Како Водечкото тело се разликува од една законска корпорација
ГОДИШНИТЕ состаноци на Watch Tower Bible and Tract Society of Pennsylvania се одржуваат уште од јануари 1885 година. Кога при крајот на 19 век се вршеше собирањето на помазаните христијани, директорите и вршителите на должности на оваа корпорација имаа небесна надеж. Всушност, тоа беше случај речиси секогаш.
Имаше само еден исклучок. Во 1940 за директор на Заедницата беше избран Хајдн К. Ковингтон — тогашен правен застапник на Заедницата, кој беше од ‚другите овци‘, со земна надеж (Јован 10:16). Тој служеше како потпретседател од 1942 до 1945. Во тоа време, брат Ковингтон се повлече од местото директор за да се подложи на она што тогаш се чинеше дека е Јеховина волја — сите директори и вршители на должности на корпорацијата Пенсилванија да бидат помазани христијани. Лајман А. Свингл го замени Хајдн К. Ковингтон во одборот директори, а Фредерик В. Франц беше избран за потпретседател.
Зошто Јеховините слуги сметаа дека сите директори и вршители на должности на Watch Tower Bible and Tract Society of Pennsylvania треба да бидат помазани христијани? Бидејќи во тоа време, одборот директори и вршители на должности од корпорацијата Пенсилванија беше тесно идентификуван со Водечкото тело на Јеховините сведоци, кое отсекогаш било составено само од мажи помазани со дух.
Историски годишен состанок
На годишниот состанок одржан на 2 октомври 1944 во Питсбург, членовите на корпорацијата Пенсилванија усвоија шест резолуции со кои ја изменија нејзината повелба. Според повелбата, на оние кои приложуваат средства за делото на Заедницата требаше да им се дадат гласачки акции, но со третиот амандман оваа подготовка беше отстранета. Во еден извештај од тој годишен состанок беше забележано: „Членството во Заедницата ќе се ограничи најмногу на 500 . . . Сите избрани мора да бидат полновремени слуги на Заедницата или хонорарни слуги на едно здружение [собрание] на Јеховините сведоци и мораат да го покажуваат духот на Господ“.
Во склад со ова, директорите на Заедницата требаше да бидат изгласани на нивната положба од поединци кои му беа целосно посветени на Јехова, без оглед на сумата пари што ја приложуваа за унапредување на делото на Царството. Ова испадна во склад со прогресивните прочистувања претскажани во Исаија 60:17, каде што читаме: „Место бакар, ќе донесам сребро; место дрва, бакар, место камен, железо, Мирот ќе го поставам за твој главатар, Правдата за владетел“. Осврнувајќи се на ‚главатари‘ и ‚владетели‘, ова пророштво укажа на подобрувањата во организациските процедури кај Јеховиниот народ.
До овој важен чекор во теократското престројување на организацијата дојде на крајот од ‚две илјади и три стотините вечери и утра‘, спомнати во Даниел 8:14. Во тоа време, „Светилиштето“ беше „очистено“.
Меѓутоа, по историскиот годишен состанок во 1944 остана едно витално прашање. Со оглед на тоа што тогаш Водечкото тело беше тесно идентификувано со седумчлениот одбор директори на корпорацијата Пенсилванија, дали ова значеше дека Водечкото тело никогаш не би можело да биде составено од повеќе од седуммина помазани христијани? Освен тоа, со оглед на тоа што директорите беа избирани од членовите на корпорацијата, дали членовите на корпорацијата избираа членови на Водечкото тело на годишниот состанок секоја година? Дали директорите и вршителите на должностите на Watch Tower Bible and Tract Society of Pennsylvania и членовите на Водечкото тело се едно исто, или се различни?
Друг незаборавен годишен состанок
Овие прашања беа одговорени на годишниот состанок одржан на 1 октомври 1971. Во таа прилика, еден од говорниците истакна дека водечкото тело на „верниот и разборит роб“ веќе стотици години му претходи на Watch Tower Bible and Tract Society of Pennsylvania (Матеј 24:45-47). Водечкото тело било формирано на Пентекост 33 н.е., повеќе од 18 века пред да настане корпорацијата Пенсилванија. Во почетокот, водечкото тело не се состоело од 7 мажи туку од 12 апостоли. Очигледно, неговиот број подоцна се зголемил, зашто водството го презеле ‚апостолите и старешините во Ерусалим‘ (Дела 15:2).
