Како војните и конфликтите влијаат врз сите нас
„Од Втората светска војна немало толку голем број насилни конфликти како што има денес, и 2 милијарди луѓе — четвртина од човештвото — живеат на места погодени од такви конфликти“
(Амина Мохамед, заменик генерален секретар на Обединетите нации, 26 јануари 2023).
Војни и насилни конфликти може ненадејно да избијат на места каде што моментално има мир. Дури и оние кои живеат далеку од некој конфликт може да бидат засегнати бидејќи светот е поповрзан од кога и да било порано. А нанесената штета може да трае долго откако ќе заврши конфликтот. Еве некои примери:
Недостиг на храна. Според Светската програма за храна, „конфликтите сѐ уште се најголемата причина за глад и 70 отсто од светското население кое гладува живее на подрачја погодени од војни и насилство“.
Физички и психички здравствени проблеми. Заканата од војна и несигурноста што таа ја носи може да предизвика луѓето да чувствуваат огромен стрес и анксиозност. Оние што живеат на завојувани подрачја се во опасност не само да бидат физички повредени туку и да развијат психички здравствени проблеми. Но за жал, честопати не можат да ја добијат потребната медицинска помош.
Принудно раселување. Според Високиот комесар за бегалци на Обединетите нации, до септември 2023 год., повеќе од 114 милиони луѓе низ целиот свет биле принудени да ги напуштат своите домови. Главна причина за ова се војните и насилните конфликти.
Економски проблеми. Војните честопати предизвикуваат економски проблеми, како на пример инфлација. Луѓето страдаат бидејќи голем дел од парите, кои вообичаено би се потрошиле за здравствена грижа и образование, владите ги трошат за да финансираат воени операции. А потребни се и многу пари за повторно да се изгради она што било уништено во војната.
Проблеми со животната средина. Луѓето страдаат кога природните ресурси од кои зависат намерно се уништуваат. Загадувањето на водата, воздухот и почвата може да предизвика долгорочни здравствени проблеми, а опасноста од скриени копнени мини останува долго откако борбите ќе престанат.
Несомнено, војната има разорни последици во секој поглед.