Користи ја интернет-страницата за да ги поучуваш своите деца
1. Која е целта на делот од нашата интернет-страница со наслов „Деца“?
1 Нашата интернет-страница jw.org е направена за луѓе од сите возрасти. Делот со наслов „Деца“ (оди на Библиски учења > Деца) ќе им помогне на децата и на нивните родители да се зближат едни со други, но и да станат поблиски со Јехова (5. Мој. 6:6, 7). Како можеш да го користиш овој дел за да ги поучуваш своите деца?
2. Како да одредиш кој материјал за проучување е соодветен на возраста на твоите деца?
2 Биди приспособлив: Секое дете има различни потреби (1. Кор. 13:11). Тогаш, како можеш да избереш материјал за проучување кој е соодветен на возраста на твоите деца? Прашај се: ‚Што ќе им биде интересно на моите деца? Колку ќе разберат од тоа што ќе го проучуваме? Колку долго можат да останат сконцентрирани?‘ Со децата што се до три години, може да ги читаш песничките од рубриката „Што учам од Библијата“. Други семејства сакаат да ги читаат библиските приказни што се наоѓаат во рубриката „Поучете ги своите деца“. Во наредните пасуси дадени се уште некои предлози.
3. Како можат родителите најдобро да ги користат задачите од рубриката „Проекти за Семејната вечер“?
3 Проекти за Семејната вечер: Овие проекти може да им помогнат на родителите да ги поучуваат своите деца. За секој проект има „Упатство за родителите“. Кликни на „Преземи“ за да го прочиташ упатството за проектот. Користи ја рубриката „Учиме низ слики“, во која има и слики за боење, за да ги поучуваш најмалите. Помогни им на поголемите деца да ги изработат задачите од рубриката „Научи повеќе“. Сите задачи од еден проект се поврзани со истата библиска приказна или со истата тема. Така, на Семејната вечер сите деца, без разлика на нивната возраст, можат да учествуваат во истиот проект.
4. Што содржи рубриката „Биди пријател со Јехова“?
4 Биди пријател со Јехова: Филмовите, песните и проектите од оваа рубрика ќе им помогнат на родителите да им ги всадат на своите деца поуките од Божјата Реч (5. Мој. 31:12). Секој краток анимиран филм пренесува важна поука. Децата можат уште подобро да ги сфатат тие поуки преку разни задачи, како на пример, задачи во кои треба да ги пронајдат предметите на сликата. Бидејќи децата обично сакаат да пеат, а песните им помагаат да го запомнат тоа што го учат, на нашата интернет-страница редовно излегуваат теократски песни и песни наменети за деца. Овие филмови и песни се достапни на многу јазици.
5. Зошто треба родителите да бараат помош од Јехова за да ги поучат своите деца?
5 Родители, Јехова сака успешно да ја исполните вашата улога. Затоа, молете го да ви помогне да ги поучите вашите деца за вистината (Суд. 13:8). Само така можете да им помогнете на децата да станат ‚мудри за да добијат спасение преку верата која е во Христос Исус‘ (2. Тим. 3:15; Изр. 4:1-4).