Како да ги користиме презентациите што служат како пример
1. Како треба да гледаме на презентациите што ни се дадени како пример?
1 Во Наша служба за Царството редовно се појавуваат презентации што служат како пример за понуда на нашите списанија и други публикации. Кога учествуваме во службата, предложените презентации не треба да ги кажуваме точно онака како што се напишани. Тие се наменети да ни дадат само една општа идеја за тоа што би можеле да кажеме. Обично ќе бидеме поделотворни ако ја изнесеме презентацијата со свои зборови. Кога се изразуваме природно тоа го опушта станарот и покажува дека сме искрени и уверени (2. Кор. 2:17; 1. Сол. 1:5).
2. Зошто мораме да ги земеме предвид локалните обичаи кога ги подготвуваме презентациите?
2 Приспособи ја твојата презентација: Локалните обичаи многу влијаат врз тоа како ќе ја презентираме добрата вест. Дали е можно, откако ќе размените поздрави со станарот, да ја воведеш својата презентација во разговорот, или пак луѓето на твоето подрачје очекуваат веднаш да преминеш на главното? Тоа варира од место до место, а понекогаш дури и од човек до човек. Потребна е и проникливост кога поставуваме прашања. Прашањата кои се погодни во едно место можат да бидат непријатни за луѓето во друго место. Затоа, мораме добро да процениме и да ја приспособиме нашата презентација кон она што е прифатливо во нашето место.
3. Зошто да го земеме предвид потеклото и размислувањето на лицата со кои зборуваме?
3 Покрај тоа, кога се подготвуваме за служба на подрачјето, мораме да го земеме предвид потеклото и размислувањето на луѓето што ќе ги сретнеме таму. На пример, веројатно поинаку ќе дискутираш за Матеј 6:9, 10 со еден побожен католик отколку со лице кое не ја знае молитвата „Оченаш“. Ако малку промислуваме, честопати ќе можеме да ги приспособиме презентациите за да им бидат попривлечни на луѓето што ги среќаваме во службата (1. Кор. 9:20-23).
4. Зошто е неопходна добра подготовка?
4 Дури и ако планираме да ја користиме презентацијата што е понудена како пример онака како што е напишана, тоа не е замена за добрата подготовка. Треба внимателно да ја прочитаме статијата или поглавјето кое планираме да го понудиме и да побараме точки што можат да поттикнат интерес. Потоа вклучи ги нив во својата презентација. Нашите публикации можеме да ги нудиме со воодушевеност само ако сме запознаени со убавите информации што ги содржат.
5. Зошто би можеле да подготвиме и поинаква презентација, и како можеме да го направиме тоа?
5 Поинакви пристапи: Дали сме ограничени да ги користиме само оние пристапи што се изложени во презентациите дадени како пример? Не. Ако ти е поудобно да користиш поинаков пристап или друг стих, користи го. Особено кога се работи со списанијата, биди спремен за можностите да понудиш и други статии кои можеби се од посебен интерес на твоето подрачје. Кога на Состанокот за служба се прикажуваат презентации за служба на подрачјето, може да се подготват било кои пристапи што се успешни на локалното подрачје. На овој начин може да им се помогне на сите успешно да ја презентираат добрата вест.