Како да се прават ученици со книгата Спознание

¹ Една пожелна цел за сите христијани е да ги поучуваат другите за вистината и да прават ученици од оние кои се „исправно настроени за вечен живот“ (Дела 13:48, НС; Мат. 28:19, 20). За да се постигне ова, Јеховината организација ставила во нашите раце една прекрасна алатка — книгата Спознание кое води до вечен живот. Нејзиниот наслов ја нагласува големата важност на домашните библиски студии, бидејќи вечниот живот зависи од стекнување спознание за Јехова, единствениот вистинит Бог, и за неговиот Син, Исус Христос (Јован 17:3, НС).

² Книгата Спознание сега е главната публикација на Заедницата за водење на домашни библиски студии. Користејќи ја, можеме да поучуваме за вистината со едноставност, јасност и концизност. Ова ќе помогне да се досегнат срцата на оние кои се поучувани (Лука 24:32). Се разбира, потребно е водителот да користи добри методи на поучување. За таа цел е подготвен овој додаток — да даде предлози и потсетници во врска со методите на поучување, кои се докажале како ефикасни. Со остроумност и според индивидуалните околности, можеби ќе можеш постепено да примениш некои или сѐ од ова што е изнесено овде. Чувај го овој додаток и осврнувај се често на него. Различни точки во него можат да ти помогнат да бидеш поделотворен во користењето на книгата Спознание за да правиш ученици.

³ Води напредна домашна библиска студија: Имај вистински личен интерес за ученикот како за потенцијален христијански ученик и духовен брат или сестра. Биди срдечен, пријателски настроен и ентузијастичен. Со тоа што ќе бидеш добар слушател, ќе можеш да ја запознаеш другата личност — неговото минато и животна ситуација — кое ќе ти помогне да распознаеш како најдобро да му помогнеш духовно. Биди спремен да дадеш сѐ од себе за доброто на ученикот (1. Сол. 2:8).

⁴ Откако е воспоставена студија, подобро е поглавјата во книгата Спознание да се проучуваат по нумерички редослед. Ова ќе овозможи ученикот да стекне едно напредно разбирање на вистината, бидејќи книгата ги развива библиските теми во најлогичен редослед. Задржи ја студијата едноставна и интересна за да биде жива и да оди напред (Рим. 12:11). Во зависност од околностите и способноста на ученикот, можеби ќе биде можно повеќето поглавја да ги опфаќаш во едно проучување од еден час или слично, без да брзаш за време на проучувањето. Учениците ќе прават подобар напредок кога и учителот и ученикот ќе се држат за договореното време за проучување секоја недела. Така, со повеќето лица можеби би било можно 19-те поглавја од книгата да се завршат за околу шест месеци или приближно толку.

⁵ Воведи го секој дел со кратки забелешки кои поттикнуваат интерес за материјалот. Ќе забележиш дека насловот на секое поглавје е неговата тема, која треба да се нагласи. Секој поднаслов издвојува една главна мисла, помагајќи ти темата на поглавјето да ја задржиш во фокусот. Внимавај да не зборуваш премногу. Наместо тоа, обиди се да ги извлечеш изјавите на ученикот. Ако на ученикот му се поставуваат посебни водечки прашања, темелени на она што тој веќе го знае, тогаш тоа ќе му помогне да резонира и да доаѓа до исправни заклучоци (Мат. 17:24—26; Лука 10:25—37; види Водич, страница 50, пасус 10). Држи се строго за печатените информации во книгата Спознание. Воведувањета на додатни поединости може да го одвлече вниманието од главните мисли или да ги засени истите и да ја оддолжи студијата (Јован 16:12). Ако се појави некое прашање кое не се однесува на темата што се проучува, во повеќето случаи би можел да го одговориш на крајот на студијата. Ова ќе ти овозможи да ја обработиш лекцијата за таа недела без да скршнеш од темата. Објасни му на ученикот дека со тек на времето повеќето од неговите лични прашања ќе бидат одговорени за време на проучувањето. (Види Водич, страница 90, пасус 14.)

⁶ Ако ученикот цврсто се држи за тројството, бесмртност на душата, пеколен оган или други слични лажни доктрини, а она што е изнесено во книгата Спознание не го задоволува, би можел да му ја дадеш книгата Расудување или некоја друга публикација која ја обработува темата. Кажи му дека ќе разговараш со него за темата откако ќе размисли за она што ќе го прочита.

