Води напредни библиски студии — на врата и по телефон
1. Која е нашата цел кога ја проучуваме Библијата со некое лице?
1 Колку сме радосни кога ќе започнеме библиска студија! Но, да се пронајде некој што сака да ја проучува Библијата е само почеток. Целта на проучувањето е да му помогнеме на тоа лице да стане вистински ученик на Христос (Мат. 28:19, 20). Што може да ни помогне да ја постигнеме таа цел?
2. Како можат да се водат библиски студии на врата или по телефон, и зошто се делотворни?
2 Зафатени луѓе: Луѓето денес се сѐ позафатени. Во некои места, повеќето не се спремни уште во почетокот да одвојат цел час да ја проучуваат Библијата. За да им помогнеме на таквите лица, поттикнати сме да започнуваме и да водиме библиски студии на врата или по телефон. Во почетокот, тие студии можат да бидат прилично кратки и притоа може да разгледаме само неколку стихови од Библијата со помош на еден или два пасуса од некоја публикација како, на пример, книгата Што учи Библијата. За пофалба е тоа што многу објавители сега водат такви студии на врата или по телефон.
3. Зошто треба да се трудиме да проучуваме подолго време на врата?
3 Меѓутоа, дали треба да бидеме задоволни со тоа што ќе продолжиме со таквото проучување до недоглед? Не. Иако е мудро да не зборуваме предолго на врата кога ќе ја започнеме студијата, сепак во Нашата служба за Царството од мај 1990, на 9. страница беше кажано: „Откако ќе се воспостави студијата и ќе се зголеми интересот на станарот, студијата може да трае подолго“. Ова е важно. Да наведеме еден пример: Можеби на едно изгладнето дете во почетокот ќе му даваме по сосема малку храна додека не му се врати апетитот, но не можеме да очекуваме да му се обнови целата сила и нормално да се развива ако долго време му даваме само по малку храна. Слично на тоа, за да може заинтересираното лице да напредува и да стане зрел слуга на Бог, ќе му треба прописна и редовна библиска студија (Евр. 5:13, 14).
4. Зошто е добро да водиме библиска студија во домот на заинтересираните?
4 Библиска студија што се води во домот: Подобро е студијата со заинтересираното лице да ја водиме на некое приватно место — во неговиот дом или на друго место каде што одговара. Така тоа ќе може полесно да учи и подобро да ја разбере Божјата реч (Мат. 13:23). Ова е корисно и за оној што ја води студијата затоа што ќе може да го приспособи материјалот на потребите на заинтересираното лице. Освен тоа, ако студијата трае подолго, можеме да водиме подлабоки разговори за Божјата реч и на тој начин ќе се зајакне верата на лицето што го поучуваме (Рим. 10:17).
5. Како можеме да преминеме од библиска студија на врата на студија во домот?
5 Како можеш да преминеш од библиска студија на врата на студија во домот? Откако неколку пати накратко сте проучувале на врата, би можел едноставно да му понудиш да проучувате подолго време во точно определен термин. Можеш да се обидеш и со индиректен пристап, така што ќе прашаш: „Дали би имале време денес да седнеме и заедно да поразговараме за ова?“ или: „Колку време би сакале да одвоите денес за да подискутираме на оваа тема?“ Ако не успееш, тогаш продолжете да ја проучувате Библијата кратко на врата. По некое време, повторно обиди се да преминете на студија во домот.
6. Со каква цел треба да ја извршуваме нашата служба, и како можат да ни помогнат во тоа предлозите од оваа статија?
6 Додека продолжуваме да ги бараме достојните, да не заборавиме зошто започнуваме и водиме библиски студии. Целта е да им помогнеме на лицата со искрени срца да станат крстени слуги на Јехова. Тој нека ги благослови нашите напори додека ја извршуваме службата задржувајќи ја оваа цел на ум (2. Тим. 4:5).