Во 1971 истиот говорник објасни дека членовите на Watch Tower Society не би можеле да ги изгласаат членовите на наименуваното Водечко тело. Зошто? „Бидејќи“, рече тој, „водечкото тело на класата на ‚робот‘ не е наименувано од човек. Тоа е наименувано од . . . Исус Христос, Главата на вистинското христијанско собрание и Господарот на класата на ‚верниот и разборит роб‘.“ Значи, јасно е дека членовите на Водечкото тело не можат да бидат изгласани на нивните положби од членовите на која и да било законска корпорација.
Во продолжение, говорникот ја даде оваа многу значајна изјава: „Водечкото тело нема вршители на должности како што има Одборот директори на Заедницата, имено, претседател, потпретседател, секретар–благајник и помошник секретар-благајник. Тоа има само претседавач“. Многу години, претседателот на корпорацијата Пенсилванија беше и најистакнат член на Водечкото тело. Ова повеќе нема да биде случај. Иако не се еднакви во искуството или способноста, членовите на Водечкото тело ќе бидат еднакви во одговорноста. Говорникот додаде: „Секој член на водечкото тело може да биде претседавач без да биде истовремено претседател на . . . Заедницата . . . Сето тоа зависи од ротациониот систем за претседавач во Водечкото тело“.
На тој незаборавен годишен состанок во 1971 беше подвлечена една јасна разлика меѓу членовите на Водечкото тело помазани со дух и директорите на корпорацијата Пенсилванија. Сепак, членовите на Водечкото тело продолжија да служат како директори и вршители на должности на Заедницата. Меѓутоа, денес се поставува прашањето: Постои ли некаква библиска причина директорите на Watch Tower Bible and Tract Society of Pennsylvania да мораат да бидат членови на Водечкото тело?
Одговорот е „не“. Корпорацијата Пенсилванија не е единствениот законски ентитет кој го користат Јеховините сведоци. Има и други. Еден е Watchtower Bible and Tract Society of New York, Incorporated. Тој го олеснува нашето дело во Соединетите Држави. Очигледно Јеховиниот благослов е врз таа корпорација, иако нејзините директори и вршители на должности главно се од ‚другите овци‘. Во Британија се користи International Bible Students Association. Се користат и други законски ентитети за да се унапредуваат интересите на Царството во другите земји. Сите тие сложно помагаат и имаат улога во проповедањето на добрата вест по целата Земја. Сеедно каде се лоцирани или кои служат како директори или вршители на должности, овие ентитети теократски ги води и ги користи Водечкото тело. Значи, тие ентитети имаат свои доделени задачи во унапредувањето на интересите на Царството.
За нас е корисно тоа што имаме законски ентитети. На тој начин им се покоруваме на локалните и на националните закони, како што бара Божјата реч (Еремија 32:11; Римјаните 13:1). Законските ентитети го олеснуваат нашето дело на ширење на пораката за Царството преку печатење Библии, книги, списанија, брошури и друг материјал. Тие ентитети служат и како законски инструменти во справувањето со работи поврзани со сопственост на имоти, акции за помош, договори за користење конгресни објекти итн. Ние сме благодарни за услугите на тие законски ентитети.
Јеховиното име во преден план
Во 1944 беше изменет Член II од повелбата на Watch Tower Bible and Tract Society of Pennsylvania за да се подвлечат целите на оваа корпорација. Според повелбата, во целите на Заедницата спаѓа и оваа главна цел: „Да се проповеда евангелието за Божјето Царство под Христос Исус на сите нации како сведоштво за името, речта и превласта на Семоќниот Бог ЈЕХОВА“.
Од 1926, ‚верниот роб‘ го става во преден план Јеховиното име. Особено вредна за внимание е 1931 година кога Библиските студенти го усвоија името Јеховини сведоци (Исаија 43:10-12). Меѓу публикациите на Заедницата кои ставија нагласок на Божјето име беа книгите Jehovah (Јехова, 1934), „Let Your Name Be Sanctified“ („Да се свети Твоето име“, 1961) и „The Nations Shall Know That I Am Jehovah“—How? („Нациите ќе познаат дека Јас сум Јехова“ — како?, 1971).
