Објавителите на Царството известуваат

Ширење на семето на Царството во секоја прилика

БОЖЈАТА Реч, Библијата, охрабрува на трудољубивост. Цар Соломон рекол: „Изутрина сеј го семето и навечер нека [не] ти мируваат рацете твои, зашто не знаеш, едното, или другото повеќе ќе успее, или едното и другото ќе бидат еднакво добри“ (Проповедник 11:6).

Во секоја погодна прилика, Јеховините сведоци сеат ‚семе‘ со тоа што ја проповедаат добрата вест за Божјето Царство. Во повеќе од 230 земји и островски групи, тие продолжуваат „без престанок да поучуваат и да ја објавуваат добрата вест за Христос, Исус“ (Дела 5:42, НС). Следниве искуства илустрираат на кој начин на Јеховините сведоци ‚не им мируваат рацете‘ во делото на проповедање.

◻ Во Република Зелен Нос, еден Јеховин сведок минувал покрај еден затвор додека ја извршувал службата на подрачјето. Во затворскиот двор, некои затвореници биле седнати на едно дрво. Кога го забележале Сведокот долу, затворениците побарале списанија. Сведокот врзал за еден камен неколку списанија Стражарска кула и Разбудете се! и ги фрлил преку ѕидот на затворот. Како резултат на овој почетен интерес, биле започнати 12 библиски студии. Тројца од затворениците му ги предале своите животи на Бог и се претставиле за крштавање во вода. Сега, еден од затворениците служи како полновремен евангелизатор, односно пионер, повеќе од една година. Но, како ги извршуваат своите активности на служба на подрачјето во затвор? Најпрвин затворот е поделен на подрачја. Потоа, подрачјето се дели меѓу тројцата Сведоци и се обработува од ќелија до ќелија. Овие објавители на Царството го следат интересот на многу сличен начин како што прават Јеховините сведоци ширум светот — вршејќи повторни посети. Меѓутоа, една разлика е зачестеноста со која се водат библиските студии. Наместо да ја проучуваат Библијата само еднаш или двапати седмично околу еден час, некои затвореници проучуваат секој ден! Освен тоа, генералниот директор на затворот им дал дозвола на Сведоците да ги водат сите собраниски состаноци внатре во затворот.

◻ Една жена од Португалија наследила некои публикации на Watch Tower после смртта на баба ѝ. Бидејќи таа не била Јеховин сведок, не се заинтересирала да ги задржи книгите. Меѓутоа, не сакала да ги уништи. Еден ден, кога кај неа дошла една жена Јеховин сведок која одела во службата од куќа до куќа, таа ѝ кажала за библиотеката. Жената Сведок ја запрашала дали има претстава за вистинската вредност на библиотеката. Жената одговорила: „Всушност, јас не ја знам нивната вистинска вредност, но како можам да ја дознаам?“ Жената прифатила библиска студија и наскоро почнала да ја цени библиотеката на баба ѝ. Сега и таа е крстен Јеховин сведок. Освен тоа, нејзината ќерка и еден близок пријател на семејството исто така ја проучуваат Библијата. Колку само скапоцено наследство се покажала оваа збирка книги!