Да станеме подобри објавители
1 Нашиот небесен Татко се радува на духовниот напредок на своите слуги. Во тоа спаѓа и нивната зрелост и делотворност како објавители на добрата вест. Павле го поттикнал надгледникот Тимотеј да продолжи да се посветува на читањето и на поучувањето за неговиот напредок да биде видлив (1. Тим. 4:13-15). Сите треба да го подобриме квалитетот на својата служба, дури и ако веќе сме искусни објавители.
2 Да си поставиме лични цели: За да напредуваме, треба да си поставуваме лични цели. Какви цели би можеле да си поставиме? Една работа е повешто да го користиме нашиот духовен меч, Библијата (Еф. 6:17). Можеби треба да се подобриме и во некоја гранка од службата, како што е обработувањето на своето подрачје, сведочењето на улица или проповедањето на деловно подрачје. Освен тоа, би можеле да правиме и поделотворни повторни посети. Друга одлична цел е повешто да започнуваме и да водиме библиски студии.
3 Што може да ни помогне: Целта на собраниските состаноци, особено на Теократската школа за служба и на Состанокот за нашата служба, е да ни помогнат да станеме подобри објавители. Колку потемелно се подготвуваме за овие состаноци, присуствуваме на нив и ги применуваме советите што ги добиваме, толку поголеми благослови ќе имаме (2. Кор. 9:6).
4 Исто така, за да напредуваме, треба да си помагаме еден на друг (Изр. 27:17). Ако внимателно слушаме како водат разговор оние со кои сме во служба, ќе можеме и самите да се подобриме. Освен тоа, надгледникот на нашата група за проучување на книга може да се погрижи да добиеме помош. Навистина многу ќе ни користи ако некој поискусен пионер или друг објавител ни помогне да станеме поделотворни, и со тоа да имаме поголема радост во службата! Има ли нов објавител во нашата група за проучување на книга? Би можеле да се договориме со него да одиме заедно во служба.
5 Христијанската служба е најважното дело што се врши денес. Додека му принесуваме на Јехова „жртва на фалба“, сакаме да му го дадеме најдоброто од себе (Евр. 13:15). Ако се трудиме да се подобриме во службата на проповедање, ќе бидеме работници ‚кои немаат од што да се срамат, кои исправно се служат со речта на вистината‘ (2. Тим. 2:15).