Имај страв од Јехова во текот на целиот ден

¹ „Почеток на мудроста е стравот од Господа“ (Псал. 111:10). Тој страв нѐ поттикнува да правиме добри дела и ни помага да отстапуваме од она што е лошо (Посл. 16:6). Овој страв претставува длабока почит кон нашиот Творец, која нѐ поттикнува да избегнуваме да го предизвикаме неговото незадоволство и да му бидеме непослушни. Тој е нешто што треба да го негуваме и да го покажуваме во текот на целиот ден (Посл. 8:13).

² Секојдневно, духот на Сатановиот свет врши огромен притисок врз нас за да се придружиме на неговите зли патишта (Ефеш. 6:11, 12). Нашето несовршено тело е грешно и има вродена склоност кон она што е лошо (Гал. 5:17). Според тоа, за да ги слушаме Јеховините заповеди, да бидеме среќни и да добиеме живот, треба да имаме страв од него во текот на целиот ден (Втор. 10:12, 13).

³ Во Евреите 10:24, 25 сме опоменати да се собираме заедно за да се храбриме еден со друг „дотолку повеќе“ во текот на овие времиња во кои живееме. Редовното присуство на состаноците е неопходно за да ги преживееме овие последни денови. Нашиот страв да не не му угодиме на Бог нѐ тера да присуствуваме на состаноците и високо да ја цениме нивната цел. Учеството на христијанските состаноци е света предност во очите на оние кои имаат страв од Бог.

⁴ Послушноста на заповедта да ја проповедаме добрата вест за Царството е уште еден начин на кој го покажуваме нашиот страв од Бог (Мат. 28:19, 20; Дела 10:42). Првенствена цел на нашето проповедничко дело е да им помагаме на другите да негуваат страв од Јехова и да се подложат на неговата волја. Ова го постигнуваме правејќи повторни посети, настојувајќи да започнуваме домашни библиски студии и потоа поучувајќи ги другите за сите Божји заповеди. На тој начин го покажуваме нашиот страв од Јехова и нашата љубов кон ближниот (Мат. 22:37—39).

⁵ Оние кои немаат страв од Бог, не изградуваат став на ценење за духовните работи и подлегнуваат на смртоносниот воздух, односно умствен став на светот (Ефеш. 2:2). Цврсто да решиме да „му принесуваме на Бог света служба со побожен страв и со страхопочит“ (Евр. 12:28). Така ќе ги жнееме благословите што ги добиваат оние кои имаат страв од Бог во текот на целиот ден.