопруги се богато благословени поради нивната верна служба, и можат да бидат уверени дека Јехова ќе ги благослови поради доброто кое го прават (Изреки 19:17; Ефесјаните 6:8). Георг и Магдалена се една постара двојка која многу години служела во патувачкото дело. На еден конгрес во Луксембург, на Магдалена ѝ пристапила една жена на која таа ѝ сведочела пред повеќе од 20 години. Интересот на Еврејката за вистината бил поттикнат од библиската литература што ѝ ја оставила Магдалена и, со текот на времето, таа се крстила. На Георг му пристапила една духовна сестра која се сетила на неговата посета во нејзиниот дом пред скоро 40 години. Неговата одушевена презентација на добрата вест на крајот ги навела и неа и нејзиниот сопруг да ја прифатат вистината. Излишно е да се рече дека и Георг и Магдалена биле пресреќни.
20 Плодната служба на Павле во Ефес му донела радост и можеби го поттикнала да ги цитира Исусовите зборови: „Поблажено е [Повеќе усреќува, НС] да се дава, отколку да се зема“ (Дела 20:35). Со оглед на тоа дека патувачкото дело вклучува постојано давање, оние кои се ангажираат во него доживуваат среќа, особено кога ќе станат свесни за добрите резултати од својот труд. На еден покраински надгледник кој му помогнал на еден обесхрабрен старешина, во едно писмо му било речено: „Ти беше огромна ‚зајакнувачка помош‘ во мојот духовен живот — повеќе отколку што си свесен . . . Никогаш нема потполно да знаеш колкава помош му беше ти на еден современ Асаф, чиишто ‚нозе за малку ќе скршнеле‘“ (Колосјаните 4:11; Псалм 73:2, обата НС).
21. Зошто би рекол дека 1. Коринтјаните 15:58 се применува на активностите на патувачките надгледници?
21 Еден постар христијанин кој со години бил во покраинското дело, сака да мисли на 1. Коринтјаните 15:58, каде што Павле поттикнал: „Бидете цврсти, непоколебливи и секогаш богати [изобилно вработени, НС] во делото Господово, знаејќи дека трудот ваш пред Господа нема да биде залуден“. Патувачките надгледници сигурно имаат многу работа во Господовото дело. И колку само сме благодарни што служат толку радосно како верни управители на Јеховината незаслужена љубезност!
[Фуснота]
a Види ја статијата „Дали можеш да бидеш среќен ако многу работиш?“ во Стражарска кула од 15 мај 1991, страници 28—31.
Како би одговорил?
◻ Зошто можат патувачките надгледници да бидат сметани за „добри управители“?
◻ Кои се некои фактори кои им помагаат на покраинските и на обласните надгледници да постигнат многу добри ефекти?
◻ Зошто понизноста и ревноста се толку важни за оние кои се ангажираат во патувачкото дело?
◻ Кои добри цели ги имаат патувачките надгледници?
[Слика на страница 16]
Патувачките надгледници настојуваат да ги охрабрат соверниците
[Слики на страница 17]
Млади и стари подеднакво можат да извлечат корист од дружењето со патувачките надгледници и нивните сопруги
[Слика на страница 18]
Ревносната служба на патувачкиот надгледник ја унапредува ревноста кај другите