„Тој му ја враќа силата на уморниот“
1 Сите ние понекогаш се уморуваме. Причина за тоа може да бидат нашата работа или други физички активности, но и проблемите со кои се соочуваме во овие „особено тешки времиња“ (2. Тим. 3:1). Како слуги на Јехова, на кој начин ја добиваме духовната сила што ни е потребна за да не забавиме со нашата служба? Така што се потпираме на оној што има „огромна сила“ — Јехова (Иса. 40:26). Тој е свесен за нашите потреби и искрено сака да ни помогне (1. Пет. 5:7).
2 Како ни помага Јехова: Јехова нѐ зајакнува преку својот свет дух, истата незапирлива сила што ја користел за да ја создаде вселената. Кога се уморуваме, Божјиот дух ни помага да ‚добиеме нова сила‘ (Иса. 40:31). Запрашај се: „Кога за последен пат конкретно го молев Јехова да ме зајакне со светиот дух за да можам да ги извршам моите христијански обврски?“ (Лука 11:11-13).
3 Ако секојдневно ја читаме и длабоко размислуваме за Божјата вдахновена реч и ако се храниме духовно со редовно проучување на нашите христијански публикации, ќе бидеме како бујно „дрво посадено крај води што течат, кое својот плод го донесува во свое време и на кое лисјето не му венеат“ (Пс. 1:2, 3).
4 Јехова ги користи и нашите соверници, кои можат ‚да ни помогнат и да нѐ зајакнат‘ (Кол. 4:10, 11). Тие нѐ зајакнуваат на христијанските состаноци со своите изградувачки разговори, коментари и говори (Дела 15:32). Особено христијанските старешини даваат духовна помош и охрабрување што закрепнува (Иса. 32:1, 2).
5 Службата: Ако забележиш кај себе знаци на умор, не престанувај да проповедаш! Всушност, за разлика од другите активности, редовното учество во службата нѐ освежува (Мат. 11:28-30). Тоа што ја проповедаме добрата вест ни помага повеќе да мислиме на Божјето Царство и да ги имаме на ум вечноста и прекрасните благослови што се пред нас.
6 Нѐ чека уште многу работа пред да биде уништен овој злобен свет. Навистина имаме многу причини да истраеме во нашата служба додека ‚се потпираме на силата што ја дава Бог‘ (1. Пет. 4:11). Со Јеховина помош ќе го завршиме нашето дело, зашто „тој му ја враќа силата на уморниот“ (Иса. 40:29).