⁷ Започнувањето и завршувањето на студијата со молитва за Јеховино водство и благослов ја возвишува приликата, го става дотичниот во умствено расположение полно со почит, а вниманието го насочува на Јехова, како на вистинскиот Учител (Јован 6:45). Ако ученикот е сѐ уште пушач, со тек на времето би можел да го замолиш да се воздржува за време на студијата (Дела 24:16; Јак. 4:3).

⁸ Поучувај делотворно со стихови, илустрации и прашања за повторување: Без разлика колку пати тој претходно можеби го проучил материјалот, еден вешт учител ќе ја повтори секоја лекција, имајќи го во мисли дотичниот ученик. Ова помага да се предвидат некои од прашањата на ученикот. За да поучуваш делотворно, здобиј се со јасно разбирање на главните мисли во поглавјето. Побарај ги стиховите за да видиш како тие се однесуваат на материјалот и одлучи кои од нив ќе бидат читани за време на студијата. Размисли за тоа како можеш да поучуваш користејќи ги илустрациите и прашањата за повторување на крајот од поглавјето.

⁹ Преку ефективна употреба на стиховите, ќе му помогнеш на ученикот да го цени тоа што тој навистина ја проучува Библијата (Дела 17:11). Користејќи ја рамката „Научи добро да ја користиш твојата Библија“, на 14. страница од книгата Спознание, научи го како да ги наоѓа стиховите. Покажи му како да ги разликува цитираните стихови во лекцијата. Ако дозволува времето, побарај ги и прочитај ги наведените стихови кои не се цитирани. Ученикот нека коментира за тоа како тие го поддржуваат или го појаснуваат она што е изнесено во пасусот. Нагласи ги клучните делови од текстот за тој да почне да ги цени причините за главните точки од лекцијата (Неем. 8:8). Обично, нема потреба учителот да внесува повеќе текстови во дискусијата од оние што ги дава книгата. Коментирај за вредноста на тоа да се знаат имињата и редоследот на библиските книги. Можеби за ученикот ќе биде од помош да ги прочита 27—30. страница од Стражарска кула од 15 јуни 1991. Кога е погодно и достапно, охрабри на употреба на Нов свет превод на Светото писмо. Би можел постепено да покажуваш како да се користат неговите различни карактеристики, како што се забелешките на маргините и индексот на библиските зборови.

¹⁰ Лекцијата 34 во книгата Водич за Теократската школа за проповедање објаснува дека илустрациите го поттикнуваат процесот на размислување кај дотичниот и прават полесно да се сфатат новите мисли. Тие ги соединуваат интелектуалната привлечност и емоционалното влијание, па така пораката е пренесена со сила која честопати не е можна со едноставно изнесување на факти (Мат. 13:34). Книгата Спознание има бројни илустрации за поучување, кои се едноставни, но сепак моќни. На пример, илустрацијата која е употребена во 17. поглавје изградува ценење за тоа како, во духовна смисла, преку христијанското собрание Јехова снабдува храна, облека и засолниште. Прекрасните сликовити илустрации во книгата Спознание можат да бидат ефикасно употребени за да ги возбудат емоциите. Под поднасловот „Радосното воскресение“, на 185. страница, влијанието на 18. пасус ќе биде зајакнато ако ученикот погледне назад на сликата на 86. страница. Ова може да го поттикне да размислува за воскресението во Божјето Царство како за реалност.

¹¹ Потребно е библиските ученици да прават духовен напредок со секоја лекција. Од оваа причина, немој да пропуштиш да ги поставиш прашањата за повторување во рамката „Провери го своето спознание“, која се појавува на крајот од секое поглавје. Барај повеќе отколку само интелектуално објаснување за она што е проучено. Некои од овие прашања се така формулирани да извлечат личен одговор од срце. На пример, види ја 31. страница, каде што ученикот е запрашан: „Кои особини на Јехова Бог особено те привлекуваат?“ (2. Кор. 13:5).

