Поучете ги своите деца

Дали некогаш си љубоморен? Браќата на Јосиф биле љубоморни

ДА ПОЗБОРУВАМЕ малку за тоа што значи да се биде љубоморен. Дали некогаш ти било тешко да сакаш некого само затоа што другите рекле дека е добар, убав или паметен?a — Токму тоа може да се случи кога си љубоморен.

Во семејството може да се појави љубомора ако родителите покажуваат поголема наклоност кон некое од децата. Во Библијата читаме за едно семејство во кое љубомората довела до голем проблем. Да видиме каква неволја настанала поради тоа, и што можеме да научиме од тие настани.

Јосиф бил 11-тиот син на Јаков, а неговите полубраќа му биле љубоморни. Знаеш ли зошто? — Затоа што нивниот татко, Јаков, повеќе го сакал Јосиф отколку нив. На пример, Јаков му дал на Јосиф преубава долга облека со риги. Јаков особено го сакал Јосиф ‚зашто му се родил на старост‘ и му бил прво дете од неговата сакана жена, Рахела.

Библијата вели дека, ‚кога Јосифовите браќа виделе дека татко им го сака повеќе од сите нив, го замразиле Јосиф‘. Еден ден тој им кажал на своите домашни дека сонил сон во кој му се поклонуваат сите, вклучувајќи го и татко му. „Неговите браќа почнаа да му љубоморат“, вели Библијата, па дури и татко му го искарал што им кажал за тој сон (1. Мојсеева 37:1-11).

По некое време, кога Јосиф имал 17 години, неговите браќа отишле далеку за да ги пасат овците и козите на својот татко. Затоа, Јаков го испратил Јосиф за да види како се. Знаеш ли што сакале да направат повеќето негови браќа кога виделе дека доаѓа? — Сакале да го убијат! Но, двајца од нив, Рувим и Јуда, не се согласиле со тоа.

Кога оттаму поминале некои трговци, кои оделе за Египет, Јуда рекол: ‚Ајде да го продадеме‘. Така и направиле. Потоа заклале јарец и во неговата крв ја потопиле облеката на Јосиф. Подоцна, кога му ја покажале облеката на неговиот татко, тој извикнал: ‚Лута ѕверка го изела Јосиф!‘ (1. Мојсеева 37:12-36).

Со текот на времето, владетелот на Египет, наречен фараон, го засакал Јосиф. Тоа било затоа што, со Божја помош, го протолкувал значењето на двата сона што ги сонил фараонот. Првиот сон бил за седум здрави крави по кои оделе седум болни крави. Во вториот сон видел седум здрави и седум исушени класови жито. Јосиф рекол дека двата сона значеле дека седум години ќе има добра жетва, а по нив ќе настапат седум години глад. По наредба на фараонот, Јосиф бил задолжен да го надгледува складирањето храна додека траеле седумте години изобилство, и со тоа да се направи подготовка за гладот.

Кога настапил глад, на фамилијата на Јосиф, која живеела многу далеку, ѝ била потребна храна. Затоа, Јаков ги испратил во Египет десетте постари браќа на Јосиф за да донесат храна. Тие дошле пред Јосиф, но не го препознале. Без да им се открие кој е тој, Јосиф ги испитал и сфатил колку им било жал што постапиле со него толку лошо. Потоа им кажал кој е. На нивните прегратки и радост им немало крај! (1. Мојсеева, од 40. до 45. поглавје.)

Што можеш да научиш за љубомората од оваа библиска приказна? — Љубомората може да води до многу проблеми, па дури и да наведе некого да му наштети на сопствениот брат! Да прочитаме Дела 5:17, 18 и Дела 7:54-59 и да видиме како постапиле некои луѓе со Исусовите ученици поради љубомора. — Откако го прочита ова, сфаќаш ли зошто мора да внимаваме да не станеме љубоморни? —

Јосиф живеел 110 години. Му се родиле деца, потоа внуци, па и правнуци. Сигурно Јосиф често ги учел да се сакаат и да не бидат љубоморни (1. Мојсеева 50:22, 23, 26).

[Фуснота]

Прашања:

○ Што значи да се биде љубоморен?

○ На што ги навела љубомората Јосифовите браќа?

○ Зошто Јосиф им простил на своите браќа?

○ Што учиме од оваа приказна?