Нашиот живот и служба — работни листови
Превод на референци кои ги нема на македонски
1-7 МАРТ
ОД РИЗНИЦАТА НА БОЖЈАТА РЕЧ | 4. МОЈСЕЕВА 7 — 8
„Поуки од израелскиот логор“
it-2-E 796, пас. 1
Рувим
Во логорот на Израелците, племето на Рувим се наоѓало на јужната страна од светиот шатор, помеѓу племињата на Симеон и Гад. Кога тргнувале на пат, прва тргнувала триплеменската група на Јуда, Исахар и Завулон, а по нив тргнувала триплеменската група предводена од племето на Рувим (4Мо 2:10-16; 10:14-20). Исто така, племињата ги принеле своите жртви по истиот редослед на денот кога бил посветен шаторот (4Мо 7:1, 2, 10-47).
19-25 АПРИЛ
ОД РИЗНИЦАТА НА БОЖЈАТА РЕЧ | 4. МОЈСЕЕВА 22 — 24
„Јехова може да го претвори проклетството во благослов“
it-2-E 291
Лудило
Некој да му се противи на Јехова е лудило. Пророкот Валаам безумно сакал да пророкува против Израелците за да добие пари од моавскиот цар Валак. Но, Јехова го спречил во тоа. Во врска со Валаам, апостол Петар напишал: „Една нема магарица му прозборе со човечки глас и го спречи безумството на пророкот“. Во врска со безумството на Валаам, Петар го употребил грчкиот збор парафронија, кој ја пренесува мислата дека некој „се мрднал од умот“ (2Пе 2:15, 16; 4Мо 22:26-31).
26 АПРИЛ — 2 МАЈ
ОД РИЗНИЦАТА НА БОЖЈАТА РЕЧ | 4. МОЈСЕЕВА 25 — 26
Духовни бисери
it-1-E 359, пас. 1-2
Граница
Очигледно врз распределбата на земјата меѓу племињата влијаеле два фактори: резултатите од ждрепката и големината на племето. Ждрепката одредувала каде отприлика секое племе ќе добие свој дел од земјата, на пример, дали покрај морето или во планинскиот регион. Ждрепката ги покажувала одлуките на Јехова со што се спречувало да дојде до љубомора или расправии меѓу племињата (Из 16:33). Исто така, на тој начин Бог ги водел работите за секое племе да го добие она што било во склад со пророштвото кое му било дадено на Јаков и кое е запишано во 1. Мојсеева 49:1-33.
Откако со ждрепката ќе се утврдела географската локација на племето, требало да се одреди колкава ќе биде површината на земјиштето според вториот фактор, големината на племето. Во 4. Мојсеева 33:54 пишува: „Со ждрепка разделете ја земјата во наследство по своите семејства. На побројното семејство зголемете му го наследството, а на помалото намалете му го наследството. Каде кому ќе му се падне ждрепката, тоа нека биде негово“. Иако одлуката што била донесена преку ждрепка важела, сепак можеле да се прават промени во големината на наследството (ИсН 19:9).