Како да им помогнеме на оние што не знаат добро да читаат

1. На каков предизвик наидуваме кога сакаме да ги поучуваме за Библијата оние што не знаат добро да читаат?

¹ Некои станари кои не знаат добро да читаат имаат интерес за духовни работи, но можеби се плашат кога ќе им ја покажеме Библијата или други книги. Ако уште во почетокот им ја понудиме книгата Што учи Библијата, веројатно нема да имаме голем успех. Како можеме да им помагаме на ваквите лица во духовен поглед? Ова прашање им беше поставено на искусни објавители од повеќе од 20 земји. Во продолжение ќе ги разгледаме нивните предлози.

2. Со кои публикации може да им се помогне на интересентите кои не знаат добро да читаат?

² Ако интересентот не знае воопшто да чита или не чита добро, би можел да започнеш библиска студија со него користејќи некоја брошура како, на пример, Запознај го Бог или Запознај го Бог и живеј засекогаш. Еден пионер од САД обично му ги покажува и двете брошури на заинтересираното лице и го прашува која од нив повеќе му се допаѓа. Подружницата во Кенија известува дека овие брошури се многу делотворни затоа што во африканската култура луѓето најчесто учат преку раскажување приказни. Иако некоја пообразована личност без проблем ќе се согласи да чита од публикацијата и да одговара на прашањата, оваа метода можеби не одговара за лицата што имаат мало образование. Со интересентите кои читаат малку подобро, многу објавители почнуваат библиска студија со брошурите Добра вест од Бог! или Ти можеш да бидеш Божји пријател! или, пак, ја користат Мојата книга со библиски приказни.

3. Што треба да имаме на ум за да можеме делотворно да ги поучуваме оние што не знаат воопшто да читаат?

³ Пофали ги за нивниот труд: Треба да имаме на ум дека оние што не научиле да читаат можеби се срамат поради тоа, а мнозина од нив имаат и ниска самопочит. Најчесто, прво нешто што ќе ни го отвори патот да ги поучиме за вистината е да им помогнеме да се чувствуваат пријатно. Освен тоа, повеќето луѓе кои не знаат да читаат се интелигентни и способни да учат. Затоа, покажи им дека ги почитуваш и постапувај со нив достоинствено (1. Пет. 3:15). Тие ќе бидат мотивирани да продолжат да проучуваат ако чувствуваат дека нивниот труд не е залуден и дека напредуваат во духовен поглед. Затоа, великодушно пофалувај ги.

4. Како може да ги поттикнеме оние што не знаат добро да читаат да се подготват за студијата?

⁴ Дури и ако интересентот не знае добро да чита, поттикни го да се подготвува за студијата. Некои објавители во Јужноафриканската Република ги охрабруваат интересентите да побараат помош од некој член на семејството или од некој свој пријател кој знае добро да чита. Еден објавител во Британија ги поттикнува интересентите да се подготвуваат така што во текот на студијата им дава да се служат со неговата книга додека разгледуваат неколку пасуси. Така можат да видат колку е полесно да се најдат одговорите кога се подвлечени. Еден брат во Индија ги охрабрува оние со кои ја проучува Библијата да ги разгледаат и однапред да размислуваат за сликите од лекцијата што ќе ја обработуваат следниот пат.

5. Како можеме да покажеме стрпливост кога ја водиме студијата?

⁵ Биди стрплив: Сеедно која публикација ја проучувате, насочи го вниманието кон главните мисли и помогни му на интересентот добро да ги разбере. Во почетокот можеби ќе биде добро студијата да биде кратка и да трае од 10 до 15 минути. Не обидувај се да поминеш премногу материјал — можеби ќе биде доволно секојпат да разгледате само по неколку пасуси. Биди стрплив ако интересентот чита бавно. Како што стекнува сѐ поголемо ценење за Јехова, веројатно ќе биде мотивиран да научи подобро да чита. За да му помогнеш во тоа, добро е уште од самиот почеток да го поканиш да доаѓа на состаноци.

6. Како можеме да им помогнеме на луѓето да научат да читаат?

⁶ Ако интересентите научат да читаат, нивниот духовен напредок ќе биде побрз (Пс. 1:1-3). Мнозина им помогнале на своите интересенти со тоа што одвојувале по неколку минути на крајот од секоја студија за да ја разгледаат публикацијата Посвети се на читањето и пишувањето. Ако некој интересент се обесхрабри, би можел да му ја зајакнеш самодовербата така што ќе му посочиш некои работи што ги научил досега. Увери го дека Јехова ќе го благослови неговиот труд, и охрабри го да му се моли за помош (Изр. 16:3; 1. Јов. 5:14, 15). Некои објавители во Британија ги поттикнуваат своите интересенти постојано да си поставуваат разумни и достижни цели — можеби прво да ја научат азбуката, потоа да бараат и да читаат одредени стихови и, на крајот, да читаат од некои поедноставни библиски публикации. Вистински ќе им помогнеме на луѓето ако ги мотивираме да сакаат да научат да читаат, а не само ако ги поучуваме како да го прават тоа.

7. Зошто треба да се трудиме да им ја пренесеме вистината и на оние што не знаат добро да читаат?

⁷ Јехова не ги потценува оние што немаат големо световно образование (Јов 34:19). Тој го испитува срцето на поединецот (1. Лет. 28:9). Затоа, дај сѐ од себе за да им ја пренесеш вистината и на оние што не знаат добро да читаат. Има голем број извонредни публикации со кои би можел да проучуваш со таквите лица. Со текот на времето, ќе можеш да ја продолжиш студијата со книгата Што учи Библијата, и на тој начин да им помогнеш уште подобро да ја разберат Божјата Реч.