ДА ЖИВЕЕМЕ КАКО ХРИСТИЈАНИ
„Павле му заблагодари на Бог и се охрабри“
Кога браќата од собранието во Рим слушнале дека доаѓа Павле, некои од нив поминале околу 65 километри за да го пресретнат. Како влијаела врз него нивната несебична љубов? Библијата вели: „Кога ги здогледа, Павле му заблагодари на Бог и се охрабри“ (Де 28:15). Иако обично Павле бил тој што ги храбрел браќата додека ги посетувал собранијата, во оваа прилика, кога бил затвореник, тој добил охрабрување (2Ко 13:10).
Денес покраинските надгледници патуваат од собрание до собрание за да ги охрабрат браќата и сестрите. Исто како сите Божји слуги, понекогаш и тие се уморни, загрижени или обесхрабрени. Затоа, следниот пат кога покраинскиот надгледник и неговата сопруга ќе го посетат твоето собрание, што би можел да направиш за да ги охрабриш и ти нив? (Ри 1:11, 12).
Присуствувај на состаноците за проповедање. Кога објавителите прават жртви за да извлечат целосна корист од активностите што се планирани за таа посебна седмица, тоа влијае охрабрувачки врз покраинскиот надгледник (1Со 1:2, 3; 2:20). Размисли дали би можел да служиш како помошен пионер во месецот кога е посетата. Би можел ли да се пријавиш да одиш во служба на проповедање со покраинскиот надгледник или со неговата сопруга? Би можел ли да појдеш со некого од нив на библиски курс? Тие сакаат да соработуваат со различни објавители, вклучувајќи ги и поновите и оние кои сметаат дека проповедањето не им е јака страна.
Биди гостопримлив. Би можел ли да им понудиш сместување на покраинскиот надгледник и неговата сопруга или, пак, да ги поканиш на ручек? Со тоа ќе им покажеш дека ги сакаш. Тие не очекуваат нешто посебно (Лк 10:38-42).
Слушај ги и применувај ги неговите упатства и совети. Покраинскиот надгледник грижливо се труди да ни помогне да увидиме како би можеле уште подобро да му служиме на Јехова. Понекогаш можеби ќе треба да ни даде строг совет (1Ко 5:1-5). Ако сме послушни и подложни, тој многу ќе се радува (Ев 13:17).
Изрази благодарност и ценење. Кажи им на покраинскиот надгледник и на неговата сопруга како ти користела нивната посета. Ова можеш да им го кажеш лично или да им напишеш картичка (Кол 3:15).