Стани повешт во службата — Започни разговор со цел да сведочиш неформално

Зошто е важно: Додека проповедаме од куќа до куќа, честопати не можеме да ги најдеме луѓето дома. Сепак, би можеле да им посведочиме кога користиме јавен превоз, додека сме во чекална во болница, додека сме на пауза на работа или на голем одмор на училиште, и слично. Јехова сака да им даде можност на сите луѓе да ја слушнат пораката за Царството (1. Тим. 2:3, 4). За да посведочиме, честопати ние треба да го направиме првиот чекор и да започнеме разговор.

Како да го правиме тоа:

Добро процени ја ситуацијата. Дали лицето на кое сакаш да му посведочиш ти изгледа пријателски настроено и спремно за разговор? Дали околностите дозволуваат да водите опуштен разговор? Некои објавители прво го погледнуваат во очи, а потоа му се насмевнуваат. Ако и тоа лице им се насмевне, се обидуваат да започнат разговор.
Ако немаш храброст да почнеш разговор, накратко помоли му се на Јехова во себе (Неем. 2:4; Дела 4:29).
За почеток кажи нешто едноставно. Би можел да почнеш само со краток поздрав. Кога разговарал со Самарјанката, Исус не почнал веднаш да зборува за Царството (Јован 4:7). Понекогаш би можеле најпрво да кажеме пофалба како, на пример: „Децата Ви се многу убаво воспитани!“ Или, пак, би можеле да започнеме така што ќе поставиме некое прашање, како: „Дали ги гледавте вестите синоќа?“
Откако ќе почнете да разговарате, обиди се да го свртиш разговорот кон добрата вест, но немој да брзаш. Разговорот нека тече природно. Би можел да кажеш некоја мисла што ќе го заинтересира лицето и ќе го поттикне да постави прашање. На пример, ако зборувате за семејството, би можел да речеш: „Пред некој ден прочитав многу добри совети за тоа како да се воспитуваат децата“. Ако зборувате за нешто од вестите, би можел да кажеш: „Неодамна прочитав една навистина добра вест која многу ме охрабри“. Немој да се разочараш ако разговорот заврши уште пред да посведочиш.
Со себе носи трактати или други публикации кои можеш да му ги дадеш на оној што ќе покаже интерес.

Предлог за месецот:

Секоја седмица труди се да започнеш најмалку еден разговор со цел да сведочиш неформално.