Способноста на хормоните да ги регулираат функциите на телото

За нашето тело да функционира исправно, потребно е во крвотокот да има одредено ниво на електролити, како на пример калциум. Но, ние не внесуваме секој ден иста количина на електролити. Тогаш, како нашето тело успева да ја задржи исправната количина на електролити во крвотокот?

Здрав човечки организам го регулира нивото на електролити така што произведува, складира и ослободува хормони во крвотокот. Хормоните се хемиски супстанции кои ги координираат разните функции на организмот. Дури и мала промена во количината на некој хормон може да има големо влијание врз нашето тело. Encyclopedia Britannica наведува дека ослободувањето хормони „не е случаен, туку прецизен и строго контролиран процес“.

На пример, паратироидните жлезди во вратот ги детектираат и најмалите промени во нивото на калциум во крвта. Обично има четири вакви жлезди и големината на секоја од нив е колку зрно ориз.

Кога овие жлезди ќе детектираат дека количеството на калциум паднало под одредено ниво, тие многу брзо, дури и за само неколку секунди, ослободуваат еден хормон кој им сигнализира на коските да ослободат дел од складираниот калциум во крвта. Исто така, овој хормон ги стимулира бубрезите да престанат да го филтрираат калциумот од крвта и му дава сигнал на тенкото црево да ја зголеми количината на калциум што ја апсорбира од храната.

Од друга страна, ако во крвта има премногу калциум, тироидната, односно штитната жлезда, ослободува друг хормон. Овој хормон им сигнализира на коските да апсорбираат и складираат повеќе калциум и ги стимулира бубрезите да филтрираат и да исфрлат повеќе калциум од вообичаено.

Ова се само два од над 100-те хормони кои телото ги користи за да регулира разни процеси.

Што мислиш? Дали способноста на хормоните да ги регулираат функциите на телото настанала по пат на еволуција или е дело на мудар Творец?