¹² Поучувај ги учениците да се подготвуваат за студијата: Ученик кој претходно ја чита лекцијата, ги забележува одговорите и размислува како да ги изрази со свои сопствени зборови, побргу ќе напредува духовно. Со твојот пример и охрабрување, можеш да го поучуваш да се подготвува за студијата. Покажи му ја твојата книга, во која си ги маркирал или подвлекол клучните зборови и изрази. Објасни како да најде директни одговори на отпечатените прашања. Заедничкото подготвување на некое поглавје може да биде од помош за ученикот. Охрабри го да се изразува со свои сопствени зборови. Само тогаш станува јасно дали го разбира материјалот. Ако го чита одговорот од книгата, можеш да го поттикнеш неговото размислување со тоа што ќе го прашаш како би ја објаснил точката на некој друг со свои сопствени зборови.

¹³ Охрабри го ученикот да ги бара нецитираните стихови како дел од неговата седмична подготовка, бидејќи можеби нема да има време да се читаат сите за време на студијата. Пофали го за напорот што го вложува во своите лекции (2. Петр. 1:5; за дополнителни предлози околу тоа што може да сторат и учителот и ученикот за да го зголемат учењето во текот на библиската студија, види Стражарска кула од 15 август 1993, страници 13 и 14). На овој начин ученикот е поучен да се подготвува и да дава смисловни коментари на собраниските состаноци. Тој ќе учи како да развива добри лични навики за проучување кои ќе го опремат да продолжи да напредува во вистината откако ќе биде завршена неговата лична библиска студија со книгата Спознание (1. Тим. 4:15; 1. Петр. 2:2).

¹⁴ Насочувај ги учениците кон Јеховината организација: Одговорноста на оние кои прават ученици е да го насочуваат интересот на ученикот кон Јеховината организација. Тој ќе напредува побрзо до духовна зрелост ако ја признава и ја цени организацијата и ако ја сфаќа потребата да стане дел од неа. Ние сакаме да најде задоволство во дружењето со Божјиот народ и едвај да чека да биде со нас во Салата на Царството, каде што ќе може да ја добие духовната и емоционалната поддршка што ја нуди христијанското собрание (1. Тим. 3:15).

¹⁵ Брошурата Јеховините сведоци — Обединето ја извршуваат Божјата волја ширум светот е наменета да ги запознае поединците со единствената видлива организација што Јехова денес ја користи за да ја исполни својата волја. Кога студијата веќе е воспоставена, зошто да не му дадеш на ученикот еден примерок? Кани го на состаноците уште од самиот почеток. Објасни како се водат тие. Би можел да му го кажеш насловот на едно претстојно јавно предавање или да му ја покажеш статијата која ќе се обработува на студијата на Стражарска кула. Можеби би можел да го поведеш да ја види Салата на Царството кога нема состанок, за да се ублажи било каква загриженост што може да ја има поради одење на некое ново место за првпат. Можеби ќе бидеш во можност да понудиш превоз до состаноците. Кога ќе присуствува, направи да се чувствува добредојден и да му биде пријатно (Мат. 7:12). Претстави го на другите Сведоци, вклучувајќи ги и старешините. Се надеваме дека ќе почне да гледа на собранието како на свое духовно семејство (Мат. 12:49, 50; Мар. 10:29, 30). Можеби пред него ќе поставиш една цел, како на пример: да присуствува барем на по еден состанок секоја недела, а постепено зголемувај ја целта (Евр. 10:24, 25).

¹⁶ Додека продолжува домашната библиска студија со книгата Спознание, нагласи ги деловите кои ја истакнуваат потребата од редовно дружење со собранието на состаноците. Особено забележи ги 52, 115, 137—139. и 159. страница, како и 17. поглавје. Изрази ги своите длабоки чувства на ценење кон Јеховината организација (Мат. 24:45—47). Зборувај позитивно за локалното собрание и за она што го учиш на состаноците (Псал. 83:10; 132:1—3). Ќе биде добро ако ученикот би можел да ја гледа секоја од видеокасетите на Заедницата, почнувајќи со Јеховини сведоци — Организацијата зад името. За понатамошни идеи како да го управуваш интересот кон Организацијата, види Стражарска кула од 1 март 1985, 23—26. страница и додатокот од Наша служба за Царството од април 1993.