Посебно мора да се спомне Превод Нов свет на Светото писмо, издаден во целост на англиски во 1960. Тој го содржи Јеховиното име на секое место каде што во Хебрејските списи се појавува Тетраграматонот. Овој превод го вклучува божественото име и на оние 237 места во Христијанските грчки списи за кои грижливата анализа покажа дека тоа е оправдано. Колку сме само благодарни што, на различни начини, Јехова дозволува ‚робот‘ и неговото Водечко тело да ги користат своите издавачки куќи и законски ентитети за да се објавува неговото име по целата Земја!
Се унапредува дистрибуирањето на Божјата реч
Јеховиниот народ постојано дава сведоштво за неговото име и ја возвишува неговата Реч издавајќи и дистрибуирајќи милиони публикации темелени на Библијата, како и самата Библија. Во почетокот на 1900-тите, Watch Tower Society стана сопственик на авторско право на The Emphatic Diaglott, грчко-англиско интерлинеарно издание на Христијанските грчки списи од Бенџамин Вилсон. Заедницата го објави изданието на Библиските студенти на King James Version кое вклучува додаток од 500 страници. Во 1942 ја објави King James Version со паралелни стихови. Потоа, во 1944, Заедницата почна да ја печати American Standard Version, издание од 1901, во која се користи божественото име. Името Јехова беше обележје и на The Bible in Living English од Стефан Т. Баингтон, издадена од Заедницата во 1972.
Законските ентитети кои ги користат Јеховините сведоци помагаат во печатењето и дистрибуирањето на сите овие библиски преводи. Меѓутоа, најзначајна е многу блиската соработка меѓу Watch Tower Society и групата помазани Сведоци на Јехова кои го сочинуваат Одборот за преводот Нов свет на Библијата. Се радуваме што, во целина или делумно, до денес се отпечатени повеќе од 106.400.000 примероци од овој превод на 38 јазици. Watch Tower Bible and Tract Society of Pennsylvania е навистина библиска заедница!
‚Верниот роб‘ е ‚наименуван над целиот имот на својот господар‘. Во ова спаѓаат објектите во главното седиште во државата Њујорк (САД) и 110-те подружници кои дејствуваат сега низ целиот свет. Членовите на класата на робот знаат дека тие ќе бидат повикани да положат сметка за начинот на кој го користеле она што им е доверено (Матеј 25:14-30). Сепак, ова не го спречува ‚робот‘ да им дозволи на оспособени надгледници од ‚другите овци‘ да се грижат за законските и административните одговорности. Всушност, ова им овозможува на членовите на Водечкото тело да посветуваат повеќе време „на молитва и на службата на речта“ (Дела 6:4).
Се додека условите во овој свет дозволуваат, Водечкото тело, кое е претставник на „верниот и разборит роб“, ќе ги користи овие законски ентитети. Тие се практични, но не и неопходни. Ако еден законски ентитет со некоја државна одредба се разреши, делото на проповедање сепак ќе продолжи. Дури и сега, во земјите каде се на сила ограничувања и не се користат законски ентитети, пораката за Царството се објавува, се прават ученици, а порастот на теократијата продолжува. Ова е случај бидејќи Јеховините сведоци садат и залеваат, а ‚Бог прави да расте‘ (1. Коринќаните 3:6, 7).
Додека гледаме кон иднината, уверени сме дека Јехова ќе се грижи за духовните и материјалните потреби на својот народ. Тој и неговиот Син, Исус Христос, и понатаму ќе обезбедуваат небесно водство и поддршка кои се потребни за да се доврши делото на проповедање на Царството. Се разбира, сѐ што ќе постигнеме ние како Божји слуги се прави ‚не со воена сила ниту со снага туку со Јеховиниот дух‘ (Захарија 4:6, NW). Затоа, се молиме за божествена помош, знаејќи дека со силата која ја дава Јехова, ќе можеме да го довршиме делото кое тој ни го дал во ова време на крајот!