Зошто да го препознаеме антихристот?

„Сте чуле дека ќе дојде антихристот“ — напишал вдахновениот апостол пред многу години (1. Јованово 2:18). Овие зборови се навистина интересни! Со векови луѓето се прашувале за нивното значење. Кој е антихристот? Кога ќе дојде? Што ќе прави кога ќе дојде?

НИЗ ГОДИНИТЕ, многумина биле обвинети дека се антихристот. Во минатото, како „антихрист“ биле означени Евреите, католичките папи и римските императори. На пример, кога императорот Фридрих II (1194-1250) одлучил да не учествува во една крстоносна војна што ја водела Црквата, папата Грегориј IX го нарекол антихрист и го исклучил од Црквата. Наследникот на Грегориј, Инокентиј IV, повторно го исклучил од Црквата. За возврат, Фридрих изјавил дека Инокентиј е антихрист.

Апостол Јован е единствениот библиски писател кој го користи зборот „антихрист“. Во две од писмата што го носат неговото име, зборот се појавува пет пати, и во еднина и во множина. Стиховите во кои се појавува зборот се наведени во рамката на следната страница. Од овие стихови, можеме да видиме дека антихристот е лажливец и измамник, кој е решен да го уништи пријателството што некои луѓе го имаат со Христос и со Бог. Затоа, апостолот ги поттикнал сохристијаните: „Сакани, не верувајте ѝ на секоја изјава, која наводно е вдахновена од Бог, туку испитајте дали таквите изјави потекнуваат од Бог, зашто многу лажни пророци излегоа во светот“ (1. Јованово 4:1).

И Исус предупредил дека ќе има измамници, или лажни пророци, кога рекол: „[Тие] доаѓаат кај вас во овчо руно, а однатре се крвожедни волци. По нивните плодови [односно, дела] ќе ги препознаете“ (Матеј 7:15, 16). Дали со овие зборови Исус ги предупредил своите следбеници и во врска со симболичниот антихрист? Да видиме како можеме да го препознаеме овој злобен измамник.