¹⁷ Охрабри ги учениците да им сведочат на другите: Кога проучуваме со луѓето, нашата цел е да правиме ученици кои сведочат за Јехова (Иса. 43:10—12). Тоа значи дека учителот треба да го охрабри ученикот да разговара со другите за она што го учи од Библијата. Тоа може да се направи едноставно така што ќе се праша: „Како би ја објаснил оваа вистина на твоето семејство?“ или „Кој стих би го употребил за да го докажеш ова на некој твој пријател?“ Нагласи ги клучните места во книгата Спознание, каде се охрабрува на сведочење, како што се страниците: 22, 93—95, 105 и 106, како и 18. поглавје. Кога е погодно, на ученикот може да му се дадат некои трактати за да ги користи во неформално сведочење на другите. Предложи му да ги покани членовите на своето семејство да присуствуваат на неговата студија. Дали има пријатели кои исто така би сакале да проучуваат? Замоли го да ти укаже на оние кои се заинтересирани.

¹⁸ Преку присуствување на Теократската школа за проповедање и Состанокот за служба, потенцијалниот ученик може да добие дополнителна обука и подбуда, кои ќе му помогнат да стане објавител на добрата вест. Кога покажува интерес да се вклучи во школата или да стане некрстен објавител, тогаш ќе важат мерилата кои се изнесени на 98. и 99. страница од книгата Наша служба. Ако еден аспект од неговиот живот го спречува да ги исполнува условите, можеш да побараш во публикациите на Заедницата помошен материјал кој се однесува на работата и да го споделиш со него. На пример, некој ученик можеби има тешкотии да совлада зависност од тутун или други дроги. Книгата Расудување укажува на јаки библиски причини зошто христијаните избегнуваат вакви штетни навики, а на 97. страница во кратки црти прикажува еден начин кој се покажал успешен во помагањето на другите да се ослободат од тоа. Моли се заедно со него за таа работа, поучувајќи го да се ослонува на Јехова за помош (Јак. 4:8).

¹⁹ Процедурата која треба да се следи за да се одреди дали некој ги исполнува условите да учествува во јавната служба е изнесена во Стражарска кула од 15 јануари 1996, на 16. страница, 6. пасус. Кога ученикот ги исполнува условите, ќе биде од помош да се направи една практична вежба која ќе го подготви за неговиот прв ден во службата на подрачје. Дискутирај на еден позитивен начин за реакциите и приговорите на луѓето, кои се вообичаени на твоето подрачје. Ако е некако можно, тој прво нека започне во делото од куќа до куќа, а постепено поучувај го и за другите обележја на службата. Ако ја одржуваш твојата презентација кратка и едноставна, нему ќе му биде лесно да те копира. Биди изградувачки и охрабрувачки, зрачејќи радост во делото, за да може тој да го поприми и одразува твојот дух (Дела 18:25). Целта на еден нов ученик би требало да биде да стане редовен, ревен објавител на добрата вест. Можеби ќе можеш да му помогнеш да си направи практичен распоред за служба. За да може да напредува во својата способност да им сведочи на другите, би можел да предложиш да го прочита изданието на Стражарска кула од 1 декември 1984, 19—27. страница; 1 ноември 1988, 18—28. страница, 15 јануари 1991, 15—20. страница и 1 јануари 1994, 20—25. страница.

²⁰ Мотивирај ги учениците на предание и крштавање: Би требало да биде можно еден ученик со искрено срце да научи доволно преку студијата на книгата Спознание за да му се предаде на Бог и да биде оспособен за крштавање. (Спореди Дела 8:27—39; 16:25—34.) Меѓутоа, пред еден човек да биде мотивиран да изврши предание, тој треба да развие оддаденост на Јехова (Псал. 72:25—28). Во текот на студијата барај прилики да градиш ценење за Јеховините својства. Изрази ги сопствените длабоки чувства кон Бог. Помогни му на ученикот да размислува во правец на развивање на срдечен, личен однос со Јехова. Ако тој навистина го запознае и го сака Бог, тогаш ќе Му служи верно, бидејќи божествената оддаденост има врска со тоа што чувствуваме за Јехова како личност (1. Тим. 4:7, 8; види во книгата Водич, страница 73, пасус 11).

²¹ Настојувај да го досегнеш срцето на ученикот (Псал. 118:11; Дела 16:14; Рим. 10:10). Тој треба да види како вистината влијае лично на него и да одлучи што треба да стори со она што го научил (Рим. 12:2). Дали навистина ѝ верува на вистината што му е презентирана од недела в недела? (1. Сол. 2:13). За да го дознаеш тоа, ќе поставуваш остроумни прашања за неговото гледиште, како што се: Што мислиш ти за ова? Како можеш да го примениш ова во својот живот? Од неговите коментари можеш да распознаеш каде е потребно повеќе помош за да се досегне неговото срце (Лука 8:15; види книга Водич, 50. страница, 11. пасус). Придружниот текст за сликите на 172. и 174. страница од книгата Спознание прашува: „Дали си се предал на Бог во молитва?“ и „Што те спречува да се крстиш?“ Ова може делотворно да го поттикне ученикот на акција.

