Пензионирање — врата кон зголемена активност?

¹ Многу луѓе што напорно работат копнеат по времето кога пензионирањето ќе ги ослободи од маките и притисоците од световната работа. Меѓутоа, многу често последици од пензионирањето се апатија, здодевност и предвремено стареење. Недостигот од смисловна активност може да го остави умот преокупиран со грижата за самиот себе. Еден бразилски весник извести дека пензионираните лица што работеле државна работа се жалат на проблеми почнувајќи од ‚незадоволство, нервоза, несигурност и губење на идентитетот па сѐ до депресија и чувство дека светот им се распаѓа‘.

² Спротивно на тоа, многу христијани гледаат на ова ново поглавје во својот живот како на врата кон зголемена духовна активност. Еден брат што почнал со пионерската служба две седмици откако наполнил 65 години вели: „Никогаш во мојот живот немало период што е толку изобилно исполнет со благослови како во последниве десет години откако сум во пионерска служба“. Една брачна двојка напишала: „Нашите вистински златни години почнаа откако започнавме со пионерската служба“. Да, на многумина, пензионирањето им пружа златна прилика да ја зголемат својата служба и да пожнеат богати благослови од Јехова.

³ Да се остане зафатен и продуктивен: Мнозина што сега се во пензија пораснале без угодностите што се вообичаени денес и научиле напорно да работат уште на рана возраст. Иако можеби веќе го немаат жарот на младоста, тие сѐ уште се продуктивни работници. На подрачјето на една подружница, 22 проценти од пионерите — околу 20.000 браќа и сестри — имаат најмалку 60 години. Овие постари лица даваат важен придонес за делото на проповедање. Нивното искуство и побожни особини ги збогатуваат собранијата во коишто служат (Јак. 3:17, 18).

⁴ Тоа што некој е зафатен во христијанската служба придонесува за подобро здравје и подобар квалитет на животот. Една 84-годишна сестра што почнала со пионерската служба откако отишла во пензија, рекла: „Тоа што водам многу библиски студии со заинтересирани луѓе ми помага да останам умствено активна. Немам автомобил, па затоа многу пешачам. Тоа ме одржува здрава“. Една постара брачна двојка, пионери, коментирале: „Службата нѐ одржува умствено и физички здрави. Секогаш сме заедно. Многу се смееме и уживаме во животот“.

⁵ Да се служи каде што има потреба: Некои христијани што се во пензија и што имаат поволни финансиски услови биле поттикнати да служат таму каде што има поголема потреба од проповедници на Царството. Други ја зголемиле својата служба со тоа што служат на подрачје на странски јазик. Како апостол Павле, овие ревносни објавители ‚прават сѐ заради добрата вест, за да имаат удел во неа со другите‘ (1. Кор. 9:23).

⁶ Една брачна двојка почнале со пионерска служба откако ги подигнале своите два сина. По неколку години пионерска служба, се нафатиле да учат кинески јазик. Сега, длабоко во своите 70-ти години, неодамна можеле да се радуваат кога групата на кинески јазик во којашто служеле станала собрание. Каков само благослов се покажале ваквите брачни двојки!

⁷ Нема пензионирање од службата: Додека повеќето луѓе во свое време се пензионираат од своето световно вработување, за ниеден христијанин нема пензионирање од службата за Бог. Сите мораат да продолжат верно „до крај“ (Мат. 24:13, 14). Се разбира, поради поодминатата старост некои не можат да прават онолку колку што пред тоа правеле во службата за Јехова. Но, колку е охрабрувачки кога гледаме дека од сѐ срце прават сѐ што можат! Божјата реч ги уверува дека Јехова нема да го заборави нивното дело и љубовта што ја покажуваат за неговото име (Лука 21:1—4; Евр. 6:10).

⁸ Ако ти се ближи времето да одиш во пензија, зошто не разгледаш во молитва како можеш потполно да ги искористиш твоите нови околности? Со Божја помош, можеби ќе увидиш дека пензионирањето ти отвора врата кон зголемена активност што донесува фалба на Јехова и многу благослови (Псал. 148:12, 13).