ДА ЖИВЕЕМЕ КАКО ХРИСТИЈАНИ

Новитет на состанокот Нашиот живот и служба

Од јануари 2018 год., за време на состанокот Нашиот живот и служба ќе се дискутираат додатните белешки, сликите и клиповите од Свето писмо — превод Нов свет, онлајн издание за проучување (nwtsty-E), дури и ако изданието за проучување сѐ уште не е достапно на твојот јазик. Ова сигурно ќе ти биде од голема помош додека се подготвуваш за состанок. А што е уште поважно, ќе ти помогне уште појасно да ја видиш љубовта на нашиот Татко, Јехова!

ДОДАТНИ БЕЛЕШКИ

Ќе ни дадат увид во библиските стихови. На пример, културата во тоа време, географски поединости и објаснување на зборови.

Матеј 12:20

Фитил што тлее: Еден мал земјен сад наполнет со маслиново масло обично служел како ламба во куќата. Преку ленен фитил маслото одело нагоре и така се одржувал пламенот. Грчкиот израз „фитил што тлее“ можеби укажува на фитил што чади и сѐ уште има жарче, но пламенот само што не згаснал или веќе е згаснат. Пророштвото од Исаија 42:3 претскажало дека Исус ќе имал големо сочувство — тој никогаш немало да ја згасне и последната искра надеж во понизните и угнетуваните луѓе.

Матеј 26:13

Вистина: Грчкиот збор „амин“ кој во овој стих е преведен со „вистина“ е транскрипција од хебрејскиот збор „амин“, кој значи „така нека биде“ или „сигурно“. Исус често го користел овој израз пред да каже некоја изјава, пророштво или ветување. На тој начин истакнувал дека она што го кажал е апсолутно вистинито и веродостојно. Се чини дека единствено Исус го користел овој израз на ваков начин бидејќи не може да се најде слична употреба ниту во Библијата ниту во било која религиозна литература. Кога Исус го повторува едно по друго (амин, амин), како што е случај низ целото евангелие по Јован, преведен е со „вистина, вистина“ (Јвн 1:51).

СЛИКИ И КЛИПОВИ

Ќе бидат прикажани разни детали од Библијата преку фотографии, слики, цртежи, анимации и видеоклипови без звук.

Витфага, Маслинската Гора и Ерусалим

Во овој краток видеоклип е покажан патот кој води до Ерусалим од исток, од денешното село Ат-тур (каде се смета дека порано се наоѓала Витфага) до еден од највисоките делови на Маслинската гора. Витанија се наоѓала источно од Витфага, на источната падина од Маслинската гора. Кога биле во Ерусалим, Исус и неговите ученици обично ја поминувале ноќта во Витанија. Денес таму се наоѓа градот Ел-Азарија, што на арапски значи „Лазаровото место“. Исус престојувал во куќата на Марта, Марија и Лазар (Мт 21:17; Мр 11:11; Лк 21:37; Јвн 11:1). Кога од нивниот дом одел накај Ерусалим, можно е Исус да минувал по пат кој се протегал на местотото од видеоклипот. Кога на 9 Нисан 33 год. од н.е. Исус се упатил кон Ерусалим преку Маслинската Гора јавајќи на магаре, можно е да тргнал од Витфага.

Пат од Витанија до Витфага
Витфага
Маслинската Гора
Долината на Кедрон
Храмско брдо

Клин во петична коска

Ова е фотографија од реплика на петична коска во која е забиен железен клин долг 11,5 сантиметри. Оригиналот, кој датира од римско време, бил најден во 1968 год. додека се правеле археолошки ископувања во северниот дел од Ерусалим. Овој археолошки пронајдок е доказ дека најверојатно се користеле клинови за да се прикова лицето при погубување на дрвен столб. Клинот можеби е сличен на клиновите што ги користеле римските војници за да го приковаат Исус Христос на столб. Петичната коска била пронајдена во камен ковчег, наречен костурница, во кој се ставале сувите коски на починатиот откако ќе се распаднеле останатите делови на телото. Ова покажува дека и оние што биле погубени на столб можеле да имаат погреб (Мт 27:35).