²² Процедурата што треба да се следи кога еден некрстен објавител има желба да се крсти е изложена во Стражарска кула од 15 јануари 1996, на 17. страница, 9. пасус. Книгата Спознание е напишана со цел лицето да се подготви да одговори на „Прашања за оние коишто сакаат да се крстат“, кои се наоѓаат во брошурата Основни библиски науки, кои старешините ќе ги разгледаат со него. Ако си ги нагласил одговорите на отпечатените прашања во книгата Спознание, би требало ученикот да биде добро подготвен за делот со прашања, предводен од старешините во подготовка за неговото крштавање.

²³ Помогни им на оние кои ја завршиле домашната библиска студија: За очекување е, додека едно лице да го заврши проучувањето на книгата Спознание, неговата искреност и длабочина на интересот за служење на Бог да станат видливи (Мат. 13:23). Тоа е причината зошто последниот поднаслов од книгата, прашува: „Што ќе сториш ти?“ Завршните пасуси апелираат до ученикот да се сосредоточи на односот што требало да го развие со Бог, потребата да го примени спознанието кое го стекнал и потребата да делува бргу за да ја покаже својата љубов кон Јехова. Нема подготовка за проучување на дополнителни публикации со оние кои ја завршиле книгата Спознание. Љубезно и јасно објасни му на ученикот, кој пропушта да одговори на спознанието за Бог, што треба да прави за да напредува духовно. Би можел повремено да му се јавуваш, оставајќи го отворен патот да преземе чекори кои водат до вечен живот (Проп. 12:13).

²⁴ Еден нов ученик кој ја прифаќа вистината и се крштава ќе треба уште многу да расте во своето спознание и разбирање за да стане потполно стабилен во верата (Кол. 2:6, 7). Наместо по завршувањето на книгата Спознание да ја продолжиш неговата домашна библиска студија, можеш да се ставиш на располагање да обезбедиш каква и да било лична помош што можеби ќе му треба за духовно да созрее (Гал. 6:10; Евр. 6:1). Што се однесува до него, тој може да го заокружи своето разбирање со секојдневно читање на Библијата, лично проучување на Стражарска кула и на другите публикации од ‚верниот роб‘, подготвувајќи се и присуствувајќи на состаноците и разговарајќи за вистината со соверниците (Мат. 24:45—47; Псал. 1:2; Дела 2:41, 42; Кол. 1:9, 10). Неговото читање на книгата Наша служба и применување на она што го содржи таа, ќе игра витална улога во тоа тој да стане теократски организиран за во потполност да ја изврши својата служба (2. Тим. 2:2; 4:5).

²⁵ Развивај ја уметноста на поучување: Заповедано ни е да ‚правиме ученици од луѓето . . ., поучувајќи ги‘ (Мат. 28:19, 20, НС). Бидејќи уметноста на поучување е неделиво поврзана со правењето ученици, ние сакаме да се стремиме кон тоа да се подобриме како учители (1. Тим. 4:16; 2. Тим. 4:2, НС). За дополнителни предлози околу тоа како да ја развиеме уметноста на поучување, можеби ќе сакаш да ги прочиташ 10. и 15. лекција од книгата Водич: „Развивање на уметноста на поучување“ и „Да се зборува на срцата на слушателите“; „Учител, поучување“ од Увид во Писмото, том 2 и статиите од Стражарска кула: „Да се гради со огноотпорен материјал“ и „Допри до срцето кога поучуваш“ од 1 декември 1984; „Дали водиш делотворни разговори на темел на Библијата?“ од 1 јули 1986 и „Како да се пронајде радост во правењето ученици“ од 15 февруари 1996.

²⁶ Додека се трудиш да правиш ученици, користејќи ја книгата Спознание, секогаш моли се на Јехова, оној кој „прави да израсте“, да ги благослови твоите напори во досегнувањето на човечките срца со добрата вест за Царството (1. Кор. 3:5—7). Доживеј ја радоста на поучување на другите за да го разберат, да го ценат и да делуваат во склад со спознанието кое води до вечен живот!