Прашања

◼ Дали една сестра треба да носи покривало на главата ако води библиска студија на врата во придружба на брат?

Кога една сестра води класична библиска студија на која е присутен брат, тогаш треба да носи покривало на главата (1. Кор. 11:3-10). Во книгата Божјата љубов, на страница 210, пишува: „Понекогаш околностите можеби налагаат една христијанка да се погрижи за некоја должност што обично би ја извршил крстен брат. На пример... можеби ќе треба во присуство на крстен брат да води библиска студија што однапред била договорена. Кога извршува вакви должности, треба да носи покривало на главата за да покаже дека прави нешто што обично би го правел брат“. Ова важи кога студијата се води дома, на врата или на некое друго место.

Од друга страна, ако сѐ уште не се води библиска студија на врата, сестрата не мора да носи покривало на главата во присуство на брат, па дури и ако целта на повторната посета е да се започне библиска студија или да се разгледа нешто од публикациите наменети за тоа. Честопати за да се започне библиска студија на врата потребно е време, односно треба да се направат неколку повторни посети. Затоа, сестрата и братот што ја придружува во службата треба да размислат за околностите и да донесат разумна одлука дали во таа ситуација сестрата треба да носи покривало на главата или не.