Како еден син му помогнал на својот татко
ЏЕЈМС, од Англија, кој е во своите рани 30-ти години, има тешки умствени инвалидности и благ аутизам. Сепак, тој многу години ги посетувал состаноците на Јеховините сведоци со мајка си и сестра си. Меѓутоа, татко му никогаш не покажал некој голем интерес за нивните верувања. Една вечер, откако на состанокот имало приказ како да се покани некој познаник на Меморијалот на Христовата смрт, Џејмс брзо отишол во својата соба. Збунета, мајка му отишла по него и го затекла како трескаво пребарува по старите изданија на списанијата Стражарска кула и Разбудете се! Тој избрал едно на кое на последната страница имало копија од поканата за Меморијалот и отрчал кон својот татко. Прво покажал со прст кон сликата и потоа на татко си му рекол: „Ти!“ Мајка му и татко му се погледнале зачудено и сфатиле дека Џејмс го кани својот татко на Меморијалот. Татко му рекол дека можеби ќе дојде.
Вечерта кога требало да се одржи Меморијалот, Џејмс отишол во гардеробата на татко си, избрал еден пар панталони, му ги однел и со гест му покажал да ги облече. Татко му одговорил дека нема да оди на состанокот. Така, Џејмс и мајка му се упатиле сами кон Салата на Царството.
Меѓутоа, по некое време, Џејмс почнал сѐ помалку да соработува кога мајка му се обидувала да го подготви за собраниските состаноци и, наместо тоа, избирал да остане дома со татко си. Потоа, едно неделно утро, Џејмс повторно одбил да соработува кога мајка му се обидела да го подготви за состанок. На нејзино големо изненадување, таткото се свртел кон него и му рекол: „Џејмс, ако денес јас одам на состанок, ќе дојдеш ли и ти?“ Лицето на Џејмс светнало. Тој го прегрнал татко си и му рекол: „Да!“ и сите тројца отишле во Салата на Царството.
Од тој ден, татко му на Џејмс продолжил да ги посетува сите состаноци во недела и набрзо изјавил дека за да напредува, ќе мора да присуствува и на другите состаноци (Евреите 10:24, 25). Тоа и го сторил, и по два месеца почнал редовно да ја проучува Библијата. Брзо напредувал, и ги направил потребните промени во својот живот, па наскоро почнал да учествува во делото на проповедање на Царството. Една година откако почнал да ја проучува Библијата, му го предал својот живот на Јехова и тоа го симболизирал со подронување во вода. Моментално служи како слуга помошник во своето собрание. Сега сите во семејството обединето му служат на Јехова.