Како да сведочиш со штанд или количка со литература

Сведочењето со штанд или количка со литература се покажа како добар начин искрените луѓе да ја дознаат вистината (Јован 6:44). Затоа, старешините добија упатства да организираат сведочење на прометни места во рамките на собраниското подрачје. Бидејќи количките за сведочење се подвижни и не стојат секогаш на едно одредено место, обично нема потреба да бараме дозвола од властите. Кој може да учествува во оваа гранка од службата? Објавители што се проникливи, комуникативни и изгледаат претставително. Ќе наведеме неколку работи што објавителите треба и не треба да ги прават за да имаат поголем успех.

Што да правиш:

Биди љубезен, срдечен и услужлив додека минуваат луѓе. Некои објавители искрено им се насмевнуваат на минувачите и љубезно ги поздравуваат. Ако некој минувач погледне во плакатот, би можел да речеш: „Слободно земете си нешто за читање“.
Стој на соодветна оддалеченост од количката. Во некои места објавителите имаат успех кога стојат малку поблиску до количката. Други објавители, пак, застануваат малку подалеку од количката бидејќи сфатиле дека, ако стојат блиску до неа, минувачите не се чувствуваат слободни да пристапат. Кога некој ќе застане, обиди се да започнеш разговор така што ќе го прашаш: „Дали некогаш сте си го поставиле ова прашање?“
Користи ја Библијата колку што можеш почесто.
Објасни му како се проучува Библијата на секого што ќе земе некоја од нашите публикации за проучување, како што е книгата Што учи Библијата? Ако е можно, на електронски уред пушти му го видеоклипот Зошто да ја проучуваш Библијата?
Секогаш кога е можно, земи контакт-информации. Ако лицето не живее на вашето подрачје, пополни го формуларот Те молиме, посети го ова лице (S-43) и предај му го на секретарот што е можно побрзо.

Што да не правиш:

Не биди нападен, упорен или наметлив и не стој веднаш до количката како стражар.
Немој да мислиш дека со овој начин на сведочење е најважно да се даде што повеќе литература. Кога сме во служба на проповедање, целта ни е да почнеме да проучуваме со луѓето, па затоа треба да водиме разговори со нив.
Не ја затскривај количката и немој премногу да зборуваш со објавителот што е со тебе. Ако мораш да се јавиш на мобилен заради некоја лична работа, обично е најдобро малку да се оддалечиш од количката.
Не се впуштај во дебати со лица што се противат на нашата порака. Ако некој почне да навредува, можеби ќе биде најдобро да се префрлите на друго место.